無寫袂使得？

 咱mā m̄是專職寫作，本職是leh做科技業，所寫ê題材koh是偏文學類。因為án-ne，無直接ê連結，欲寫作éng-éng ài開真濟時間，mā需要真濟時間來閱讀。​

​

這村上春樹ê冊就捌講伊án-chóaⁿ培養伊ê寫作慣勢，三十gōa冬來逐工lóng維持仝款ê作息，逐工寫固定ê字數…等等，講這是一場體力ê考驗。​

​

咱看真濟台文前輩出冊，éng-éng mā是到欲退休ê時，創造變少，出冊ê意願mā變少，（當然有例外，蕭平治老師就是），hō͘咱感覺真拍損，mā點出出版ê困難kap寫作ê喟力欲維持無hiah簡單。​

​

當然lah，應該講任何語言寫作lóng仝款，母語koh-khah困難niâ。​

​

現此時，咱來講欲寫mi̍h-kiāⁿ ê時，欲有好好á ê時間靜落來坐佇冊桌前寫是無啥可能eh。Gín-á知影我tī厝--lìn，就ē不時叫阿爸，欲橫心當作無聽著，mā是無可能。​

​

Chín閱讀kap寫作百分之99 lóng是坐車、半暝、bâ-bū-kng進前完成，寫作m̄是真khin-khó ê代誌。咱八月有一个講座題目〈母語寫作是人生上好ê投資〉，照理講，咱資歷koh真淺，人請去演講he是咱pn̄g文學獎ê名，就親像村上因為文學獎提著作家ê門票仝（歹勢，我m̄是欲kap伊做對照，叫是家己gōa厲害。）。題目是咱定--ê，mā真心án-ne想。總--是，世間無hit lō免開時間免喟力就有好ê成果。​

​

耐性kap龜毛是寫作人ài有特徵。​

​

可惜真兩項lóng無，逐pái欲寫lóng是有靈感來，幾字phiat phiat leh就完成。講án-ne，確實無負責任，咱本底就是寫欲敨氣eh，請諒情。是講靈感無可能直直來，寫一半koh m̄願án-ne放伊soah，chŏaⁿ 潦落去，逼家己寫。阮某講我leh寫mi̍h-kiāⁿ ê時，人變kah真神經，害伊mā tio̍h-che，睏眠chia̍h-si̍t lóng chiâu變調。​

​

龜毛leh？這項我愈無。通常人放屎了，kha-chhng會洗hō͘清氣，用衛生紙chhit ta。我知這種例m̄是真好，歹勢，無koh khah好ê例ah。我一篇寫了，就像腹內ê怨tháu了，完全無想欲koh看，袂輸是斷往來ê友情。雖bóng會校正一、二擺，錯字mā是真濟，字句mā tiāⁿ-tiāⁿ袂順，lô-chip無通ê問題。​

​

咱mā讀過袂少教人án-chóaⁿ寫、án-chóaⁿ讀ê冊。落尾，mā是hō͘家己ê貧惰拍敗。向捌看過我ê文章ê人，講一聲歹勢，hō͘ lín感覺真chha̍k-ba̍k。​

​

為啥物無愛停起來，khah規氣？應該是我話無講soah，bē使得，可能我koh有tām-po̍h-á喟力，相信母語寫作是人生上好ê投資。寫好寫m̄好，是需要練習，甚至是tiau-kang練習，che lóng m̄是一冬二冬ê代誌。​

​

為啥物無愛停起來，khah規氣？聽著gín-á koh leh叫阿爸，我想che mā是真大ê原因。​

​

2021/3/12​

​

l Koh再論閱讀--「做一个母語作家是人生上好ê投資」

 

l   Koh再論閱讀--「做一个母語作家是人生上好ê投資」

延續拄才「閱讀」ê思考，koh想欲進一步討論讀者ê想法、心理。我想這mā是欲開始寫作進前真大ê議題。無欲kap讀者做連結，kan-taⁿ做家己講家己ê代誌是lóng真好。總--是，he有影袂吸引較濟人，歹勢，咱tī chia是lóng真直接，tiau-kang ùi「功利」來看，按呢有影拍損。親像你聽人講故事，內容lóng mā是有sī-á-ga̍h過，才thang引聽眾改變、影響in，甚至教育in。作家從來袂講這是為tio̍h in ê「利益」，in講這是「文學」、「藝術」ê力頭。

 

今，ùi「閱讀」文本一層一層kā in ê結構剝開，主題是siáⁿ，作者想欲表達是siáⁿ，hō͘你感動ê是siáⁿ？你敢有仝款抑是無仝ê經驗、看法…等等，這lóng是你寫作進前siōng好ê自我訓練。學習án-chóaⁿ感動人，表達家己心肝頭ê感受，這敢m̄是lóng ài練習ê？何況欲寫落來，óa靠文字niâ。所致，閱讀成做作家寫作頭一項基礎功夫。

 

