為誰寫詩 為何寫詩

已故詩人陳秀喜『一首詩的重量，可以傾倒地球』，我希望我有一天有這款e力量。

嘛鼓勵家已，加讀些前輩能人寫e詩句。觀察環境，社會時態，環保議題…等等。把這e物件化作我的詩句。用我的文字，寫落來。

可能無啥人咧看，無要緊。當練習，台語是母語，即嘛我進步囉，閣會凍寫落來，是我進前毋捌想過e。

為誰寫詩？為我家已，心適心適啦。講使命感就太偉大囉，我只是一e普通e百姓。

假使你看到我寫e詩，感恩啦！寫無好，莫見怪！

我甘焦希望我e詩予你有一絲絲啊e感覺，阿呢就足感心，滿足。假使會凍引起你甲我e仝款感受和我當時寫詩時陣e想法甲理念，你會凍閣較了解我，認識我。就親像咱佇書本內底交流討論。雖然無面對面，我相信你絕對有收成，有新e想法。嘛有可能一天，無張無持，雄雄想起來，無的確，你有比我閣較讚，愈不仝款的想法。