咱今年年初跤tau開始列一寡原則，到今有188項。
今仔日，小寡分類。心態上濟項，接soa是溝通，報告。
上少項的無代表較無重要，顛倒是愈簡單做愈hong人袂記，掠準無重要，choann-a放予去。
有一寡奇巧，佮一寡咱無知影的撇步攏是咱去讀冊，抑是經過足濟事件才致覺愛去chim-chiok的。
寫起來凡勢真簡單，欲做甲到就需要時間。
2022年10月26日 星期三
我無準備投降
〈我無準備投降〉
我無準備投降
無準備沿咱的土地看橫霸的銃火
起酒痟講無臭無潲的祖國論
日子綴遠兜飛來的戰機拗做對半
時鐘的秤花共疏開的線路踏甲死死
我毋是期待死亡的人
這蘋果佇路--裡食是你替我準備的
傷心的甘甜抵抗虛無的驚惶
這防線位窗仔搝--開
非法的雲入來靠岸擋牢命運的行向
前幾工買的卵雄雄予我想起
炸碎的家閣有咱睏足落眠的囡仔
彼時我閣認袂清轉去的路
一直到看到玫瑰的指引
花葉散散掖掖親像一場惡夢
袂記看氣象袂赴準備傘
就予雨洗清厭siān的身軀
天使會使揣著閣較挹貼的所在
閃避烏暗法西斯的語法
飛向較自由的國度
我無準備投降無準備告別
歷史的大軍猶未召集
啥人拒絕明仔載的日頭光
預備信仰成做笑詼
我無準備投降
恬恬聽候對敵替死亡鬥句
認捌人類戇愚的現實
2022年10月23日 星期日
心得--《窮查理的普通常識》+《投資哲人查理蒙格傳》
想欲成功？想欲好額？想欲做社會運動？
先共家己的頭殼，知識閣有工具chhoân好、定練習，練予齊。
時間會予你回報，伊是你的好朋友，設使你好好對待伊。
讀查理蒙格ê書，有真濟概念，像多元心智模型、能力圈、檢查清單、自我學習/自我批判、跨領域，逆向思考，數學思維，情緒穩定…。如《超級思維》、《跨能致勝》、《全球人才搶著學密涅瓦的思考習慣訓練》…等等。
Chia ê主題，事實上，袂少冊攏揣會著 ，而且koh有實際ê步驟去執行。
為啥物koh愛讀查理蒙格ê自傳leh？
Chia的成就是伊人生的過程中tauh-tauh-a粒積落來--ê，所有的智慧攏thau出來予逐家看。
親像不時摘愛因斯坦講ê，「一件代誌愛盡量簡單，總—是，袂使過頭簡單。」
你袂講欲理解一个人，煞問看覓敢有「懶人包」?
若伊講ê，人攏想欲緊好額，緊學習變天才，代誌若hiah「簡單、容易」?按呢逐家攏是天才，有錢人ah，敢毋是？
這就是為啥物智慧hiah-nih難得，愈簡單的代誌，煞愈無人願意好好去執行、長期e執行。
有拍拚過，實際做過才會記持，才會是有效的學習。
雖bong，冊無hiah好讀，心得毋是真好thuh，是講比雷柏塔e冊好讀ah XD。冊尾tiau工，有講著「論老年」來結尾，袂輸是leh共家己講的，佇人生的後期猶原欲貢hian 伊的文化資產-智慧。
這毋是一般工具冊會使提供的。
咱有二點心得佮經驗，應該會使來分張一下。
第一：自我教育、學習。
咱是讀理工的，出社會已經15-6冬，2个 gin-a。
是講佇這16冬，無論工課、抑是生活的方面拄著的問題，濟濟是學校無教的。學校教的毋是綴袂著時代的，無就是基本是無夠額的。
何況，咱(早期)的教育攏欠缺思考的訓練。濟濟攏是愛靠拄著問題ah，家己才發現家己欠缺啥，才去學，無就是直接逃避。
冊中，伊舉樂可口可樂的例。展現伊共按呢分析問題的數步分拆，用數學的思維，顛倒思考，考慮人的心理，歷史的演變…幾十種箍仔的知識佮因素la做伙來做決策。
咱有按呢頂真的態度來對待咱上重要的決策無？敢有這才調？敢有知原理，就有法度應用佇無仝的狀況，即款徹理？