閱讀mā是靈感siōng好ê來源，因為殖民歷史ê因端，台語作品文類相對來講khah保守，範圍khah e̍h。母語作家敢有可能kan-taⁿ讀母語作品niâ？若是，近親相thòaⁿ，這大ê機率lóng mā是一寡欲臭酸ê 物 ah，讀者敢袂siān？敢有可能kā市場最大，吸引koh-khah濟ê讀者？予母語真正行向生活入去！

 

寫母語就是做社會運動，做運動ài有時間kap錢。咱m̄驚人講看錢重，無錢是beh án-chóaⁿ thīn母語作家出ê冊，一本台語冊算300 kho͘，一冬保守至少有出20本，雜誌社寄付算算leh，上無mā 1萬kho͘，che koh無算華語冊leh。咱mā真知平均咱人一冬才買一本冊！Hit本冊敢會是母語文學？這lóng頭前就捌講過，就koh mài論。

 

以某種程度，我有時真無佮意人直直làu台語文學，soah m̄捌看過伊好好á寫一篇散文，甚至是個人感想心得。就親像，錢無hiah gâu趁，袂曉理財，koh siáu想欲khah早退休。真歹勢，咱最近lóng lia̍h”錢”做例，是欲點出文學ê冊kan-taⁿ是文類ê一部份niā-niā。咱若想欲完成ê母語教育，無應該獨獨hoah母語文學，就親像咱學英文，mā無lóng讀英語文學niâ，讀大學ê時濟濟指定教科冊是用英文寫--ê。

 

寫作百百款，mā有小說leh寫理財、親像《曼尼先生》，用小說ê手法予讀者理解金錢ê觀念。Ùi chia來思考，是咱作家袂記讀者，無kap讀者做連結，市場才歹，運動無koh-khah進步，範圍傷過e̍h ah。直直講文學，mā tio̍h思考咱是欲講siáⁿ主題，佗chi̍t方面，有時咱就lóng無好好仔認捌家己，m̄知影家己想欲表達siáⁿ，就欲做作家？你nā chim-chiok，寫故鄉lah，歷史、政治，親情、愛情ê母語作品佔大多數。對母語提升這tiāⁿ-tio̍h m̄是一件好現象，

 

台語文類ê議題、閱讀ê題材koh sòa--落-去，若欲期待較濟少年人來使用台語，án-ne，siōng好出寡相關財經ê冊，討論án-chóaⁿ 面對未來、解決工課場ê問題、馬拉松訓練…等等。A̍h是，逐家人lóng感覺去讀華語冊就好？若是án-ne ê想法，文學冊讀華語冊就好ah。咱去聚珍堂買冊，mā不止仔濟基督教作家利用聖經leh談理財，有錢奉獻相對有koh-khah e有效應，才thang做koh-khah濟代誌。無，直直講救母語，有滾絞ê使命，腹肚seng hâ leh？Án-ne是thang行gōa久長leh？

 

這篇li-li-lak-lak小寡點tio̍h閱讀是愛有寡mê角，mā koh點tio̍h著咱想看māi家己想欲讀siáⁿ-mih方面ê冊，這應該lóng無限定範圍才著。閱讀ē-tàng講ê代誌傷濟ah，咱chia是欲點醒母語人，咱千萬m̄-thang beh 寫m̄讀，iah者是讀母語nia，這學習思維是有衝突eh。假始對閱讀有真大ê體會，有意識用母語來理解，mā學習著一寡文學手法。接sòa落來就放手寫ah，而且是寫任何文類lóng ē-sái。

 

2020/1/21-22，1/26修。

 

 

論閱讀--「做一个母語作家是人生上好ê投資」

 

論閱讀--「做一个母語作家是人生上好ê投資」

 

咱m̄是天才，一出筆就會曉寫，何況是hŏng thún-ta̍h hiah-nī-á久ê母語。窮實，市面上已經有put-lih-á濟ê華語工具冊，教咱án-chóaⁿ寫，是講咱觀察mā是頭á興興niā。假使讀著無興趣，m̄知影án-chóaⁿ讀，iah-sī欣賞，講寫會出來會hŏng感動ê mi̍h，這有影就較oh。

 

咱有一位好朋友施á俊州，論家己「m̄是一流作家，卻是一流讀者。」咱mā m̄是欲做一流讀者。是欲kā家己講，記錄生活掠外，除非你生活不時充滿值得寫ê mi̍h，nā欲維持寫作，你tiāⁿ-tio̍h就ài óa靠大量閱讀、甚至是tài有功利、意識性ê閱讀，才thang加添你寫作ê範圍，深度kap闊度。

 

