列工課原則-1

 

新增項目。

心態kap溝通猶原是第二。這改善攏是久長的。

心得 《晶片戰爭》

 

這本書咧講晶片跟戰爭的關係。

你若關心政治掠外，你捌佇這个電子箍仔做過工課過掠外，抑無，一般來講，對這兩個主題分別毋是了解的人真oh理解。

這本書量其約四十章過後，才開始講到戰爭相關的議題。

進前講一寡半導體的歷史，抾一點重點說明台灣按怎佇即个角色佔真大的位置。

中國欲拍台灣，會影響偌濟人？有偌濟人咧thīn咱？彼位地理、經濟來看，彼是引起國際的問題的。

人人咱講第一島鏈、半導體供應鏈、主要的就是佮日本、韓國連帶的關係。

這的所在若出問題影響的層次，彼嘛毋是疫情彼款級數，這是會世界大戰的。

當然，咱毋是戰爭的主事者。咱是守護家己的土地。無人佮意有戰爭。

總--是，咱毋通看家己無，當做咱家己是細漢。

from 《晶片戰爭》

地圖拍開，google查一下，台積電確實是一粒一。佔台股27.6%，世界晶片製造贏第二第三名閣較加。

台積電它是世界第一的，這是經濟事實，科技推進的助手，無論佇政治或者經濟體制之下，伊是無可取代的。

想像一下，接紲幾冬無出新的電子產品，所有的進步攏停落來。這意思是經濟嘛差不多停落來。總—是，停落來的意思袂少公司會倒，彼是另一種災難。

若是中國欲拍打台灣的話，這必然造成科技的倒退，抑者是全世界經濟的倒退。

若戰爭，這工廠敢會有問題嗎，有法度繼續運作無？對世界有啥影響？

這冊有真仔細的紹介。

現此時的經濟，台灣地理位置，亞洲戰略kap美國利益來看，咱嘛會使理解愈來愈濟國家討論台灣。是按怎不時派官員來，賣武器予咱保護咱家己，嘛是保護美國的利益，全世界的利益。

位早前的冷戰開始，美國就真清楚半導體的路用，koh有科技所起引的改變。

今，時過變遷，中國開始趕起來，甚至欲用來對付美國。

台灣有世界第一的晶片製作的公司，顛倒變做一項真有路用的武器，人講的「矽盾」。

科技影響經濟行向，嘛影響政治局勢，甚至戰爭的輸贏。

佇露西亞佮烏克蘭的戰爭，予咱幾點啟示，戰爭毋是袂發生，低線佇佗位？

按怎預防？未來的戰爭嘛袂像過去仝款，是愛靠科技，精準的攻擊。

這一切攏愛有高級運算的晶片才做會到，這毋是凊彩抄就有，毋是用錢siâⁿ人過就有。

欲做這出來毋但愛有設計所需要的軟體、封裝測試，閣有製造。

有市場掠外，產品完整的流程這毋是獨獨靠一个國家就會做到。

這流程--lih製造的所在，超過8成佇亞洲，就是第一島鏈頂的國家，其中咱台灣徛佇中央，徛佇中國佮美國中間。

若有戰爭，規綰電子業攏會定--去。

仝理，台灣有用水的問題，有用電的問題，若地震，有人才的問題（少子化），這對全世界經濟、區域性的戰略攏會影響。相信這政府攏有咧準備，咱的對敵嘛真清楚。

疫情時，袂少公司停工，晶片大欠貨，同事訂的車一冬後才提會著；厝邊訂無冰箱，姑不將訂一台大台商業用的冰箱khǹg佇亭仔跤。

現此時一支手機仔就有完整電腦的功能，手錶通做AI助理。

這攏說明晶片這項商品，咱已經無伊袂使。

欲做到量產，嘛毋是幾間公司做會到。尤其是高階的CPU，整合密度懸的晶片。

佇101頁，就有講著85年代李國鼎的經濟政策，伊mā認知台灣島設的半導體公司愈濟，台灣佮美國經濟關係愈峇，台灣愈安全。

是按怎，今2023年，有寡人看袂清？

欲做到量產就是愛有一定的良率，自動化有一定的水準，才有利純，錢通回收。

講欲共台積電，聯發科買落來。這毋是無發生過，是hŏng擋落來。

今，欲搶欲佔？家己投降掠外，其它國家敢會認同？

就是中國的企圖佮野心過頭，不時講話háⁿ，飛行機照三頓飛來亂，美國才煩惱。美國才限製晶片廠去中國，製造的機台袂使賣中國，甚至設計的軟體無愛予中國用，甚至位美國智慧財產所設計出來的物件攏愛禁止。

