無良教育歌Bô-liông kàu-io̍k koa

無良教育歌	Bô-liông kàu-io̍k koa
1 南北二路好朋友， 嚨喉大聲共恁咻， 敢有聽見人喝救， 彼陣學生面憂憂。	1. Lâm-pak jī lō͘ hó pêng-iú, Nâ-âu tōa-siaⁿ kā lín hiu, Kám ū thiaⁿ-kìⁿ lâng hoah-kiù, Hit tīn ha̍k-seng bīn-iu-iu.
2. 殖民洗腦教育部， 毋做好人欲做奴， 是非顛倒刁意故， 講來講去為前途。	2. Si̍t-bîn sé-náu Kàu-io̍k-pō͘, m̄ chò hólâng beh chò lô͘, sī-hui tian-tò tiau-ì-kò͘, kóng lâi kóng khì ūi chiân-tô͘.
3. 盍教攏是中國屎， 祖先叫啥伊安排， 黨國政府若無敗， 囝孫準備做奴才。	3. Khah kà lóng sī Tiong-kok sái, chó͘-sian kiò siáⁿ i an-pâi, tóng-kok chèng-hú nā bô pāi, kiáⁿ-sun chún-pī chò lô͘-châi.
4. 你我公媽隨人祀， 毋通牽對咱遮來， 一爿一國無治代， 歷史證據通人知。	4. Lí góa kong má sûi lâng chhāi, m̄-thang khan tùi lán chia lâi, Chi̍t pêng chi̍t kok bô tī tāi, Le̍k-sú chèng-kì thong lâng chai.
5. 部長惡質硬欲捒， 叫咱囝孫就愛讀， 思想控制無頭殼， 雙手雙跤攏總縛。	5. Pō͘-tióⁿ ok-chit ngē beh sak, kiò lán kiáⁿ-sun tō ài tha̍k, su-sióng khòng-chè bô thâu-khak, siang chhiú siang kha lóng chóng pa̍k.
6. 彼是人民的靠岸， 到今看甲真畏寒， 跤尾手冷咇咇掣， 是欲按怎來反盤？	6. He sī jîn-bîn e khò-hōaⁿ, kàu taⁿ khòaⁿ kah chin ùi-kôaⁿ, kha bóe chhiú léng phi̍h-phi̍h-chhoah, sī beh án-chóaⁿ lâi péng pôaⁿ?
7. 記者嘛逢掠起來， 實情毋敢予人知， 賊仔政府性袂改， 拆食落腹伊上愛。	7. Kì-chiá mā hông lia̍h khí-lâi, si̍t-chêng m̄ káⁿ hō͘ lâng chai, chha̍t-á chèng-hú sèng bē kái, thiah chia̍h lo̍h pak i siōng ài.
8. 民主自由假若屎， 叫咱乖乖做奴才， 委屈冤枉囥腹內， 思想改造才應該。	8. Bîn-chú chū-iû ké nā sái, kiò lán koai-koai chò lô͘-châi, úi-khut oan-óng khǹg pak-lāi, su-sióng kái-chō chiah eng-kai.
9. 影片傳到佇網路， 咱的學生攏食塗， 看是按怎來讚助， 向望政府天都烏。	9. Iáⁿ-phìⁿ thoân kàu tī bāng-lō͘, lán e ha̍k-seng lóng chia̍h tô͘, Khòaⁿ sī án-chóaⁿ lâi chàn-chō͘, Ǹg-bāng chèng-hú thiⁿ to o͘.
10. 網路頂懸來討論， 相招教部來出巡， 守護學生毋甘睏， 為咱台灣好囝孫。	10. Bāng-lō͘ téng hiân lâi thó-lūn, sio chio Kàupō͘ lâi chhut-sûn, siú-hō͘ ha̍k-seng m̄-kam khùn, ūi lán Tâi-oân hó kiáⁿ-sun.
11. 王仔曉波真哭爸， 講是意識的問題， 牽拖阿婆油炸粿， 袂輸痟狗吹狗螺。	11. Ông-á Hiáu-pho chin khàu-pē, kóng sī ì-sek ê būn-tê, khan-thoa a-pô iû-tsia̍h-kué, bē-su siáu-káu chhoe káu-lê.
12. 伊的心肝有夠硬， 台灣就愛做阿西， 欲姦欲拍閣欲提， 世界無人遮連回。	12. I ê sim-koaⁿ ū kàu ngē, Tâi-oân to ài chò a-se, beh kàn beh phah koh beh the̍h, sè-kài bô lâng chia liân-hôe.
13. 政客佬仔算計， 吳仔思華死人皮， 管恁按怎譙佮詈， 猶原逐工好睏暝。	13. Chèng-kheh láu-á gâu sǹg-kè, Gô͘ á Su-hôa sí-lâng phôe, koán lin án-chóaⁿ kiāu kap le, iû-goân ta̍k kang hó khùn mê.