未來的教育需要啥？設使咱需要的知識抑是工具，猶袂去補，咱已經leh付出代價！無投資家己，就是一種人生風險。
欲求生存，想想未來救業市場，生活穩定性，敢有法度靠單一專業過活？
有認知家己的知識有破拍，無夠，閣願意學的話，彼算是較積極的。
這嘛是學習的第一步。
無透過自我學習，抑是去訂閱線頂課程，欲按怎得著上新的知識佮技巧？
咱嘛著認知學校教育趕袂著時代的變化，總--是，這現實無代表咱著愛放棄自我學習。
創造一个閱讀的環境予一代，做予後一代看。理查按呢做，咱leh？
佇咱的「階級」環境，學習抑是閱讀的風氣毋是足熱。
閱讀的層次範圍是束縛的。箍仔佮箍仔的分界明明明，無啥交插。
這就是會發生查理定講的鐵鎚人的現象。
窮實，咱的工課上問題分析、專案管理的技巧親像PDCA、smart 畫甘特圖，畫柏拉圖數據，分析良率，8D分析 ，SWOT分析，和root cause Finding ，3x5 why 等等技巧。
是講，早期咱攏無想過共這工程/專案技巧用佇生活。
知識就知識。為啥袂使合用？合用的好處是減少大腦的負擔。
Siang時，會使咱決策的品質提懸，時間的使用嘛變著有效率。
無建立一套心智模本，攏靠大腦自動反射，人生欲成長的速度可能佮時代的速度愈差愈遠。
建立家己的知識地圖，這就是查理所講的多元心智。這需要時間。認知家己才調的層次，tauh-tauh-a去加強，閣有補足家己思考的缺角，按呢減少人生的風險，堅韌，增加人生的可能性，增加成功的機率。
另一點是清單的好處。
這m̄-nā減少低階的錯誤，減少大腦的負擔。閣通佇每一擺成功抑是失敗，重新復盤，增加抑是修改清單的內容，按呢後擺成功的機率就通提懸，減少風險。
你若去看窮查理349頁下跤一張相片，內底有足濟鐵櫃，彼就是蒙格的思維模型資料庫。
今咱有閣較好的選擇。
最近一本真hang的冊《 防彈筆記法》，其中就有講著透過不斷的粒積任務清單的內容，利用電子筆記的好處，共咱人生的「任務」所需要的心智資源、原料、思考過程…攏分拆好勢。
逐工欲進步一點仔，可能感覺無啥。欲做，可能是痛苦的，需要堅心。學習的曲線是非線性的，短時間袂震袂動無代表未來無成長的可能。
學習袂反背你。愛會記，堅持本身就是hō͘-tēng，真懸ê hō͘-tēng。少人做會到。你若有法度hāⁿ過，你的層次就koh進一步。
濟濟欲成功的要素攏是反人性的。這是咱人的大腦生成就是按呢懶屍，愛食好輕可的穡頭。
前站仔讀冊會，咱分張咱使用清單閣有工課頂分析問題的方法予朋友，推薦使用仝款的工具佮思維佇咱人生的夢想，in攏笑笑。講按呢，ká-ná是機器人，無時間無空間通放lēng。
毋知這是毋是一種意識形態。總--是，這絕對是一種固定心態。
自我覺察是上困難的。
咱讀冊毋是看咱想欲看的，抑者是讀咱看有的部份。
摘查理費曼ê話，「第一原則你袂使騙家己，彼是家己上好騙的因端。」
摘凱因斯ê話，「新的觀念無困難，困難的是共舊的hìⁿ掉。」
認為家己上gau，無共意識放下，欲接受新的物是無可能的代誌。
所致，咱通共濟濟成長的責任sak予大腦，sak予運氣，sak予意識形態…，袂輸攏毋是家己主意的。
咱愛知巧的人上恐怖的毋是in真巧，背景真好，是in比一般人koh-khah認真。
咱敢有放予爛的勇氣？有系統性的批判家己，顛倒想袂成功的做法，有影會較清醒。
毋通干焦欲做輕可，數想趁大條的，無去tháu上歹tháu的結。欲解決問題，煞看袂清問題的本質。
學習上緊的撇步，就是寫一本冊。
理查即本冊就是真好的見本ah。
