2014年4月30日 星期三

記持



<<記持>>
失去仔記持
記持內有你
記持內有咱作伙行過兮足跡
有你兮溫度
有你兮笑容
有你兮種種
我煞顛倒親像失智仝款
雄雄連家己兮名  攏袂記
望著相片內兮你
若看生份人  煞有淡薄仔面熟

失去仔記持
是按怎補
是按怎去回想
想欲重新感受你兮雙手兮溫柔
想欲重新聽聽你講過兮話
回想
是甜蜜
嘛是心酸啦

我親像補破網兮漁工
記持是一張破網
煞永遠有補袂完兮孔

這是我失去兮記持

一入山林,毋知人間



笑啦

脫離紛亂兮社會

大聲笑啦

免聽著抗爭

笑啦

著大自然兮空氣

喝著冰清兮溪水

燒咧圍作伙

卡大聲笑咧

這是阮兮仙界

毋通閣笑落去

千年樹仔 剉了了

山崩落去

前人足跡 已經消失佇谷底

親愛兮朋友 揣無路通轉

毋通笑啊

胡蠅 蠓蟲 是你tuà來矣

你是有傳染病兮邪神

水鹿仔兮殺手

黑熊兮生死判官

無良心仔 你繼續笑矣


欲哮?

好啦,哮卡開活啦

用目屎清洗這受傷兮土地

用雙跤巡邏必痕兮傷口

哮啦,莫凝佇心肝頭

這是對土地兮認同


是對土地兮不甘 心痛

莫閣哮啊

閣哮嘛無較縒

好啦

欲笑  欲哮

隨在你啦




註:ak-tsak / 心情鬱悶、煩躁
欶 suh / 吸
tuà  /
胡蠅 hôo-sîn蒼蠅。昆蟲名

蠓蟲 báng-thâng  / 泛指如蚊蚋之類會吸人畜血液的昆蟲

bô-khah-tsua̍h /沒有用

2014年4月29日 星期二

生死在天



義士抗爭毋食飯,害院不時心酸酸。
決心拚命為家園,生死天毋免問!

後記:
請你共我講,誰人會當做到這種兮程度?

國鎖台北城


台北城內放路截,準是驚卡屎尿泄。
行入街頭避國劫,和平抗爭惹誰嫌?

註:
路截[loo7-tsah8] :拒馬。

後記:我無同意你兮看法,毋過,我願意用我兮生命維護你講話,表達,批評兮權利。

2014年4月22日 星期二

割胃





落實民主來拍拚,獨立建國出門埕。
聽君欲對蘇州行,意志堅定心頭定。
各位蕃薯斟酌聽,敢講這是阮兮命?
千言萬語煞梢聲,怨天怨地敢知影?



梢聲 sau-siann / 聲音沙啞。

I have a dream (台文譯)

 這是我家己翻矣,有毋著兮所在,請逐家指教。 

反勢網路頂懸已有人翻好矣。 教會朋友毋的確知影。

===========================
今仔日,真歡喜共逐家同齊作伙,參加這擺未來佇歷史頂懸上偉大,為著爭取自由所舉行ê遊行集會。

100冬前,一位偉大e美國人-----今仔日咱就徛佇伊過去ê身影 (sin-iánn)---簽署(tshiam-sú)<<解放宣言>>。這項重要法令ê公布,予千百萬陷佇無正義當中ê烏奴才,親像予返航漁船看著燈塔ê希望燈火,koh親像結束關佇牢房ê長暝,紲--落來迎接希望ê日頭光。

毋過,100冬後,烏人猶原無得到自由。100冬後,烏人猶原佇種族(tsíng-tso̍k)隔離(keh-lī)佮種族輕視ê環境悲慘過日。100冬後,烏人猶原生活佇物質(bu̍t-tsit)散赤ê孤島。100冬後,烏人猶原佇美國社會內底哮袂離,猶原感覺家己佇家園國土咧飄浪。所以,阮決定來到遮,欲這驚死人情形,事實公布予社會知影。

