https://www.portfoliovisualizer.com/
http://moneychimp.com/
這有影是救世。
不過，愛有讀過冊，看有英文才知按怎用。
有工具，愛去學，大膽去試，相信數學，相信紀律！
2022年7月5日 星期二
2022股市大落著災
2022過一半就落-21%，國安基金敢會入場？
目前的狀況敢會繼續落？
照過去歷史，隔年回轉的機率真懸。
不二過，回轉的速度可能無遐緊，咱敢有法度擋hiah久。有耐性才有法度複利效應。
有時真正毋通家己嚇驚家己。
是講目前國際局勢俄烏狀況、疫情、通彭加起來，敢一定袂崩？落30%，40%？
咱是長期投資。這是真好的考驗！
閣一點，阿共仔敢會拍過來？
年底選情會閣按怎變化？
總講一句，先準備好勢！無論心理抑是生理，預防烏天鵝。
學習後，投資後就欲liam-pinn看著成果？
敢有hiah好空？趁這時陣，讀寡冊，整理一寡清單、筆記，莫看盤，心肝會較清鬆。
2022年6月15日 星期三
投資期限
共咱的投資時間分拆起來，累積期佮退休期。這真分明，好理解，咱會使活偌久，幾歲欲退休，愛用偌濟錢，儉偌濟？
這攏通算出來。
這重點有幾个增加投資率，較早投資掠外，就是提懸收入，降低支出。這才是源頭。
收入-支出=現金儉底+逐月/逐冬投資。這是基本數學。
逐冬記數較免無細膩烏白開，掠數嘛較準，自動化記數減少理財時間。
綠角的有2門課，分別是leh講這2階段。非常建議去上。對「投資市場」的分析，會有真緊的理解。
總是投資以外的代誌，增加收入，提升家己的才調、儉錢、欲用偌濟、記數的鋩角彼是你家己的代誌。
下跤即个表，做基礎。分3項，逐冬投資收入30%、現金5%佮目前投資總資產，算出20冬投資後會有偌濟總資產。
收入、支出、儉錢這三項是對等的，愛先做，濟濟人這關無法度實際執行。
繼續投入、參與是另一个重點。
以這來看，你就愛知你離退休有偌遠，目前的收入是毋是愛想辨法改善？
像我來講，逐冬曾加月給2%是真重要的，20冬內會維持家己的技巧，袂當有負評。
不過，你現此時的部門，敢有人做到60歲以上？平均歲數是偌濟？工課未來變化咧？
投資是一件代誌，維持自身的競爭力才是真正的重點。
位這表來看，40歲，20冬的投資到60歲，就差不多有2900萬。2900萬繼續投資，配合股債分配 ( 綠角退休課程)佮其它策略，用40冬是足量冗的，失敗率是0%，而且會使過予囝孫。
2022年6月14日 星期二
《小錢滾成大財富》儲蓄率試算
《小錢滾成大財富》儲蓄率試算，p162頁。
以10冬，收入100000 ($)，逐冬增加2%。
檢驗年報酬率佮儲蓄率的關係。
結論: 提懸儲蓄率較好向望投資報酬率。
儲蓄率是你會使控制的。
投資報酬率愛配合股債分配，欲12%是真困難。機率真低。
另一點，收入逐冬增加2%，是向望共通膨抵消，意思就是講月給逐冬愛增加2%。所致，無論如何愛爭取加薪。
佇累積期，增加收入增加儲蓄率，繼續投資才有較大的複利效應。
欲投資，先趁錢、儉錢這是第一步。了解市場、心理，投資工具…這才是第二步。
位這會使推算，投資10、20冬累積偌濟，逐個月愛提偌濟去投資，幾歲退休有偌濟錢 ( 加上現金+已經投資的總資產)
2022年5月27日 星期五
投資十大的芒角
所有投資十大的芒角攏佇chia。
1. 減少支出。
2. 增加基本收入。
3. 收入-支出 = 增加儉底。
4. 增加多元的收入。 (投資)
4. 投資指數股票+股債平un5。
5. 記數。
6. 時間複利。利車母母車利。
7. 想辨法維持長期總資本成長。
8. 延長基本收入的時間。
9. 縮短大量支出的時間。
10.學習使用excel，基本數學計算家己的資本佮圖表。
增加收入。即幾冬咱投稿、投文學獎，投資股票收股利出借股票…攏是。總--是，一開始咱是興趣，就算毋是興趣，嘛是感覺去一試一下看māi，有時是心適有時是壓力起引…落尾變興趣，興趣一做久，就想欲捌較濟，較深，彼時就變專業ah。
講著興趣，咱到底是愛先有興趣，才去做？抑是先做了，興趣才慢慢仔有？
為增加收入前，愛先顧本，學習是基本力。知影學習趨勢，就袂失去耐性。知影技奇的效期，提醒咱毋通死執孤一技術食穿。佇現此時真oh生存。創業嘛仝款。未來像小野二郎的case會愈來愈少。
2021年12月16日 星期四
按怎使用excel，掠股票現此時價數？
咱最近有leh使用python，來追縱股票行情。這基本上是leh練coding功夫。
前站仔，有去上綠角的課，伊的excel表嘛真好用。不而過，有幾支股票，咱欲欲加加袂入。
伊紹介老夫子使用iqy的方法，咱試半工外，才想著這原始網頁設計已經改變，內底的iqy內容無符合咱資料使用，這佮python crawl遇著的情形真仝。
總是，咱閣發現愈簡單的方法是掠股票的價數！就是使用excel的預設功能。免幾秒就設定好勢好勢。是講，無上市的上櫃股票掠袂著。
2021年4月22日 星期四
申請firstrade