14. 學生代表林冠華， 青春少年用命跋， 欲將烏箱摃予破， 犧牲家己受拖磨。	14. Ha̍k-seng tāi-piáu Lîm koan-Hôa, Chheng-chhun siàu-liân ēng miā poa̍h, beh chiong o͘ siuⁿ kòng ho͘ phòa, hi-seng ka-kī siū thoa-bôa.
15. 若是閣有一口氣， 堅持原則有是非， 通人聽甲心齊碎， 想欲作伙伴相隨。	15. Nā-sī koh ū chi̍t kháu khùi, Kian-chhî goân-chek ū sū-hui, thong lâng thiaⁿ kah sim chiâu chhùi, siūⁿ beh chò-hóe phōaⁿ sio-sûi.
16. 無恥政客真奸鬼， 白紙𪐞烏講食虧， 一支喙舌直直屁， 當作學生大kong 槌。	16. Bô thí chèng-kheh chin kan-kúi, Pe̍h chóa tò͘ o͘ kóng chia̍h-khui, chi̍t ki chhùi chi̍h ti̍t-ti̍t phùi, Tòng-chò ha̍k-seng tōa kong thûi.
17. 冠華按呢做伊去， 通人掠狂哮袂離， 激烈抗爭隨時起， 大人囝仔攏知機。	17. Koan-hôa án-ne chò i khì, Thong lâng lia̍h kông háu bē lī, Kek-lia̍t khòng-cheng sû-isî khí, Tōa-lâng gín-á lóng chai ki.
18. 虛情假仙賊頭面， 張伊袂爽轉目仁， 予人掠包無承認， 卸世卸眾人看輕。	18. Hi-chêng ké sian chha̍t-thâu bīn, Tiang i bē sóng choán ba̍k jîn, Hō͘ lâng lia̍h-pau bô sêng-jīn, Sià-sì-sià-chèng lâng khòaⁿ khin.
19. 學生無奈唱悲歌， 部長拗蠻若鱸鰻， 啥人害怹外口蹛， 婊囝叫做吳思華。	19. Ha̍k-seng bû-nāi chhiùⁿ pi-koa, Pō͘-tiúⁿ au ban ná lô͘-môa, Siáⁿ-lâng hāi in gōa-kháu tòa, Piáu-kiáⁿ kiò-chò Gô͘ Su-Hôa.
20. 學生理路有影好， 思華知影疶屎膏， 毋敢會議驚會倒， 串揣阿九賴賴趖。	20. Ha̍k-seng lí-lō͘ ū-iáⁿ hó, Su-Hôa chai-iáⁿ chhoah sái ko, m̄ káⁿ hōe-gī kiaⁿ ē tò, chhoàn chhōe A-káu lōa-lōa-sô.
21. 飼你袂輸食了米， 阿九吩咐ài堅持， 升官名單攏有你， 放心亂改免僥疑。	21. Chhī lí bē-su chia̍h liáu bí, A-káu hoan-hù ài kian-chhî, Seng-koaⁿ miâ-toaⁿ lóng ū lí, Hòng-sim loān kái bián giâu-gî.
22. 學生堅持無欲散， 要求委員ê名單， 歷史真相攏總換， 思想改造會畏寒。	22. Ha̍k-seng kian-chhî bô beh sòaⁿ, Iau-kiû úi-goân ê miâ-toaⁿ, Le̍k-sú chin-siòng lóng chóng ōaⁿ, Su-sióng kái-chō ē ùi-kôaⁿ.
23. 名單機密有限制， 若是公開有問題， 毋管按怎共伊罵， 攏是絕招激蠻皮。	23. Miâ-toaⁿ ki-bi̍t ū hān-chè, Nā sī kong khai ū būn tê, M̄-koán án-chóaⁿ kā i mē, Lóng sī cho̍at-chiau kek bân-phôe.
24. 冊本干焦改幾字， 絕對毋是共人欺， 毋管啥人無滿意， 多謝指教莫插伊。	24. Chheh-pún kan-taⁿ kái kúi jī, Choa̍t-tùi m̄ sī kā lâng khi, M̄-koán siáⁿ-lâng bô boán-ì, To-siā chí-kàu mài chhah i.
25. 會熱袂熱差一字， 意思無仝著知機， 欺騙社會若放屁， 這款道理世界奇。	25. Ē jia̍t bē jia̍t chha chi̍t jī, Ì-sù bô kâng tio̍h chai-ki, Khi-phiàn siā-hōe ná pàng-phùi, Chit khoán tō-lí sè-kài kî.
26. 面皮厚厚擋誠久， 奸鬼手段老師父， 問伊啥吶烏白舞， 講話跳針直直驢。	26. Bīn-phôe kāu kāu tòng chiâⁿ kú, kan-kúi chhiú-tōaⁿ lāu sai-hū, mn̄g i siâⁿ-ná o͘-pe̍h bú, kóng-ōe thiàu-chiam ti̍t-ti̍t lû
27. 王仔曉波做主委， 支那糞埽攪規堆， 痟狗看人就 仝吠， 學生聽了四淋垂。	27. Ông á Hiáu-pho chò chú-úi, Chi-ná pùn-sò͘ kiáu kui tui, Siáu-káu khòaⁿ lâng tō kâng pūi, ha̍k-seng thiaⁿ liáu sì-lâm-sôe.
