國家正常化ê想像—選舉ê方向

國家正常化ê想像—選舉ê方向

Tse是我khah lím 1冬前uì基進黨ê政治電子報看tio̍h ê。

「有勇氣m̄是代表lóng袂驚惶，是認捌有比驚惶koh-khah重要ê mi̍h-kiānn，有氣魄m̄是萬項代誌tō lóng無問題ah，過頭tsim-tsiok huān-sè對代誌袂有啥pang-tsān。Uì tsit-má開始，你nā kā家己ê定位giú khah kuân khah遠leh，tō會發現家己有無限ê才調。Tsia siōng要緊ê關節是--你敢願意起kha行向tsit條路。」

Tse tō是改變ê勇氣。咱mā長久以來欠缺改變ê堅心。

過去濟濟政治人物lóng會講「維持現狀」tsit句話，tse窮實lóng是政治人物ê話術，欺騙民眾niâ，事實是選舉了ah，為tio̍h政治人物á是siōng大ê利益，一切過去ê政見m̄-nā拍折koh看無1个影。面對台灣ê現狀，尤其是面對中國ê橫霸，咱應該不時思考「改變」tsiah tio̍h。透過實質ê「改變」，實質ê轉型，才有國家正常化ê可能，倒頭講，有1个以台灣利益為主ê政府，mā才有真正「改變」ê可能。Tse mā是tsit幾年來，政權輪替ê好處，sui-bóng真濟代誌iû-guân m̄是咱所向望ê án-ne。總--是，咱愛理解殖民霸權m̄是1~2冬ê代誌，公民素養mā愛經過不斷ê啟蒙、覺醒才thang有「改變」ê起頭。當然，tse環境ê好bái m̄是改革者無去行動ê藉口，咱mā無悲觀ê權力。

所致，基進黨真濟少年人選擇參政，選擇行家己ê路，向望逐家作伙來想像咱台灣人大聲huah出家己ê名，作伙來追求公義koh進步ê國家。佇chia，咱mā thang重新好好á思考過去咱對「選舉」ê定義，tsit張票m̄-nā是kan-tann一張紙，he是咱ê未來m̄是政客kap生意人huah pha-lá-khián ê門票，tsit張票是咱做1个主人siōng大ê權力，要求政府打造一个安全，公義，幸福ê社會。讀者nā tsim-tsiok觀察有濟濟少年人堅心欲phah破過去國民黨政府殖民ê真相，守護台灣人ê利益，咱是m̄是愛思考咱敢有予in機會？咱敢有hōo家己1个「改變」ê機會á是向望？當然，佇目前社會ê民主意識iáu tng-leh puh-ínn ê階段，咱少年人用in ê熱情欲「贏」mā pah-bīn會khám-khám-khiat-khiat，mā是án-ne咱少年人ê意志絕對比hia政治láu-á koh-khah堅定。佇chia讀者mā thang想像tse改變後濟濟ê可能性。

過去咱無準備欲行向1个正常ê國家，做家己ê主人。現此時，咱敢koh欲kā咱ê未來，gín-á ê未來交hōo對咱土地無感情ê人，交hōo lóng uá生意人ê利益設想ê人，交hōo對改革無熱情，kan-tann對金錢有興趣ê政治世家？選舉應該是咱tshiau-tshuē「改變」ê起頭，咱koh看最近勞工問題，轉型正義，國民黨黨產問題，語言平等法，空氣污染，土地徵收問題，農業改革，課綱…等等，che無1項m̄是國家正常化愛去面對ê問題，咱leh想咱改變ê kha步愛koh-khah緊ê，濟濟代誌m̄-nā用喙講，權利kap正義tō會uì天頂lak--lo̍h-lâi。行動才有力量。

政治是咱生活ê代誌，咱無應該認為政治是lap-sap，thái-ko--ê，he是人ê問題，咱kā咱理想交予m̄-tio̍h ê人，咱kā權利放hōo m̄-tio̍h ê人。總--是，咱無應該放棄打造咱建立koh-khah建全ê國家，koh-khah公義ê社會。「選舉」已經是現此時台灣改變tiānn-tio̍h 愛行ê路線，咱逐家無一定lóng會實際參與做政治人物，總--是，咱ê選票是真tú真ê政治資產，tse tiānn-tio̍h愛好好投資。選票mā是咱siōng好的武器去對抗hia不公不義ê政府官員，tse應該是咱身為1个公民愛認知ê。

l  基進黨首頁

* 請用「負數票選制」解決鄉鎮市長與村里長選舉之弊

消失ê中國白蟻？

<消失ê中國白蟻？>

過一暝，心情iû-goân袂得過，根本睏袂去。現此時，全國大部份ê選民，候選人lóng歡喜選舉ê結果，總--是，我看無有sáⁿ thang歡喜。面對未來ê挑戰，一湧koh一湧chhîⁿ--過-來，咱人民tō ài有心理準備，蔡英文kap 伊ê執政團體有準備好--bōe？人民千萬m̄-thang siáu想選1 ê 總統tō ē-sái 改變國民黨過去對台灣主權ê耍弄，官商結構是無hiah簡單來phah破--ê。咱m̄是追求一時ê勝利，是長久台灣政治ê安穩kap未來成做台灣人是台灣ê國家chit款ê向望。當然整體選舉ê結果是人民所向望--ê，不而過，千萬m̄-thang ka 國民黨看soe-siâu，看貓á無點，in ê黨產kap中國白蟻不斷leh 侵蛀台灣每1 ê 所在。現此時，無人看破，無人願意承認，甚至閃避，為tio̍h選舉，為tio̍h選票，tō chôaⁿ-á消音，無聲無說。選舉無講真話，選後--leh？這是目前台灣政治，台灣選舉ê悲哀！人民ê素質，目光短淺che是咱知識份子siōng煩惱ê代誌。