欲申請美股firtrade買 ETF真簡單，主要是免手費。 就比人的成本低足濟，平平是買仝一支股票，是án-chóaⁿ mài揣he khah俗ê管道買 leh。
第一步，先攢護照圖像kap手機á khǹg tī身邊。網路填表免半點鐘就處理好勢！
通過差不多三工時間。
匯美金，通常隔工隨到，mā隨會當買賣，匯金手續費差不多18-20 kho͘美金。
已經操作二kái，真順序。
第二步，就是上傳所需要的文件，同意書kap W8BEN。一定ài 傳，無，可能會有稅金問題。
三冬才重傳一擺。
股息koh投資，才會有複利ê效果。
股債分配才通降低風險。
指數型股票是穩穩á趁上好ê工具！
長期投資、定期股債牽扯勻平，落低追加是投資心法，做起來真oh，堅持無簡單。
2021年4月1日 星期四
退休kap投資頭先ài知ê代誌
想欲過好日，早退休，有錢完成家己ê夢想。真可能ài（金錢）投資。
當然，mā tio̍h先顧腹肚，才有chia ê討論。Nā欲投資，ē-kha真濟代誌m̄-thang去做。
1．聽人講明牌。
2．不時出入市場。
3．買非指數型ê基金kap股票。
4．買保險型基金投資保單。
5．無認捌家己ê支出、收入狀況。
欲做ê代誌，
1．買指數投資，長期la̍k牢。
2．每冬看一擺，調整。
3．知影家己支出、收入狀況。Koh
kap設想未來支出比較。
進一步理解投資理論、風險管理，投資工具，投資心理/情緒管理，投資歷史，資產配置…等等。
支出、收入狀況應該每冬無啥仝款，可能10冬leh變化，尤其有gín-á。
所致ài有一張表也是清單來檢查。根據每冬ê收入、支出狀況，thang畫一張現金流圖，thang假設可能退休ê時間，kap應該投資ê金額、應該ài有ê利率。
講起來lóng真簡單，做起來需要勇氣，kap時間好好á思考。
若無喟力，上無頂頭ê代誌ài ē記，有啥mài做，有啥一定ài做。Án-ne應該袂差人太濟。
若欲進一步閱讀，thang看chia ê冊單。逐本看2擺以上，想辨法內化兼執行。當然，he需要寡時間，koh ài自律。Che lóng是學習，無學習袂進步，袂進就是退步。欲退休，手頭ê錢kám thang kap咱平常ê生活品質hiah濟？
2021年2月16日 星期二
〈投資冊單〉
〈投資冊單〉
咱40ah，咱趁放假ê時緊kā一寡代誌整理，回顧，kap重新規劃，是欲為tio̍h人生後半場40歲。
咱真濟過去做無夠好--ê，欠缺自律，欠缺知識lóng盡量徹底反省。人ê喟力總是有限。現此時，思考是siōng好ê時陣。
退休，是咱這年假思考siōng濟ê代誌。咱2020年前陣á mā開袂少工思考，過去學校無人教，咱人koh pîn-tōaⁿ，無hit lō意識，致使才慢開始致意金錢chit項代誌。
這三本冊《金錢超思考》，《慢慢致富》、《當代財經大師的理財通識課》是仝一人寫--ê，手法真簡單，無困難ê數學，是siâⁿ好ê理財基礎智識。真拄好，chia三本綠角都lóng推薦寫序。咱māán-ne重新檢查收入、支出、所有ê保險，計算投資風險kap可能退休ê年歲。
Khêng-si̍t，這lóng是基本數學niâ，mā開咱袂少時間來回測度，siōng重要ê是自我要求。A̍h nā講tio̍h自我要求，另外三本冊《有錢人想的和你不一樣》、《為什麼他們擁有億萬財富》、《有錢人與你的差距，不只是錢》，就thang解釋siáⁿ是自我要求。咱若欲一本讀，讀《有錢人想的和你不一樣》就好ah。
另外一本《花掉的錢都會自己流回來》予咱理解「投資」ê概念，簡單ê道理無簡單，án-chóaⁿ用錢比《金錢超思考》講koh-khah幼路，mā真推薦。
Chia ê冊是基本概念，今，40歲重新學起。接sóa落來，就有法度認捌án-chóaⁿ實際操作。
另《上流老人》chit本冊是日本人寫--ê，就ká-ná是寫予退休生活ê《斷捨離》，khah óa心靈層次方面。40歲離退休koh真遠，我想應該ài佇投資理財khah積極khah tio̍h。總--是，有時錢項歹控制，咱tio̍h ài控制kap理解咱ê心靈。
欲較早退休、成做自由人敢有hiah簡單？
這ài實際操作kap學習，咱koh知綠角推薦另外一个人寫ê三本冊《定期定值投資策略》、《智慧型資產配置》、《投資金律》，chit三本真燒頭殼。
總--是，錢敢有hiah好趁？
“你開佇玻瑰ê時間有gōa濟，伊就開gōa súi” 。--小王子。
咱40ah，chín開始好好裁，應該有法度栽出一蕊真súi ê玫瑰。
寫che mā真向望，想欲做社會運動ê熱情ê TG人，趁錢渡三頓lia̍h外，知影chia ê知識kap常識。
Nā有心適，mā真歡迎saⁿ-kap研究。
整理冊櫃時，簡單幾字記錄，khêng-si̍t lóng khǹg tī塗kha，ǹg-bāng以後有法度換一間khah大間ê冊房來tūn chia ê冊。XD 。
訂閱：
文章 (Atom)