以某種意義上來解說,咱到來國家ê首都,是為著兌現(tuī-hiān)一張支票。咱共和國ê創立者佇咧寫憲法佮獨立宣言ê美麗篇章彼當時,就簽署著一張逐个美國人攏會凍繼承ê支票。這張支票向所有人答應——無論白人抑是烏人——攏仝款會當享受袂使讓渡(jiōng-tō͘)ê生存權利、自由權利佮追求幸福ê權利。

毋過,今仔日美國足明顯矣,對伊ê有色公民拖欠著這張支票。美國無欲兌現即款神聖ê債務,顛倒是予遮烏人一張菝仔票——一張頓(tǹg)資金毋夠ê印仔,欲予退轉來「不度(put-tō͘)」ê支票。毋過,咱絕對無相信有正義ê銀行會破產。咱絕對無相信有遮濟機會ê國家會來資金不度。

所以,咱來兌現這張支票。這張支票將來予咱寶貴ê自由佮正義ê保障。咱來到這塊聖地提醒美國:現此時著是萬分緊急ê時陣。現此時無是沓沓仔做代誌抑是食穩定主義鎮靜劑ê時陣。現此時是實現民主約束ê時陣。現此時是行出烏暗荒廢ê種族隔離,行出種族平等ê康莊大道ê時陣。現此時是咱國家行出種族毋平等ê流沙,行踏佇充滿手足之情ê石磐(chio̍h-pôa)ê時陣。現此時,使上帝ê所有囡囝真正享分有公平正義ê時陣。

疏忽這一時ê緊急性,對國家未來是足買命ê代誌。自由平等蘇爽ê秋天毋來,烏人順情合理哀怨ê熱天著袂結束。1963年毋是結束,是一个開始。

若是講國家猶原伊做伊ê,ê向望烏人出頭天才會心滿意足ê,絕對會足失望。佇烏人得到公民權利之前,美國袂安寧,抑袂平靜。反抗ê風氣將來繼續拆裂(thiah-li̍h咱ê國家ê基礎,一直到光芒燦爛ê正義日子到位 kàu-ui)。

但是,對予徛佇對向艱險限制ê正義之門,有寡話我一定愛講。佇咱爭取合法地位ê過程當中,千萬毋通通行毋著跤步來引起犯罪。咱千萬毋通吞忍著仇恨辛酸ê苦酒,更加毋通來解除對自由ê向望。

咱應該永遠有組織,嚴守紀律進行抗爭。咱袂當忍受咱有創造性ê抗議變成暴力行動。咱應該繼續提升到用靈魂ê力量對付武力ê上懸ê境界。

振興(chín-heng)烏人社會ê新奇蹟ê戰鬥精神,無應該引起咱對所有白人ê無信任——因為足濟白人兄弟已經體會著:怹ê命運佮咱ê命運是「司公仔信筶(sai-kong-á sîn-poe)」,褲頭絚絚縛相牽連,怹ê自由佮咱ê自由同行同命(tâng-kiâ tâng-miā)。今仔日怹來遮參加集會就是證明。咱袂凍單獨行動。當咱行動ê時,咱絕對保證勇敢向前行!咱袂使倒退攄(tò-thè-lu),無欲行回頭路。。有人問熱心民權運動ê人:"恁何時才會感覺滿意?"

只要烏人猶原是警察恐怖暴行ê犧性品,咱絕對袂滿意。
只要咱佇旅途勞苦了後,煞予公路旁汽車遊客旅社佮城市旅館拒絕蹛暝(tòa-mî),咱著絕對袂滿意。

只要烏人ê基本活動範圍只限佇位狹𤲍  (e̍h-kheh)ê烏人社區到較大ê烏人住所,咱著絕對袂滿意。
只要咱ê囡囝予掛著『白人使用』ê牌限制權利,毀損尊嚴,咱絕對袂滿意。
只要密西西比州ê烏人袂凍參加選舉,纽约州ê烏人認為怹佮選舉攏無關係,咱絕對袂滿意。
絕對,絕對,咱絕對袂滿意,一直夠公平若水咧流,正義若泉水咧噴。

