七字網誌0715

月中薪水入口座，錢莊連鞭(liâm-mi)隨來討，若無予伊生命無，若欲予伊心慒慒(sim tso-tso)。

--領薪水 2014/7/15

家己無才調，予人來黜臭，無知袂見笑，莫怪人姦撟。

--馬遭德駐台代表吐槽 2014/7/15

1.       比賽總愛分輸贏，贏的派頭免暑颺，輸的彼邊繼續拚，一時失敗敢有啥？

--世界跤球比賽 2014/7/14

2.       外形親像打馬膠，軟軟酥酥袂歹咬，若是囡仔枵飽吵，一支落去隨乖巧。
--豬血粿 2014/7/14

3.       人著樂透伊大叫，別人食麵伊喝燒，隔壁做愛煞起tshio，敢講心內袂礙虐(gāi-gio̍h)？
--想著看戲是癮頭--ah。 2014/7/14

4.       大眾廟後埋紅毛，海堡已經揣攏無，四草相戰歹結果，戀戀安平無奈何。

--四草大眾廟 2014/7/14

1.       分分合合誰人知，人生變化著了解，有緣千里行四海，其它交予天安排。

--談生死 2014/7/15

1.       顛顛倒講袂清，敖攄(lu)厚喋使人凝，若是佮伊當作真，絕對昨暝歹睏眠。

--畫虎lān 2014/7/15

1.       媽祖守護渡海難，安平夜曲保平安，陣陣微風時來探，心內琵琶聲聲彈。

-安平港 2014/7/15

我問天

<<我問天>>
風雨莫受氣，事事有天機，若有不如意，其中有道理！

七字網誌-0705

演講思辯我上勇，環島台灣第一強，意志堅強為原鄉，飄洋過海閣再衝！

~~美國演講加油


日黃昏，紅燒雲
水牛問，欲歇睏
轉家門，來食飯
剾竹筍，煮清湯

七字網誌0701

刣豬挽毛已過時，佗位好趁佗位去，回歸祖國做兄弟，蕃薯爛根據在伊。
~~國民桶心態！

看你真卸姦，不時扶(phôo)狗lān，卸世無期限，叫公來哭呻(khàu-tshan)。

--郝龍斌提「祖國拋棄論」

無才無調看無底，一心一意做一家，政策空轉民怨慼，伊煞攏講無問題。

--國民桶

頭路無底趁，祖公無留田，無錢假大範，褲袋賰零星。

--生活困苦

七字網誌 0627

祖公台史來亂抄，囝孫開喙來嘐潲，毋捌假敖是癮頭(giàn-thâu)，專家漩(suān)in是草包。

看伊遮大箍，毋捌食過苦，聽伊咧譀古，狗屎會孝孤，統一是正途，蕃薯塗塗塗，靠勢三代祖，賣台送作奴。

--連勝文

管伊人民哼咻喝(hainn hiu huah)，獨裁政權神經麻，基本人權來Thún踏，馬共一家無精差。

--抗議張志軍來台 民團住飯店 遭破門後軟禁

七字網誌 0624

紅毛驚惶心無定，劍獅雄霸保安平，陸耳門口逞(thíng)風神，妖魔鬼怪無敢爭。
法力無邊雨漸耳，台江內海攏有伊，安平大細來保庇，面雖威嚴猶慈悲。

--劍獅

出門落大雨，攑頭天烏烏，為著阮前途，管伊澹糊糊。
--出門

透早出門無食飯，日頭猶原猶未光，中晝干焦一粒卵，暗時一碗蕃薯湯。


--讀向陽『阿爸的飯包』一詩

人生若有不如意，來到廟寺抽籤詩，誠心誠意求保庇，大兇大吉洩天機。

--抽籤

七字網誌 0623

口咬七星劍，魔邪惡鬼閃，獅王氣勢炎，祈求福氣添。

獅王插雙劍，八卦來做砧(tiam)，求福避大劫，擋煞展威嚴。

--劍獅

透早出門雨來沃，無紮雨幔青盲目，規軀(su)西裝身齷齪(ak-tsak)，向望雲散日頭曝。

七字網誌 0609

筆比刀劍閣較利，文字流傳幾百代，內層精神思想財，拍破迷信愛捷栽。

--筆尖
姑娘生媠櫻桃唇，輕聲細語叫夫君，端莊( tuan-chung)大方守本份，滿面笑容若迎春。