28. 叫咱恬恬攏莫吵， 支那歷史加減加， 管恁袂爽怎樣罵， 堅心繼續扶膦脬。	28. Kiò lán tiām-tiām lóng mài chhá, Chi-ná le̍k-sú ke-kiám ka, Koán lín bē sóng cháiⁿ-iūⁿ mā, Kian-sim kè-sio̍k phô͘ lān-pha.
29. 專業袂合無干礙， 一切作怹去主裁， 講是逐家中國派， 台灣歷史毋免知。	29. Choan-gia̍p bē ha̍p bô kan-gāi, It-chhè chò in khì chú-chhâi, Kóng sī tāi-ke Tiong-kok phài, Tâi-oân le̍k-sú m̄-bián chai.
30. 乞食兵仔歹作伙， 癩哥垃圾愛烏西， 思想改造欲統制， 禁止母語第一個。	30. Khit-chia̍h peng-á pháiⁿ chò-hóe, Thài-ko lap-sap ài o͘-se, Su-sióng kái-chō beh thóng-chè, Kìm-chí bó-gí tē it ê.
31. 光復名義佔人地， 二八事件誠連回， 死萬偌人夭壽濟， 掩蓋事實無講che。	31. Kong-ho̍k bêng-gī chiàm lâng tē, Jī-pat sū-kiāⁿ chiâⁿ liân-hôe, sí bān gōa lâng iau-siū chē, Am-khàm sū-si̍t bô kóng che.
32. 這種代誌攏無寫， 佔人家伙做大爺， 法院怹開保狗命， 眾人共肏姦伊娘。	32. Chit chióng tāi-chì lóng bô siá, Chiàm lâng ke-hóe chò tōa-iâ, Hoat-īⁿ in khui pó káu miā, Chèng-lâng kā chhoh kàn-i-niâ.
33. 講到彼暗的情勢， 衝入教部無幾ê， 要求新本都愛退， 毒害囝孫出問題。	33. Kóng kàu hit àm ê chêng-sè, Chhiong-ji̍p Kà-pō͘ bô kúi ê, Iau-kiû sin pún to ài thè, to̍k-hāi kiáⁿ-sun chhut būn-tê.
34. 規个過程通公開，毋通痟想濫糝來， 橫霸獨裁一定敗， 臭賤漚步人人知。	34. Kui ê kòe-thêng thang kong-khai, m̄ thang siáu siūⁿ lām-sám lâi, hoâiⁿ-pà to̍k-chhâi it-tēng pāi, chhàu-chiān àu-pō͘ lâng-lâng chai.
35. 誰知警察無是非， 袂輸親像拄著鬼， 看見學生直直推， 台灣囝仔真克虧。	35. Siáⁿ chai kéng-chhat bô sī-hui, Bē-su chhin-chhiūⁿ tú tio̍h kúi, Khòaⁿ-kìⁿ ha̍k-seng ti̍t-ti̍t thui, Tâi-oân kiáⁿ á chin khek-khui.
36. 學生理性攏真乖， 警察心肝有影橫， 硬拖硬𨂾腫歪歪， 攏總掠去籠仔關。	36. Ha̍k-seng lí-sèng lóng chin koai, Kéng-chhat sim-koaⁿ ū-iáⁿ hoâiⁿ, Ngē thoa ngē làm chéng-oaiⁿ-oaiⁿ, Lóng-chóng lia̍h khì láng á koaiⁿ.
37. 學校教官來關心， 其實心肝若烏熊， 威脅監視就愛忍， 意志消磨大海沉。	37. Ha̍k-hāu kàu-koaⁿ lâi koan-sim, Kî-si̍t sim-koaⁿ nā o͘-hîm, Ui-hia̍p kàm-sī tō ài lím, Ì-chì siau-mô͘ tōa-hái tîm.
38. 老師恬恬分隔界 白色恐怖閣再來， 目屎干焦吞腹內， 相攬相抱聲聲哀。	38. Lāu-su tiām-tiām hun keh-kài, pe̍h-sek khióng-pò͘ koh chài lâi, ba̍k-sái kan-taⁿ thun pak-lāi, Sio lám saⁿ phō siaⁿ siaⁿ ai.
39. 向時烏道閣來亂， 社會議論攏共漩， 精牲白狗毋是款， 咱ê國家叫台灣。	39. Hiòng-sî o͘-tō koh lâi loān, Siā-hōe gī-lūn lóng kiōng soān, Cheng-seⁿ pe̍h-káu m̄-sī khoán, Lán ê kok-ka kiò Tâi-oân.
40. 歌仔暫時寫幾逝， 閣唸曷是無奈何， 毋願結果來講破， 看見學生受折磨。 2015/8/5-11	40. Koa-á chiām-sî siá kúi chōa, Koh liām a̍h-sī bô-ta-ôa, M̄-goān kiat-kó lâi kóng phòa, Khòaⁿ-kìⁿ ha̍k-seng siū chiat-bôa.

