台語人ài知ê歷史

<台語人ài知ê歷史>

下chit ê 標題，窮實是欲來宣傳台語冊，háⁿ你驚死我！推銷手法mā是合欲sak hia 2 本冊ê內容，nā有影2本lóng哺了了，講腦無長智koh營養不良chiah來chhōe Pháiⁿ-gín-á我算帳kap教會公報社無tī無tāi。

「台語人」chit ê 詞對我來講是悲情--ê，lán 先mài吵台語ê定義，koh吵是無智慧ê人，tiāⁿ-tio̍h是巷á外ê人，hoah燒來亂--ê。是án-chóaⁿ講悲情--leh，你捌聽人講美國人，美國話chia ê詞。Put-jî-kò，tī台灣，講「台灣人」，「台灣話」tō有人會tún-teⁿ，chhùi-á nā魚刺kéⁿ tio̍h，chhan袂--出-來。台語人leh？(狹意) M̄ tō是講台灣話ê台灣人？

是--lah，過去民主前輩phah拚台灣愈來愈開放kap民主，tī目前網路hiah發展欲查過去歷史ê kha 跡的確mā khah 便利，總是，台語歷史ê kha跡咱認捌--無？有人整理hiah詳細--無？有人講台語無文學，無siáⁿ歷史？借問chi̍t-ē，bó͘-mi̍h-lâng你是kám捌有二仟gōa ê台語作家koh對in hit時ê背景有理解，有同理ê看待？過去leh sak台語ê運動者chē-chē lóng是對本土文化自覺講母語袂使流失，nā無--去，台灣ê根 tō hǒng châu去--ah，變成無母親ê孤兒，無尊嚴等等。Che tō是頭前chi̍t開始所講ê「悲情」，台灣有nā無ê母語政策，欲七十年殖民統治，未來kám會改變？咱心內深深ê向望，mā 會用siōng嚴厲ê監督批評政府kap ka-tī。Lán「台語人」--leh，當然褲袋á soah m̄免 khêng-khêng leh鬥支持台文出版。無--ah！現陣koh leh 分台語人iā是台灣人，koh台語界chit款怪詞！變態強勢區分族群m̄是我，是長期ê「國語運動」mā是「政治運動」koh有tiām-tiām m̄願出聲ê你。

「台語人」1冬2本台語冊，1 日1 khó͘銀救台語是悲情，án-ne做袂kàu？準nā講是「台灣人」，kám袂khah輕可輕可？母語路才會行koh-khah長，咱所講轉型正義，m̄ tō是ài ùi chiah開始，起造文化ê底蒂。讀冊動手寫母語，che是siōng基本工，a nā是欲對台語史有了解，iā是欲研究，chit 2本冊tiāⁿ-tio̍h ài 看，尤其是早期基督教傳教士in用白話字，用咱台灣話來傳教ê過程，是hiah偉大，m̄是基督教ê我mā深深受感動。台語歷史絕對是認捌台灣殖民過程siōng好ê代表。所致，台語人台灣人，你kám m̄免知？Chit 句話有kóa嚴格iā-kú-káⁿ，nā有chit款想法表示lán腹內ê chi-ná毒koh chiâⁿ深，講siáⁿ-mi̍h多元社會國家lóng是講大聲話，愈大聲thang好騙ka-tī niā-tiāⁿ。

Che是咱俊州兄ê大作，俊州兄是我朋友兼台語導師，小弟我無知死活，台語學2冬外，文學評論無捌1 kho͘ ō͘-á han-chî，kan-taⁿ有1 粒m̄驚hō͘批ê心。講hiah chē，無詳細紹介內容是我功力無夠。總是，我pháng是第3 人kā hia 2本厚nā枕頭ê冊1字1字看了，來thi̍h 2-3句想是無人有話chiah tio̍h！2本加khiài欲40萬字，thang想像紹介文pháiⁿ寫，頭前來點出「台語人」kap「台灣人」是我ê感想，che mā 是俊州兄án-chóaⁿ定義台語作家時hō͘我ê刺激。序文講開14個月來完成，你nā看過內底收集ê資料，一定袂相信che是14個月完成--ê。He是俊州兄身為1 ê 台語學者ê個人筆記kap收藏，內底整理有chē-chē目前少人看過ê台語作家，文史資料，無論是教會，民間，政府文獻，歌曲唱片…等等lóng 列列入去發展年表內。有講siáⁿ？He是咱台語人血kap目屎ê kha跡，是hiah-nih-á khám-khám-khia̍t-khia̍t，1步koh 1步 lóng 是hiah苦難hiah無簡單。Hia ê 作家 hit 時面對殖民ê環境iû-goân無放棄ka-tī siōng 珍貴ê 財產—語言寫--落-來，對咱來講是m̄是koh ài khah拚--leh。過去2冬，算讀袂少台語冊mā開始收藏台語相關ê文史，我chiah 發覺講俊州兄tiāⁿ講ê「khioh pùn-sò」ê心情，無人愛，你chia siáu-á chiah ē看，chiah ē ti̍h，pùn-sò soah當作寶。目地是想欲來ta̍uh-ta̍uh-á 將台語人ê過去tàu出來，koh-khah顯明，hō͘人來了解，來研究來疼惜。Tī koh-khah闊 koh-khah 穩ê地基去chhun-ûn發展，chiah會koh-khah勇壯。Nā有人講台語無siáⁿ-mi̍h歷史，無作品kap作家，chia 2 本厚厚厚ê冊直接khian--落-去，hō͘伊開目。伊tō會去買來好好á認捌，冊名是<<台語作家著作目錄>>kap<<台語文學發展年表>>。

2016/3/4