民主煙腸

圖來源 ：Jessie Chen

(一)

社會正義毋公平，歷史文化sai喙䫌，無能政府創啥貨，民主風氣不再回。

(二)

食煙腸愛配蒜頭，氣味十足鎖鼻頭，若欲吃爽兼止枵，就加大腸來共包！ 4/2

一串煙腸十二條，肥肥短短閣彎曲，香味衝鼻喙瀾流，欲提時陣無半條。

害阮目屎強欲哮，頭家笑笑伊來撨，心想一條吃無夠，開脾紲喙凍袂牢！

頭娘看著起姦撟，手攑關刀掃帚頭，青驚拍謝緊來走，佳哉煙腸早入喉。

頭娘生氣按頭揌，盈暗欲睏莫轉來，戇頭戇面做阿凱，社會抗爭管你代？

厝內開錢你了解，囝兒學費對佗來？無能政府毋知歹，家己顧好較實在。

阮佇邊仔心悲哀，對阮所做袂諒解，是非正義若有在，無免街路血絲絲(saisai)。