2025大罷免起鼓歌

2025大罷免起鼓歌       - 100 phā

這是罷免新時代，你我著愛徛出來，守護台灣的未來，民主自由咱主裁，

背骨藍委倒頭栽，中國獨裁跋落海，主權獨立數十載， 經濟實力人人知。

背骨藍委u-jú-sái，中國收賣真悲哀，敗害內政真厲害，毒死司法有安排。

所有預算剁了了，行政國防死蹺翹，健保年金真不妙，人口清洗後一招。

背骨藍委有算計，予咱選舉無後回，欲予台灣死徹底，自動投降做奴隸，

藍委上惡傅崑箕，所有立委攏聽伊，韓仔國瑜無法理，黄仔國昌無藥醫。

崑箕中国提博士，伊做立委咱齊輸，敗害內政烏-lut-lut，白蟻蛀柱地基趨。

文董敢是傅崑箕，結交支那真逆天，炒股中人全全利，貓鼠咬袋垃圾物。

下跤一捾無路用，利益倚靠做代先，陳仔玉珍歹衝衝，攢便武器使酷刑。

徐仔巧蕊上蓋破，不時中指提chhoaih磨，面皮káⁿ是貼砂紙，若無指甲定liù-chhoaⁿ。

葉仔元之孝男面，攏上電視做貴賓，欲做代誌走上緊，白領月給趁錢銀。

這是罷免的時代，台灣你我的所愛，少年老个攏總知，民主延續好未來。

這今毋是講凊彩，行行經濟聲聲哀，藍白立委ú-jú-sái，一下創東閣創西。

彼是心中有舖排，阿共串通人賣台，立法地方先予敗，經濟資源提去埋。

王仔鴻薇人人捌，開喙合喙攏白賊，一般民眾僫覺察，虛假資訊歹認捌。

我今毋是烏白講，心思若定著知通，台灣家己選總統，罵習近平會死亡。

香港經濟直直崩，支那白蟻食甲空，你今毋通做眠夢，中國倚來食鐵銅。

藍白立委的政策，離經譀古失道德，絕對毋是欲改革，中共背後咧撨摵。

柯仔志恩知看勢，痟想市長位通坐，私利優先才講話，八珍破格仝一家。

法案抽退彼是假，欲閃風頭等後回，消磨民心有暗計，接紲愈雄加萬倍。

翁仔曉玲上癩哥，黃帝思想真臭燥，欲食頓飯愛共討，藍白hoa̍h (伐）權伊咧gô。

消防預算嘛咧剁，野球著等拖咧揍，防疫英雄共拜託，藍白立委足狼毒。

羅仔智強顧人怨，規工食飽koh弄權，親像傀儡四界轉，民眾看kah心起煩。

徐仔欣瑩愈背骨，客家預算mā欲but，語言文化塗跤thut，這人夭壽koh孤𣮈。

賴仔士葆心肝bái，軍機預機全全刣，害死軍人講厲害，這人罷免合應該。

罷免窮實是拍共匪，藍白合作無是非，欲佮全台來作對，中共攻台心花開。

這是上尾的機會，若無覺醒會連回，全台民眾愛知尾，中共若來咱齊衰。

洪仔孟楷無斷奶，食飯愛人捧碗箸，商業祕密愛交伊，中共來抄好離離。

藍白先敗咱經濟，這事毋但第一回，張仔嘉郡惡徹底，農民補助剁kah無通提。

藍白預算烏白剁，影響的人一大chhok，接sòa引進支那族，健保破產失安樂。

這是上尾ê選舉，逐家毋通來憢疑，著愛覺醒愛知機，民主自由靠家己。

世界反共是趨勢，私有財產中共提，尊存過活彼是假，in ê囝兒美國生。

牛仔煦庭烏白變，體育預算攏無錢，台灣冠軍tèⁿ無見，狗傍虎威真無天。

魯仔明哲先提案，三大惡法無簡單，中央財政chhoah leh等，憲法法庭開庭難。

後擺罷免戶碇懸，藍白計劃直直亂，人民走傱怦怦喘，為著未來心操煩。

萬仔美玲無專業，有人質疑佗畢業，藝文預算真ân-siap，伊koh硬欲來剝削。

涂仔權吉大官威，唱聲民眾亂是非，驚人毋知伊共匪，引進支那咱克虧。

呂仔美玲捌烏西，四屆立委油洗洗，唆使sak人摔落地，即款立委咱會衰。

桃園原是好所在，藍白立委是廢材，著想島嶼kap後代，罷免連署逐家來。

邱仔若華嘛仝款，惦惦拍人使威權，蹔人袂輸刑人犯，予咱氣惱心規丸。

桃園六位藍立委， 催死台灣運命萎，親像地獄的魔鬼，吮食血骨積幾堆。

Koh來台中的罷免，仝款六位lóng tio̍h ián，納稅飼狗無人giàn，人民做主才順天。

福利減少予支那，生食無夠餓喙ta，藍白油水真gâu khà，街路抗爭行kah麻。

廖仔偉翔展鱸鰻，拍人功夫有才華，搶人功勞才來倚，無kā罷免歹收煞。

黃仔健豪無衛生，文化預算攏總清，交結支那車跋反，蹧躂台灣走代先。

羅仔廷瑋無路用，雙面刀鬼食雙爿，西瓜食濟定反症，藍黨家己罵袂停。

楊仔瓊瓔上譀古，作官上久好運途，質詢官員天無雨，予伊koh做塗塗塗。

顏仔寬恒靠老爸，媽祖金身嘛敢pheⁿ，偽造文書in上會，選這立委衰子弟。

江仔啟臣若赤鼠，船艦預算若窮屍，國防自衛放予去，這款官員食了米。