伊的精神導師講的，「設使無想欲死後hŏng放袂記，寫一寡值人讀的物件！設使袂曉寫，欲按怎？按呢你愛做寡值teh寫的代誌。」
（M̀, 緊來寫閱讀心得…準講咱毋知欲知啥才好…）
第二：[[情緒]]穩定、精神衛生。
設使你想欲創業，對方的才調真好，總是，情緒控制無好，你敢會佮伊合作？敢會錢猶袂趁著，伊就先翻頭倒咬你一喙。
知名以色列作家Yuval noah harari捌講21世紀未來人類上重要的技巧是情緒的穩定性、恢復力。位查理的自傳就知伊即方面做了真好，無論是面對第一擺婚姻抑是面對gin-a過往的苦痛，伊攏表現真沉穩。
查理講你無應該一件悲劇的發生，閣產生另一件悲劇。
人佮人之間仝理，顛倒想看覓，設使你看一件代誌無爽快，抑是看某物人無爽快，你會使留到明仔載，後日才去罵伊。
省落來的時間去做閣較重要的代誌。甚至你注心佇重要的事工的時，有可能放袂記去恨，去做出錯誤的行為。
是講按怎面對情緒無好，負面的人leh？
伊提出「精神衛生」這概念。勸咱愛走閃有意識形態，情緒偏執，閣有自憐、負面的人 。較免予咱的精神損盪，消磨咱的時間。
這佮《垃圾車法則》所講的真仝，人際關係的界線就愛守，毋通硬接別人的歹物件，嘛毋通直擲家己的去予別人接。
咱的氣力有限嘛真寶貴，咱嘛毋通怨嘆，聽好用humor的方式來thau放，毋通chhin-chhai chai落去情緒的深khenn，無--者，萬劫不復。
咱先共投資的技巧、知識khng一邊，想看覓咱家己是毋是上捷予情緒牽leh走？
《投資金律》四大原則其中之一就是心理因素。看盤直直沖，心肝ngiau錢直kiat，看盤落直直落，就含屎淚賣掉。不時人的一句話，氣身惱命，袂食袂睏，腦海湧來湧去搬武俠大戱，這攏毋是真好的人生投資。
即本冊較無「直接」的思維模型抑是清單講著這。所講的心理偏差，若無開時間去理解，一般真oh讀清楚。
《人慈》佮《超級思維》所講的上大尊重解說( Most respectful interpretation)，情境因素去同理對方，《轉念的力量》內底使用四个提問、一個反轉的概念使用起來應該會使閣較簡單。
情緒的覺察是真oh的。現此時，Google攏比咱理解咱家己。因為困難，做會到人就有法度比別人有成長的iā-kú-káⁿ。窮實，到尾，這攏是自我學習、自我認捌的過程。
七仔鬥八仔，2960字簡單心得，以上。
2022年10月3日 星期一
重耽
重耽
時間…敢有重耽？抑是重耽的是我？
人車來來去去，強欲交落的記持倒踏時間的跤步
揣我。位重慶南路一段穿迥地圖的磅空
無閒咧收集新世代的名詞閣有怹對應的色水
牢佇喙䫌的目屎開始洩漏字運的苦齣……
(我無意拆封時代無頭神的症頭
判決書頂的血跡猶原無停咧流
無沓無屑的敘事有枉屈的叫聲哼哼呻
夭壽死的青春必須重生、顯明歷史的喙空、
彈掉的靈魂佮消失的kha̋ng-pàng先搝轉來，修正臭頭臭面的批狀)
街仔路的番號是家鄉的思念
查封的厝宅認出我的跤步佮聲嗽
特別共時間的視線調遠，隔離黨國的經緯
剪裁想像後的高潮若沃一陣風颱雨
雨毋知當時停，不斷窒落來的烏雲數想改變青紅燈的語境
過晝凝心咯血，據在捙倒的咖啡恬恬佇過路線流踅
渡過烏水溝走揣自由的文字，光全的未來
提規家伙仔做箍子仔，和死神輸贏改編的力頭
赤裼裼的心肝袂勘得皂烏漆白，阿爸唯一罪名是天真
政治學的通譯滿滿利劍劍的算計
橫扴的思想是豬仔的潘泔，虼蚻的喙食物仔
約佇冊的大賣中心拈香，聽，文字的腔口敢有變化？
今，閣會當按啥物罪名？重耽的敘事，今，敢有撨正？