--姑娘生媠

沉重提筆寫歷史，還原( huân-guân)過去袂當輸，洗腦教育攏愛除，獨裁黨權著曲痀(khiau-ku)。

--欲台獨，著愛按文化深根，了解家己歷史，講台語開始！

青山排規排，予阮心自在，相招約下擺，好友鬥陣來。

--(足百) 山

 欲來府城阮故鄉，文化古都伊上強，好食小吃好分享，相招tshit-thô著愛衝。

--阮故鄉


做人做事著老實，想空想縫(siūnn-khang-siūnn-phāng)人看輕，跤步踏錯著愛認，經驗粒積(lia̍p-tsik)上要緊。   6/8

--人生做事。

跳脫過去祖公屎，行出家己新世界，歹銅舊錫扛去埋，新穎思想才會來。
國際趨勢報你知，經驗分享聽看mai,一工一萬無清彩，上了有爽閤再來。
～～～開一萬上一工兮課程。

人來人去一場夢，看破紅塵有啥人？ 大師教示早著送，為何抑是無願放？
～～聖嚴，虛空有盡，我願無窮。

身在紅塵絕六根，修行頓悟在個人(kò-jîn)，該取該捨(siá)歹磅秤，生死離別雲風輕。

姑娘翹喙真可愛，聲聲溫柔真 gâu 奶，阮心咧做大風颱，勾魂溶(iûnn)骨變痴呆。
----姑娘生媠

七字網誌 0514

頂回青狂無準備，一時失算免失志，這回予你會觸舌(tak-tsi̍h)，叫阮飛龍飛上天。

--開房事先準備

少年無擋頭，姦無一箍潲，攏講伊上敖，正是(tsiànn sī)袂見笑。

--人生第一擺

七字日誌

仙人入深山，水鹿伴孤單，冰清靜心泉，雄霸居龍盤。
~~假使會使，我希望我現此時佇山頂，行踏佇雲海頂頭。

心情化做詩，口味鹹酸甜，大喙吞落去，好歹做家己。

--做家己

爸母嫌囉嗦，掠狂攑菜刀，性地遮爾惡，良心走去佗。
---不孝子
 香火延續DNA，無分男女佗即个。飼囝防老歹算計，規氣放伊自由飛。
--香火

分析問題出佇佗，事前定定差不多，事後後悔歹結果，凊彩個性烏趖趖
--解決問題

與林先兮相對七字

羅東公園----

水面本是靜，一時風來冷，致使心思凝，修道猶未成。


春梅--

冷風冷風一直吹，葉仔已經落入地，只有花蕊來作伙，一生測驗趁這回。

無常--

乾卦不測烏雲掩，世事萬變如何占，坤卦見光青山添，是好是歹由心念。

秋風--

純情吉它訴意愛，秋風請你綴阮來，等待伊將花蕊開，等待心情望你知！

落葉--

 落葉本是歸落塗，命運煞來誤前途，予伊流浪啥攏無，只有月娘來看顧。

開戰--

今夜相約巷仔邊，棺材替你攢準備，你若決心予我死，著免驚我無細膩！

街燈--

省電泡仔提來鬥，省電省錢攏總好，較免環境來漚臭，反制核能上有效。

台灣時事--

欲統欲獨留囝孫，反勢到時揣無根，殖民洗腦來忘本，即刻改變閣有賰。

後記：

佇林先兮寫兮物件得著較文學，悠美兮靈感。這是我所欠缺 (kheh) 矣！感謝伊！ 台語社有足濟兮先拜，攏是我學習兮對相。有寡先拜，我目前能力較無夠，就無法度做伙討論。加上時間有限啦！

起 tshio

我不止會凍寫公共議題，閣會烏白寫其它烏漉木製兮物件！



這个媠姑娘，年紀遮呢幼，舉動誠溫柔，向望做好友。

胸前兩粒球，薄衫透清幽，小弟足害羞，褲底一直搐！

在室為我守，雙脣予我受，甘願做大樹，時時來做岫。

脣 tûn / 唇 

拍地鼠

圖來源反馬英九聯盟

你這死人面，無能假悾顛，賣國予人展，死死無人憐。 3/25

跤手早著予看破，無能獨裁若鱸鰻，開講跳針亂亂泄，魚網陣頭網淺拖

馬式『指鹿為馬』

(一)

這種總統無才調，

看伊馬跤粗敖跳，

煞定痟話真見笑，

九點二趴創啥潲。

(二)

帝位毋甘放

頭殼破一空
智能一直降
屎尿眾鼻芳