台中未來靠這擺，過年連署人人知，想欲改變救後代，即刻行動趕緊來。

台北李仔秀彥有致蔭，政治世家厝框金，in厝好空咱吐忍，攪擾內政島嶼沈。

新竹鄭仔正鈐濟身份，統戰利用上齊勻，官員滲透真省本，降低國防袂堅韌。

羅仔明才是烏道，伊父犯罪四界逃，八屆立委無做好，歹人掌權咱袂和。

立委立法為利益，藍白過半佔多席，預算剁甲千百憶，行政司法面烏綠。

張仔智倫做內應。伊父慶忠上離經，外島醫療免錢用，台灣健保死代先。

林仔福德皮真粗，開會tuh龜真𠢕kô͘ⁿ，建商買皮偷偷渡，少年未來真無辜。

這是罷免的時代，氣勢十足通人知，民主守護趁這擺，政治清明咱催排。

丁仔學忠傷假痟，人欲罷免tèⁿ á-chhiâu，共人khióng-hat上會曉，倚靠共仔無別招。

謝仔衣鳳poa̍h心機，會曉看勢閣看時，會軁會鑽無人比，投資媒體换八字。

三代做官地方chāi，惦惦食人這較害，in咧做頭gâu使派，替in好額戇大呆。

毋通繳稅飼內奸，判斷共匪無困難，台灣經濟袂han慢，共仔若來咱袂堪。

藍白鬼計敗內政，tng-tán咱人看袂明，聽著政治心肝冷，時到智覺萬世窮。

彼日地殼有各樣，敢是地牛咧pê chiōⁿ，龍王受氣海水漲，四界倒厝倒圍牆。

馬仔文君大áng-láng，佔地起厝上內行，國防機密總放送，即款立委若屎蟲。

南投游顥跋歹筊，掠準人民無明瞭，清洗人口放毒料，白蟻生湠真oh撨。

林仔思銘雄鬼鬼，醫護預算全全廢，防疫工課若死水，中共看甲心花開。

講是律師喙笑破，逃税予掠真搬，是非顛倒一大捾，這人轉去睏針山。

預算剁甲亂糟糟，通人著災四界投，藍白濫糝食夠夠，決心欲做中国猴。

分區立委攏總罷，毋通親像一支柴，若無行動干焦罵，最後尊嚴伊攏捎。

黃仔國昌一支喙，牽狗七隻展王威，心理有病垃圾鬼，不時喊人若敲雷。

八隻惡狗無分區，蚵仔入監名聲chhu，倚藍 繼續烏白舞，跤頭軟荏真gâu khû。

吳仔春城人thái-ko，提漚梨仔換仙桃，予人發現緊自保，白賊講濟緊thian-tho̍h。

罷免親像leh反共，佬仔賣台無天良，世人目睭金金相，為著後代著自強。

中共刁持kā咱亂，吩咐藍白敗五權，後擺選舉袂當選，利益分配早備全。

林仔沛祥臭kāⁿ-kāⁿ，交通預算嘛咧châⁿ，人講歹人無在膽，看人動員出來âⁿ。

陳仔超明興烏西，提錢交保激粗皮，立委做到七十歲，作歹地方誤子弟。

黃仔建賓知軁鑽，是非道德無teh問，看著好空跤就軟，上大才調去顧門。

邱仔鎮軍使鱸鰻，拍人跋筊袂拖沙，烏道背景人nóa-chhóa，趕緊罷免毋通拖。

預算毋知刣偌濟，到今猶原閣執迷，人民合作徛做伙，維護民主無挨推。

陳仔昭姿背骨人，看著利益目睭紅，過去道德攏總放，行毋知路菁仔欉。

麥仔玉珍愛强辯，支持統一看現現，偷渡水果閣欲展，有這立委咱了然。

張仔啓楷無路用，出一支喙綴虎狼，屑仔想欲做主將，頭前閣有黃國昌。

黃仔珊珊激恬恬，為著利益毋敢嫌，勢面無好會知閃，落尾名聲平平沈。

林仔國成原本親民黨，中國奶水直直phóng，打擊國防烏白創，草仔覺醒無認同。

林仔憶君腦慢純，國防機密拆齊勻，對敵來拍較在穩，國會內奸無單純。

講這八隻若惡狗，毋是我人有較gâu，藍白食咱有影夠，這款立委毋通留。

成功罷免若六位，國會過半通解危，台灣民主有活水，中國勢力定會ui。

罷免若是無成功，健保破產絕對pōng，選舉制度會死亡，經濟會扯無國防。

這是有影有代誌，香港的例無僥疑，著愛思考照甲子，時機若過後悔遲。

民主制度有較lám，為著未來咱承擔，罷免親像咧拜懺，保護國家清lâ-sâm。

這款代誌講袂了，親像柯文哲真khò͘-siâu，烏西食錢真會曉，今予chang--著袂làng-liâu。

民眾黨員攏是草，愛chèⁿ無理真愛áu，身邊像這緊來走，穢著會衰到年tau。

蘇仔清泉謝龍介，這人惡甲通人知，毋通罷免免掛礙，著照計劃步步來。

藍白chhōa頭朱立倫，歷史記載會收存，giú傅總召致病損，國仔民桶死齊勻。

歌仔到今欲chhé-pái，都合制限你我知，改革行動無凊彩，彼是為著咱將來。

這是罷免新時代，親中官員giú落來，民主地基才會chāi，即刻行動護全台。

歷史見證你我知，世界圍中欲共sai，川普手路真實在，咱著看清bo̍k chhi-gâi。

