紅地毯e誓言

圖片來源：微博

                                     
對遮開始，一步一步行著紅地毯頂懸

眾人金金看

翕相機翕卡閃閃晰

我是男主角

你是女主角

咱毋是欲去領金馬獎

毋過，今日過了後

咱多一個角色

我，你e好翁婿

你，我e好牽手

你我互相欣賞

你我互相指導

包容，尊重

有時吐槽求進步

有時食苦做食補

無通告費，無人拍噗仔

無人拍分數

阮互相搬獎，互相肯定

幾年了後，

咱e角色加一項

我，人e老爸

你，人e老母

愛有耐心

愛有責任

教育，傳承

有時煩惱要樂觀

有時壓力就放寬心

無教育費，無教師證

莫替囝兒拍分數

咱佮囝兒互相學習，互相成長

幾年了後，

咱閣加演一角

我，人e阿公

你，人e阿媽

喘氣一下

再繼續搬落去

毋過，囝孫有囝孫福

咱毋是主角

上重要e是

我繼續搬好你e翁婿

你繼續搬好我e牽手

歸尾，人生謝落時

戲台仔賰一人，

毋管是你，抑是我

一人獨角戲嘛是愛好好仔搬予煞
這是咱佇紅地毯e誓言

註：參加完婚禮，有此靈感，故寫之。