一入山林，毋知人間

笑啦

脫離紛亂兮社會

大聲笑啦

免聽著齷齪兮抗爭

笑啦

欶著大自然兮空氣

喝著冰清兮溪水

柴箍燒咧圍作伙

卡大聲笑咧

這是阮兮仙界

毋通閣笑落去

千年樹仔 剉了了

山崩落去

前人足跡 已經消失佇谷底

親愛兮朋友 揣無路通轉

毋通笑啊

胡蠅 蠓蟲 是你tuà來矣

你是有傳染病兮邪神

水鹿仔兮殺手

黑熊兮生死判官

無良心仔 你繼續笑矣

欲哮？

好啦，哮卡開活啦

用目屎清洗這受傷兮土地

用雙跤巡邏必痕兮傷口

哮啦，莫凝佇心肝頭

這是對土地兮認同

這是對土地兮不甘 心痛

莫閣哮啊

閣哮嘛無較縒

好啦

欲笑  欲哮

隨在你啦

註：齷齪ak-tsak / 心情鬱悶、煩躁。
欶 suh / 吸

tuà  / 帶

胡蠅 hôo-sîn /  蒼蠅。昆蟲名。

蠓蟲 báng-thâng  / 泛指如蚊蚋之類會吸人畜血液的昆蟲。

bô-khah-tsua̍h /沒有用