一邊一國是事實，二七五八直tú直，死chèⁿ kah put-tap-put-chhit，扭曲是非咱著thi̍t。

台灣人民著看清，獨裁政治無光明，佬仔立委愛kă反，社會進步好前程。

罷免行動無làng-tn̄g，迵過烏夜欲天光，堅韌意志無落軟，你我鬥陣守家園。

十殿閻君--呂柳仙版 （筆錄）

（*感謝周定邦潘科元老師有指正。內底可能koh有têng-tâⁿ ê só͘-chai，he是小弟我ê 問題，愛去耳科掛號。筆錄ê目地是向望有濟濟人來聽kah chim-chiok ê，mā是hō͘我學習ê機會，認捌家己母語。）

唱：呂柳仙       曲：十殿閻君  

1.             本境城隍佮土地，做好做pháiⁿ先知機，土地nā知欲繳旨，敢to̍h交予善惡司。(過板)

2.            有人做惡當作善，守善犯惡薄tio̍h掀ah，黑無雙差kōaⁿ鐵鍊，tit欲掠來地獄受可憐。

3.            黑白（hek-pe̍k）無常ah烏白（o͘-pe̍h）面，暗查察視佮精神，判官小鬼行鬥陣，tih欲查斷（chhâ-toàn）陽間盡忠人（i-î-i）。(過板)

4.            十八地獄è分善惡lī，勸lín m̄-thang做惡毒ah，好心好行（hēng）天（thian）送福，歹心終世著勞碌lī。（i-î-i）

5.            牛頭馬面ah二將軍，iā有日夜雙遊巡na ah，凌霄寶殿問一睏，nā-ká東獄善惡koh-chài分。

6.            十殿閻君(過板)罰罪嚴，好心好行再加添，陰間定（tēng）數袂走閃，好的無人敢犯嫌（hōan-hiâm）。

7.            威靈顯赫ah(過板)酆都(Hong-to͘ )帝，馬面將軍ah手來gia̍h叉 è e ē，善惡查察nā詳細，欲除歹心幾千个è e ē。(過板)

8.            威靈顯赫你nā問清楚，做歹毒心è罪難逃(過板)，tō koh灶君面前先畫號，掠來十殿見閻羅。

9.            頭殿閻君(過板)是秦廣（chîn-kóng），（雜唸）正的頭關ê閻王，陰府地獄闊bóng-bóng，直kah陽間不相同。

10.         秦廣tòa tī 頭殿內，頭殿一个逆（ge̍k）鏡台，在生陽間nā做pháiⁿ，hit鏡去照ta̍k項知。(過板)

11.           後母苦毒前人囝，奸拐弄散人親晟，死落陰間著háu疼，帳簿khiā tī頭一名。

12.          過來一款可憐代，一个查某人害死狗仔栽，因為一隻狗chǹg入chàu-khang內，煮食無kā趕出來。

13.          一隻狗母有身五隻囝，無kā伊趕出來火tō hiâⁿ，狗母m̄ 願去告孽鏡，tit欲判斷查某乎lín逐家聽leh。(過板)

14.          五隻狗栽被伊害，閻君判斷來投胎，來投冤主pak-tó͘內，nā生囝狗母才去搶（chhiúⁿ）請（chhéng）花栽。

15.          狗仔囝出世隨時死，冤冤相報來害伊，閻君判斷照情理，hit-ê查某才koh落血池。(過板) （i-î-ī…）

16.          二殿閻君是楚江，設起刑具除萬人，在生nā有罪萬項，勸恁逐家sian毋通。

17.          在生不孝序大人，掠來去二殿kòng腳筒，忤逆父母罪kài重，tio̍h koh燒烌研末（géng-bo̍ah）過（kè）塗礱thô͘-lâng。(過板)

18.          不孝老父kah老母，lia̍h ká二殿罪難逃，tiāⁿ-tio̍h應該萬刀剉，燒灰研末（géng-bo̍ah）過疏籮（soe-lô）。

19.          第三殿閻君是宋帝(過板)，馬面將軍手gia̍h叉，善惡查察nā詳細，欲除歹心幾千个。

20.        在生強佔人牽手，lia̍h來去三殿phah目chiu，也是tiàm tī leh做chián-liú (扒手的意思)，tio̍h-koh剝皮骨頭髓teh抽，

21.          奸拐有翁人查某，lia̍h ká三殿nǹg火箍（hé-kho͘），tiāⁿ-tio̍h剖腹抽腸肚，落做四腿上（chiūⁿ）差途 chheng-kô͘ ？。