(我無意伐過時代赤裼裼的無情
漚黃皺皺的相片總算有你來交收
無因無端的罪過成做文學虛構的見本
愛綴路的日頭必須先抽退、擠出歷史的膿𣻸
束縛的黃麻索佮無辜的名牌先敨落來，纏牢黨國的氣脈)
頭前斡過就是總統府，往過帝王批駁異端的住所
現此時的民選總統認袂出我的哀悲佮疼痛
洗袂清的穢涗親像永遠隔袂開時代的牽扯，按呢刁工調倚的
視線，看清來來去去的人車佇歪斜的生命線走傱
無意佮歷史起交繃，是心肝頭的血流毋知當時停
路番號的語境干焦是帝王白汫無味的笑詼
當值的憲兵食日提防我即个婦仁人手頭的一支筆一本記事簿
「 我毋是欲搶明仔載報紙的版面
無需要驚惶筆尖會生湠銃子
毋免驚惶埋伏的隱喻佇時間的嘴角
毋免驚惶我用紅冇冇的文字做染底
被篡改的判決纏絞後代的八字
濁篤篤不明的意識予我切斷肚臍帶
今，臭頭臭面的批狀成做捒倒獨裁的告示，詩人的咒懺 」
一路行過來的夢浮浮沉沉
你佮我毋是數想共歷史重khuâinn-khuâinn的烏影扶予正
穿迥扭曲書寫的世代，毋是欲共使弄的文字成做一篇
祭文。一跛一跛逐袂著的青春佇1953早著過往
咱攏無意閣重耽時間的修辭佮無臭無潲的校正
有關著饒赦，是佮屠殺仝款的動詞
大路頂錯亂的青紅燈驚惶這口述譀古的情節
問，今，正義敢有繼續行？若無，今，佗位重耽？
後記：
春明書店頭家陳冠英因為《新名詞辭典》即本冊，予人「紅色加工」，造成全部財產充公，後代子孫生活困難。
十幾冬前，佇台北重慶南路一段踅冊店時，無意中知影這歷史。幾冬後，朋友J講起伊捌約K去怹舊厝（春明書店）行踏，順紲做訪談。兩人一路感概多年來轉型正義的成果，踅到總統府頭前，無疑誤，3-4个憲兵將阮閘落來，面腔歹沖沖要求看證件。K怨嘆經過遐濟時空的背景，正義猶原沐沐泅。
2022年9月22日 星期四
我毋捌藝術
圖來源https://opinion.cw.com.tw/blog/profile/492/article/12115
我毋捌藝術
我毋捌藝術 嘛知你心內滿滿的愛
光復的時，歡喜佮笑容的色水帶一寡奢颺佮驕傲
今，變成地獄的祭典，惡魔的牲禮
時間的驚惶共聲帶𠞭開，無聲無說
紅格桌的自畫像，現此時咧想啥？
是毋是塊笑我覕鏡頭的模樣
覕藏的目屎定著是一个好題材？
查某人扛一粒銃子的重量，撐懸你死目毋願瞌的離散
嘉義街仔一路行落去，踅過你畫過上美麗的所在
今，變成烏汁汁的血跡，臭臊的國慶
我真知即領西米露你上佮意
穿迵的胸坎是有關著熱情的敘述
簡省的遺書是死亡姑不將的卜卦
今，心事鎖佇額頭抾襉的皺痕
我毋捌藝術，煞知影冤屈有一日會顯明
佇烏暗中踏窞(ta̍h-thām)疼痛
輕輕仔，拍開收藏佇樓尾房的畫布
搵寡清水共坱埃掰開。我我毋捌藝術
藏畫的查某人恬恬。覕藏佇神主牌的血證
是監查看袂著的敆縫，拍破獨裁的章回
生活的擔頭重敧爿硩袂扁心肝頭的向望
少年的你閣塊看，目屎早就綴圓環噴水池流--去
青春嘛流--去。未曾過期的色料袂赴完成救贖
被折離離的畫筆急欲揣主人。怹嘛毋捌藝術。
烏西的語言佮日頭仝款鑿目
時間共思考的速度拵慢，無氣力搬徙你的哀疼
紅格桌自信的視線是看偌遠去？
運命佮正義的跤步差一口氣
白頭毛搝走我的等待，轉去你的陪伴
我啥物攏毋捌…干焦想欲知你犯啥物過錯…
註：
寫陳澄波之妻張捷。陳被國民黨槍殺後，請友人將遺照拍落來，相片後壁就是伊共陳的死體撐懸予翕相師翕。這是唯一兩人的「合相」。魏聰洲講：「一個人面對鏡頭、一個人躲著鏡頭。一人躺著、一人扛著。一在陰、一在陽。」