我毋是無注意著恁有寡人經過若濟艱來到遮。有ê人拄才行出狹矮ê牢房。有ê人因為追求自由才遭受迫害風暴,佮警察粗殘掠狂ê虐待ê所在。恁飽受風霜,歷經拖磨。繼續拍拚吧,咱要相信:無辜受苦到最後絕對會得救!
轉去密西西比,行!轉去亞拉巴馬州,行!轉去南卡羅來納,行!轉去佐治亞,行!轉去路易斯安那,行!轉去咱北方城市中ê散赤貧民所在佮烏人社區,趕緊起行!愛知影,這種情況會凍而且將來絕對會改變。咱千萬毋通佇絕望ê坑崁(khe-khàm內沉淪。

朋友啊,今仔日我欲恁講,雖然眼前困難重重,毋過我猶原有一個夢。這咧夢深深釘根佇美國夢中。

我向望有一工,佇佐治亞州ê紅色山坡頂,過去做奴才ê後生會佮主人ê後生作伙坐仝一塊桌仔,若親像兄弟姐妹按呢

我向望有一工,甚至(sīm-tsì)含密西西比州——一个無正義佮壓制(ap-tsè)ê沙漠(sua-bo̍k)州國,會改造變成自由佮公平ê青青草埔。

我向望有一工,我ê四个查某仔將來生活佇一个毋是以皮膚水秤輕重,是以品格好壞做為判斷標準ê國家。

今仔日,我有一个夢。
我夢著有一工,亞拉巴馬州會有所iú-só͘改變——就算這州ê州長(chit-móa)現在一直無停咧講欲對聯邦法令提出異議而且拒絕執行——佇遐,烏人囡囝會凍含白人囡囝親像兄弟姐妹,手牽手作伙行。
今仔日,我有一个夢。
我夢著有一工,深谷坉平(thūn-pênn),懸山坉塗(thūn-thôo),狹路化做平路,彎路化做大道,上帝ê光再現,全天下生靈做作享受。

這是咱ê希望。這是我將來欲提轉去南部ê信念。有即款ê信念,咱就會ùi絕望ê山開採著希望ê寶石。有即款ê信念,咱就會使用國家內底ê相諍吵鬧噪人耳ê聲嗽,轉變成充滿動人兄弟情ê交響曲。有即款ê信念,咱就會使同齊做工課,同齊祈禱,同齊反抗,同齊坐監(tsē-kann),同齊維護自由,因為咱知影,咱路尾一定有一工會得著自由。

即工若到,上帝ê所有囡囝攏用新的意義大聲唱這首歌:
我ê祖國,可愛ê自由國家,我為你獻唱。這是我祖先落土ê所在,這是早期移民驕傲(kiau-ngōo)ê所在,予自由ê聲音迥過每一座懸山。
若是美國欲成做偉大ê國家,這點必須實現。

因此,
予自由ê聲音響到新罕布什爾ê雄霸懸山!
予自由ê聲音響到纽约州ê雄霸懸山!
予自由ê聲音響到賓夕法尼亞州ê阿勒格尼懸山
予自由ê聲音響到加利福尼亞州的規排懸山!
毋,不止按呢;予自由ê聲音響到佐治亞州ê石山!
予自由ê聲音響到田纳西州ê懸山!
予自由ê聲音響到密西西比州ê每一座懸山,个山坡!
予自由ê聲音響到个山坡!

正當咱予自由ê聲音放送(hòng-sàng),正當咱予自由ê聲音軁迵(nǹg-thàng)每一个大街細巷,每一个城市佮庄頭,咱就會使加速這工ê來臨。到彼當陣,上帝ê所有囡囝,烏人佮白人,猶太教徒佮毋是猶太教徒矣,信耶稣佮信天主矣,攏手牽手同齊唱彼首古早ê烏人聖歌:最後自由矣!終其尾自由矣!感謝全能ê上帝,咱總算自由矣!




 中文 英文參考佇遮