設使中國有這科技，絕對對世界真大的壓力。

想看覓，霸佔台灣的地理，佇東海岸bih藏潛水艦威脅美國的本土，有精準的武器，閣控制南海、太平洋出入。佗一个國家袂驚？

所致，限制中國晶片的發展毋是無理路。欲予in無才調發展。

閣愈免講，中國華為的設備開後門去偷人的資訊。用假資訊去騙，網路安全走鐘，目前有偌濟國家限制華為的設備？限制Tik-tok？

上需要防止chia的公司的台灣煞攏無動作。

在中美經濟戰之下，華為佇智慧型手機的發展嘛chhé--落-來，今年大概中國的晶片廠應該嘛攏倒落來。因為無法度提著上新的機台，買袂著其它的晶片組合。總—是，鴨卵較峇嘛有縫。

講幾件個人經驗。

咱佇研究所時，捌使用過台積電，聯電，穩懋 等等公司的製程設計過射頻電路。

現此時佇半導體公司，嘛有接觸過內部半導體工廠。

以半導體工廠，台積電會使維持目前的地位毋是無因端的。外國的公司欲拚真oh。（sorry，boss）

這需要文化，研發的人才，工程師的態度佮效率。

濟濟人會講是賣肝的工課。咱來看彼是無理解這事業的運作，放大個案，去共貼負面的標頭。

佇咱有限的工作經驗，嘛有佮華為牽連的。

幾冬前，咱的主要客戶就是華為，產品是5G。

後來咱看毋是勢，申請內轉調，轉去汽車雷達。

今，彼个部門欲死tōng-hàiⁿ。佳哉，咱早早脫離屎窟仔。

這冊有一句話講得真好，「美國需要壓制華為，就是中國現在的戰爭就是用半導體打的，但是呢，我們卻讓華為使用美國的設計」

政治就是生活，生活就是政治。這敢毋是真有邏輯？

人就侵門踏戶ah，和菜刀to毋敢攑出來？一句話毋敢講，顛倒替主事者咧維護。

閣講一个較遠的例，中國早前嘛不時收pa̍k買 欠缺資金的公司，抑是主動買斷。

NXP分出來的AMPLEON公司就是後來成做「锡产微芯」半導體公司的一部份。

這咱來看就是華為第二，總—是，冊無寫著。

當然啦，作者若欲查嘛無好查，因為伊hām官網攏無！

咱空想，中國人敢會戇戇仔予美國頷頸teh牢牢？

咱真知AMPLEON所生產的射頻功率放大器，會使提來干擾頻譜，戰爭時無法度接收清楚的訊號。軍事AI的運算力是戰爭定著愛有的資源，露西亞已經做一个真好的見本ah。

這需要時間去準備。習進平忍會牢？

所致，相對成本低的資訊戰、心理戰不時攏有。

這閣是另一个課題。

台積電敢會予取代？

咱來看是真oh啦。畢竟無幾間公司開會起這錢。準講開會起，嘛需要一寡國家的協同合作，佇獨裁無自由的國家是做袂來的。

咱定愛思考，認捌自己。咱免佇台積電上班，總是，愛知影伊佇世界的影響，佮伊予咱一片土地的價值，國際的戰略位置。

咱應該感覺驕傲，生活當中所使用的電子用品內底的晶片有3成以上是台積電做的。其中大部份是佇台灣即片土地做的。

媒體定定失去正常的人邏輯，講去台化。是講鴻海，電子五哥去中國時，攏無聽媒體咧講。

另外一位投資專家闕又上捌出一冊專門leh講台積電，這股價家己會使去看。

闕老師有摘出一點，台積電外資法人佔大多數，伊講早期時政府的勞退基金應該來買台積電，毋通替人「打工」，咱suh幾喙湯niā-niā。

這有影。嘛通連結去這本冊閣有美國利益。

今仔日綠角閣發文台設0050的內扣手續費無法度佮國外比。

這投資的事項雖bóng看起來佮這冊無啥ti-tāi，主角攏是台積電佔大名。

投資就是愛久長，投資伊就是對伊有信心。有信心，競爭的力頭才有法度維持。你可能無投資台積電，你愛知台積電是咱台灣的，美國人投資伊。

會戰爭袂？看錢按怎走？

以上，踅踅念分分仔2700字。