22.         第四殿閻君是五官，枉死長城百長（tn̂g）懸，內面枉死káng萬款，哀怨無塊哭申冤nah。

23.         在生有人tih phah鳥，不時鳥鎗phāiⁿ tiâu tiâu，掠kàu四殿抱銅柱，hō͘火（hé）燒kàu翹翹翹，（過版）

24.         無天無良chián人kiáu，nā無keng罰罪袂消，kàu四殿衫褲剝了了，iā-tio̍h刑罰龍蝦tiau。

25.         第五殿閻君是森羅，勸lín歹心m̄-thang學，在生歹心è萬刀銼ah，lia̍h kàu五殿過géng-chô，

26.         森羅（sim-lô）tòa-tī五殿內，五殿一个chit lō望鄉台，看tio̍h囝孫流目屎，肉（he̍k）身朽爛（hiú-nōa）袂koh來。

27.         九升騙人作一斗，失人尺寸減秤頭，nā無公道秤kah kàu，掠去五殿kòng火刀（hé-tau？），kòng kah鼻血雙港流。

28.         六殿閻君游汴城（piān-siâⁿ），鬼門關ò͘刑具thong人驚，歹心nā死tio̍h哮疼，好心金童玉女迎 （giâ）。

29.         在生強佔人家伙（ke-hé），掠到（kàu）六殿落油鍋，nā無keng罰罪袂過，應該to̍h koh先剝皮，

30.         Ah nā無尪ê查某hiâu客兄，小鬼鐵鍊鍊leh行，來kàu六殿落油鼎，án-ne刑具看恁驚m̄驚，（過版）

31.          查甫無某hiâu伙計（hé-kì），chhan-chhiūⁿ chit款反悔遲，lia̍h kàu六殿受凌遲，抱chāi銅柱割喙舌。（i-î-ī…）

32.         第七殿閻君是泰山，泰山刑人真粗殘，好心來看驚kàu瘦，歹心來看心不安，

33.          做人序小不受制，欺善怕惡愛冤家，掠kàu衫褲脫theh-theh，抱在（phō-chāi）銅柱kè（過）五叉，

34.         一身血流kāng血滴，胸前鐵叉四五支，tiàm tī leh刑具無捨施，chiah-koh狼牙野獸koh分屍，（i-î-ī…）

35.          在生翁某kâng拐散，媳婦不孝大家官，後pái nā死m̄-bián看，來kàu七殿過刀山。

36.          八殿閻羅是平正，創造（chhòng-chō ）馬車真正經，歹心拖落馬車géng，閻君判斷求無情ah，

37.          廟內尼姑偷生囝，食菜無清討客兄，閻君判斷nā知影，過八殿ê虎頭城，

38.          有人奸貪kah khau詐，唆使（so-sú）人冤家有cheng-chha，弄（lōng）人生死hut-kòng-phah，to̍h過八殿虎頭鍘，

39.          查甫查某nā來愛學話，掠kàu八殿割嘴phóe，害人生死kài重罪，tio̍h-koh舂臼（cheng-khū）舂人kôe / kê（肉醬 ；將儂舂做肉醬，像 ke5/kue5）。（過版）

40.        第九殿閻君是都市，註福註祿無差疑，好心ê人khùiⁿ-oa̍h死，歹心陰間koh凌遲，

41.           在生查某真骯爁（àng-láng），通姦害死伊親翁，通姦害夫罪kài重，tio̍h koh thǹg衫thǹg褲phū煙筒。 （*ang3-lang2 也講 ang2-lang2一般个解說是：「脾氣bai2無通人情；快受氣無分是非。」但是伊佇遮个意思較倚「惡毒」。）

42.         有人專門放重利，lia̍h ká九殿伊tō知，nā kah九殿ê所在，燒烌研末過米篩（thai）。

43.         十殿閻羅是轉魂，轉魂車台鬧紛紛，查甫查某規大群，倭倭擠擠（oe-oe-koeh-koeh）領關文，

44.         轉魂車台六條空，頭條二（jī）條出世人，三條豬（tu）狗水牛（súi-gû）犅（káng），四格鳥隻釣魚翁，

45.         落來一款第五格，出世降做魚kāng蝦，第六一空魂khah低，出世蠓蟲做thô͘-keh / kê（？土壤下層/ 下層土壤）。

46.         查甫查某規大陣，倭倭擠擠來領憑，出世做人袂要緊，出世精牲khiok kài可憐ò͘，

47.         歹心m̄予伊分世，一人kā分一領皮（phê），出世做人tit家伙，出世精牲khioh phun-môe / bê，

48.         在生nā姦拐人ê翁，出世做婊來óa-hâng （倚行），the̍h人ê錢兼放港，tio̍h koh出世雞母siâⁿ雞公，

49.         在生tih開khaⁿ-á-keng (妓男戶的意思)，轉魂出世做母形，有的（ū--ê）謀（bio ？）財害人命，tio̍h賜你乞食萬代窮，