有人問寫作無靈感，án-ne差不多是下跤二種情形：第一，生活kho͘-á傷過e̍h，第二，無siáⁿ leh讀別人ê作品。有寡作家，mā有可能寫真濟mi̍h，總是，走脫袂出一寡個人歷史ê心情，我個人mā有chit款問題，he是落尾家己閱讀別人ê作品發現家己有仝款ê症頭，你nā母語作品看濟就知。Chia m̄是欲批評，he是歷史造成ê，是欲講這就是「機會」，ài行無仝款ê手路，hō͘母語闊度提升。Nā無閱讀，當拄用母語寫ê你，可能會行先輩過去行ê路。這mā是學習過程，mā是個人啟蒙ê過程。咱m̄是講這無好，是感覺較拍損，ka-ná行袂出前世代ê影跡。透過閱讀，hō͘家己ê kho͘-á hùn--開，靈感是ài家己挖出來ê，m̄是hiông-hiông雷公kòng--tio̍h才會有。

 

對母語寫作ê人，koh有一種長期自卑ê個性。講無資源，欲讀母語冊真少，母語環境真欠缺。這咱lóng同意，是講，bē-chêng做就哀，是欲án-chóaⁿ行會遠leh？

 

窮實，現此時母語已經有koh-khah好ê政治環境kap科技ah，有台語電視台，語言平等法通過，網路有電子字典，輸入法…等等。早期我kā圖書館ē-tàng借ê台語冊lóng轉來看，少bóng少，內底ê台語mā kap我ê語感khah bā。我捌初估2020出版ê台語冊上無是2019 ê 2倍。有影，nā經濟上無問題，thīn母語作家交關in ê冊是就是參與社會運動。我個人是óa靠文學獎獎金kap投稿稿費，「koh再投資」，買冊不時吸收，分析欣賞文本才有koh-khah濟想欲寫ê題材。欲講我ê靈感是買--來-ê，讀來--ê，這有影對對對！

 

敢一定ài讀台語冊？台語冊敢逐本lóng好？任何語言出版ê冊tiāⁿ-tio̍h有好有bái。除非你kap我仝款有收藏台語冊ê phiah，kap有相對上獎金kap稿費來源，無，就好好á讀幾本á經典就好。這有一點仔違背頭前講ê大量閱讀，不過這ē-tàng靠讀華語冊來補，chit點咱等ē才來講！讀寡好ê台語作家，就是「功利kap意識性」ê閱讀。比如講，讀陳雷，陳明仁ê小說好通理解台語kap華語ê精差、小說ê結構，讀陳正雄著獎ê作品才知台語詩kap我寫ê級數無仝。提chia三人ê做標準，koh去讀其它ê母語作品，問家己差佇佗？Koh講一pái m̄是欲拍分數，是欲訓練閱讀ê素養，敢有合味無？

 

台語閱讀ê素養，認捌羅馬字是第一。M̄-thang看羅馬字無，sui-bóng羅馬字mā是字是一種常識，總是有誠人，甚至是文學獎評審mā leh phì-siùⁿ。咱才tiāⁿ-tiāⁿ比文學獎時食虧，逼咱文稿使用全漢，感言全羅。算來這是咱佇體制內做ê抵抗。閱讀陳雷、陳明仁ê作品愛有意識性觀察in ê台語詞比較其它台語作家，你若有法度分別出來，代表你ê台語素養相對上有進步，有利益tio̍h。我觀察chit幾年來，台語寫作確實有進步袂少。總是，無認同羅馬字ê人永遠是袂進步，寫二十gōa冬lóng仝款。

 

華語作家敢lóng讀華語冊niâ？誠濟好ê翻譯冊敢lóng無teh讀？就是寫了好，有市場需求，才會有人欲翻作華語。Lia̍h母語作家來看，更加袂使欲讀台語作品不可chit款想法。當時仔，你手頭hit本台語詩集，你用「華語」讀，hoān-sè無知覺he是台語冊。所致，有母語意識leh讀是一種tiau-kang訓練。這thang 幫贊你ê作品kap別人加khah「正範」。任何人講語言會進化，落尾無語法精差…等等ê評論，讀in ê作品ài khah斟酌。

 

簡單講，你試看māi提一本華語冊，用台語念，袂曉ê詞，查辭典，tiau-kang翻譯出來。音樂無國界，文學敢to有？語言、歌詞有法度百分之百翻譯？因為無可能，咱才欲寶惜咱ê母語，kā寫--落-來。如果你煩惱無靈感，橐袋仔錢無，有意識性讀華語冊是母語作家袂當放棄ê代誌，因為he m̄-nā是咱目前環境上多元ê寫作內容，mā是咱圖書館上濟ê冊。免開你一銑五釐。

 

閱讀上大ê開銷是時間，絕對m̄是錢項。誠濟人讀誠濟冬ê冊，落尾m̄知影leh讀siáⁿ，愈免論講有gōa濟寫作出產。咱mā是chit規冬來，才有hit lō意識去修正，透過閱讀kap寫作ê循環沓沓仔進步。臆看māi，拍開咱學習ê通關ê chit款冊敢是用咱母語寫--ê？Nā m̄是，che是m̄是咱母語作家ê好機會？欲寫作進前，先問家閱讀ê功夫下gōa濟。

 

2020/1/17-18