台聯kap 打狗南都基進側翼聯盟落選，這是代表siáⁿ-mi̍h？台灣人iû-goân hō͘人掩khàm，mā是可能自主性逃避，閃避siōng基本ê問題，中國。對ka-kī ê危機iû-goân無法度看清。當然主流媒體ê禁聲，壓迫kap過去基礎教育ê洗腦thún-ta̍h，一時三刻欲出頭，m̄是hiah-nih簡單，chit陣少年人soah 有認捌che tō是咱台灣人生成運命ê臭賤，卑微，ka chit ê重擔擔--起-來，tō ài一步一步phah-piàⁿ求咱所向望ê新共和。人人講台灣已經變天囉，過去，阿扁仔做總統，咱mā是án-ne講，2000年選前hit 暝 蔡振南先生唱「台灣是咱母親ê名」，現此時--leh？周子瑜，1 ê 16 歲ê查某gín- á hông壓迫，親像ISIS唸稿，講歹勢會失禮，因為gia̍h中華民國ê國旗，咱台灣人敢有影hiah臭賤，甚至he 是中華民國殖民流亡政府ê旗á，這咱lóng袂心酸，艱苦？若án-ne，未來台灣主權--leh？

立委選舉辯論，有生目chiu ê 人lóng ē-sái看出基進側翼陳奕齊大聲講出中國白蟻ê問題，國民黨黨產ê問題，che是真真正正做 1 ê 第三勢力應該講ê話。總--是，無人應答，甚至感覺好笑。若是台灣ê門戶無顧tiâu是欲án-chóaⁿ顧厝內？這是siōng簡單ê道理，kám m̄是？為何目chiu 假做無khòaⁿ，筆者我無法度thang 理解。佗 chit 位ē-sái用ka-kī ê母語大聲講咱ê心悶kap不安，無為選票，kan-ta為tio̍h咱ê理想。Chit款ê結果mā是代表母語族群ê弱勢，人m̄-願接受多元社會族群。蔡英文欲推sak「台灣學」，台灣母語咱tō看伊如何kā基礎教育做好，無，四冬後，絕對是koh 1 pái 反盤。

「國民黨無倒，台灣tō袂好」，che是基本，台灣欲好siōng低ê要求，che是歷史教訓，m̄是政治niâ。國民黨應當無資格來參與台灣政治，in ài先替過去台灣大大細細ê政治事件所犯ê罪過來謝罪，清除無合理ê黨產，chiah koh用謙卑贖罪ê心來參與，無，台灣無可能行入1 ê現代化kap有主權ê國家。Che是台灣人民ài有siōng基本ê認捌。欲七十冬ê殖民，教育洗腦，咱無資格樂觀，kan-tan chhuì-khí 根咬--leh，繼續做永遠ê在野黨，人民最後一道防線。無chiah，台灣如何成為親像歐洲hit 款ê國家，做一世人ê奴才？

綠--ê過半，萬項代誌以後lóng無問題？這是gōng人講--ê。舊年台南市議會mā是過半，結果--leh？選出國民黨ê議長？這代表sáⁿ？民進黨ê基層已經ta̍uh-ta̍uh-á 國民黨化，uì政策來看已經開始oá靠中國--ah。咱憑siáⁿ-mih，放心hō͘ 民進黨執政？這m̄-tō是第三勢力ê產生，m̄-tō 是日頭花運動ê由來，m̄- tō 是歷史課綱反洗腦運動ê源頭？不而過，社會運動ê頭人，soah無願承受中國是siōng大ê 問題，國民黨是siōng大ê問題。Che是為siáⁿ-mih，因為腹內hit ê中華民國ê毒洗無chhing-khì，m̄願承受過去所受ê教育是完全m̄-tio̍h--ê。人ai講chit款ê想法siuⁿ過偏激，無理性，事實上，是ka-kī ê 決心無夠koh完全認捌現此時台灣局勢ê困境。無承認是欲án-chóaⁿ改善--leh？

今á日，寫che m̄是欲「造神」，m̄是為選輸哭哀悲，是煩惱民進黨未來ê中國政策，第三勢力(時代力量)對中國白蟻議題有看假做無看，有聽假做無聽，án-ne，chit場選舉人民iû-goân是輸kah脫褲！koh 有--leh，總統ài等到520 chih上任，馬英九政府欲án-chóaⁿ烏白創，新科立委lín準備án-chóaⁿ 做？咱定講2016年絕對是困苦ê 1 冬，你kap 我tō看hō͘ chim-chiok！台聯基進側翼ê落選所代表ê是siáⁿ-mih？背後ê理路，看無ê人真緊-tō看會清，想會明。咱chiah 向望時間是khiā佇台灣人民chit pêng，等待koh-khah濟人覺醒。中國白蟻袂無緣無故消失，溫水煮水雞he tō是目前台灣ê狀況，咱m̄願看清niâ。

2016/1/18