50.         一款查某做淫婦，出世鴨母壁腳khu，hō͘伊有生bô-thang孵（pū），身邊不時mā有丈夫，

51.          查甫nā愛用查某人，轉魂出世做雞公，不時雞母thang戲弄，免錢thiòng--leh 歸世人。

Hǒng 拍交落ê詩人

傳統m̄是1項 ē-tàng繼承ê遺產，ká-sú你nā欲得，tō愛hē功夫。Siáⁿ-mih是傳統？伊ài有歷史內涵ê意識。欲有意識ài先有歷史認捌，m̄-nā kan-taⁿ看過去，mā思考未來。Che是超脫時間、空間ê制限，mā是kah時間、空間kap作伙ê意識。--艾略特 (T.S. Eliot, 1888~1965)

咱的確有濟濟疑問。咱tō愛行--落-去，為欲cháu-chhōe chia ê答案。

傳統？咱社會éng-éng lóng袂去好好思考傳統對咱ê記持情感，koh愈袂講袂去進行思考kap反省。落尾，tian-tó歹ê傳統留一堆，好ê袂赴tn̂g--落-來，直直造成「傳統」kap「現代」ê對立kap phì-siùⁿ。不管古蹟保存，母語復振kap宗教傳統…等等咱lóng thang看tio̍h，「資本家」用hit lō「經濟」ê nôa-thâu維護in ê正當性。Che是in無理解ê「傳統」ê內涵，窮實是1種權力者ê手段，hiau-hēng ê是濟濟人m̄願去tháu ê結。

古早唸歌是生活ê 1 部份，講是生活ê趣味á好，gī-niū，甚至是藝術，文化精神kap教育來源，che nā了解hō͘你袂當袂承認--chit。Siáⁿ-mih是唸歌？He是我2014 hit年世界母語日佇台南政大冊局我拄著周定邦兄才知--ê。Hit時我mā拄leh開始寫台文，一開始就是寫七字仔鬥句，寫ê時lóng真自然，he是因為細漢tō捌聽過，soah m̄知he tō是唸歌。Tī 2016年捌去kap定邦兄學琴幾個月，落尾去荷蘭做khang-khòe半冬，2017年轉來koh繼續。我寫讀台文chit四冬來lóng無停，七字仔mā仝款，創作方面有leh寫khah短篇ê歌仔，我kan-taⁿ hèng niâ，會唱袂唱--è，hoān-sè koh lóng ài si-á-geh--chi̍t-ē。Tī學「說唱」ê過程，咱認捌chiâⁿ濟歌á仙，mā愈認捌定邦兄。定邦兄捌策劃2014年出版ê《台灣民間文學有聲書》，che是有影真大ê本等。Chit套冊內底lóng是過去真有名ê唸歌sian kap當代--ê，咱毋免佇chia 1个á 1个點名，在咱說唱巢內，che絕對袂koh有ê「經典」ah。Khioh-khí過去日人時代出版ê歌謠、七字仔kap諺語lia̍h gōa，che有影是台語文學出版ê大代誌。「大代誌」che有人tiāⁿ-tio̍h會看無目地，che咱真知，mā袂致意。Chit khàm店好食無？無食過人，siōng愛評論。Chia ê文本tō是siōng好ê例。

我真認同頂懸艾略特所講ê話。佇chia來驗證，內底編輯用字漢羅對照、註解lóng真完整，而且koh有聲音來配。咱nā欲學習，甚至欲做文學研究á是語言學研究lóng ē-sái。Koh有ê是內底濟濟真gió-toh ê台語詞，咱nā直直kō͘ hit lō「華語」借詞，敢袂失去台語語格？Á是tiau-ì-kò͘選擇性ê「傳統」？Mā thang講濟濟人心內ê「傳統」tō是舊ê老ê。總--是，舊kap老是人主觀用「時間點」來講，soah m̄知佇綴任何物件無了解前進，窮實，chia ê物件lóng是新--ê。所致，咱無意識，tiau-ì-kò͘直直kā家己ê寶tàn-thó-kak，phah交落。

詩人？定意koh是siáⁿ？我寫4冬ê詩，時間無算長。有時寫寫leh，the̍h月琴唸chi̍t-ē-á歌，看咱ê現代詩á是七字仔，koh對照chia ê唸歌sian，lóng會憢疑咱敢是詩人？天差地leh。歌仔仙有gōa濟人有編歌ê法度，即興編歌隨唱，唱thàu聽眾ê心聲，kā 生活lóng溶入去歌聲。咱想像時光背景倒轉，chia ê歌詩kám m̄是in詩人siōng好ê kan-chèng？是án-chóaⁿ加「現代」ê詩tō是詩，長篇七字仔袂當是史詩á是小說？講hia舞弄文仔奇巧ê才是詩人？

咱欲kā 交落ê khioh--轉-來，kā歷史ê空縫that--khí-lâi，koh ài jiok時代ê變遷，有影thiám，尤其佇chit條少人行ê路。定邦兄koh策劃1本《歌詩傳奇-台灣唸歌傳人身影採集》今年6--月出版，份量無比《台灣民間文學有聲書》khah大，精差是有濟濟古早唸歌背景ê紹介kap進前出現過ê歌á sian ê歷史增補。總--是，內底koh是一寡你知我知ê人影。Chia ê「遺產」，到底有gōa濟人願意hē功夫khioh，hō͘ in新ê生命，跳脫人tùi「傳統」ê井底思維leh？

2017/9/16