伊閣收藏陳的血衣佮濟濟作品。作品落尾收佇《供桌上的自畫像》。陳畫過袂少以嘉義主題的圖，〈嘉義街外〉是上有名的。本人嘛為嘉義死亡。〈慶祝日〉是陳澄波在1946年的作品，畫面呈現嘉義市警察局共「日之丸」換落來，升「青天白日滿地紅」旗仔，路裡人人熱情搖旗的熱鬧場面。煞知，隔冬，受不幸。
2022年7月16日 星期六
雪球--巴菲特傳
《雪球--巴菲特傳》
讀這本書前前後後看四擺，第一次幼讀， 第二次快讀家己畫重點的部分。
第三擺，輸入語音筆記，字數量其約5200字。第四擺，用XMIND畫心智圖分類重組。
我想有幾點可以從巴菲特身上學習著的，以下分張。
第一點：投資。這人人知。世間少人做會到。
第二點：人際關係的維持。
第三點：自我教育佮經歷、家庭教育，家庭背景。
第四點：思維習慣。
最後，是有關於人生的思考，還有財富的應用，如何行善，如何做社會運動，貢獻。
我想咱免tiau-kang摘巴菲特講過的話。窮實，頭前四點就是造成巴菲特有hiah濟的財富。這四點是互相牽挽的。
總—是，人定定看著的是伊買股票即件代誌，加加làu一寡術語基本面、價值投資…。知影是一件代誌，執行閣是另一件代誌。
財富濟少佮金錢濟少是無仝的，親像wealthy佮rich嘛無啥仝。
理財的冊百百款，咱冊櫃嘛有3-40本。總--是，咱真知咱欲成做好額人的機率真低，假始有法度佇60歲時退休就算袂bái ah。
是講，欲成做一个有財富的人是有可能的。
巴菲特定定講伊運氣出生佇好的年代，好的家庭。咱知怹老爸是國會議員、是證卷所創業。
總—是，世間上恐怖的是，比你運氣好的人koh-khah拚勢。
你敢知伊做過偌濟工課？
你敢知伊幾歲買第一張股票？
你敢知伊當時pa̍k土地稅--人？
你敢知伊幾歲申報所得稅？
你敢知伊幾歲佮老爸合股開公司？
你敢知伊幾歲賣空股票，氣死伊學校的老師？
你敢知伊開始記數，為著增加伊的投資本金？
你敢知伊嘛捌hòng-tōng過？落尾，重新行正路？
你敢知伊是按怎學習？讀過啥物冊？
你敢知幾歲就看清複利效應，啥物叫做「百年罕得看」？
你敢知伊另一半佇家庭的付出？
當然怹厝予伊真好的環境去接觸股市，總--是，上大的因素是伊的努力。
若無，伊兩位姐妹應該像伊按呢攏是股神。若hiah簡單，世間就毋但一个巴菲特。
甚至，假使讀者若看有深，窮實，巴菲特靠老爸的遺產應該食穿mā免煩惱才著。總--是，怹tau的教育毋是án-ne。伊家己本身嘛無佮意án-ne。
咱讀起來，伊確實毋是愛錢。是「愛趁錢」，愛佇股市競爭。這癖是細漢就開始培養出來的。
以上的問題。佇遮咱就mài公開答案，相信讀過的人真清楚，無讀過的人會使去揣答案。等你若知影答案，就會知影好額人毋但想的佮你無仝款，做的嘛差大碼。
欲好額，看人是按怎做，按怎想。
家庭背景掠外，咱會使好好思考一下，對照一下，家己佮巴菲特差佇佗位。假始咱敢有法度培養出台灣巴菲特？
我想即本冊佇理財方面會使比其它理財冊，提供較實際的案例。咱無好死執佇「生存者法則」的輪迴，斟酌比較了後，欲成功應該有仝款的元素才著。
頂懸的問題，學校是真少教。若是你是會計統計系、財務系才有可能。
咱是讀理工的，閣是工人環境大漢。無論股票，抑是理財的觀念是出社會2-3冬後才有的。
彼已經24-6歲外ah。
學數學hām hiah重要的複利效應攏無講清 （可能我上課tuh-ku，愛怪家己），機率課老師soah講，佇烏板畫出來的天鵝毋是烏的。
一件代誌佇1冬內發生機率10%，50冬內發生機率就是99.5%。
咱普通攏是講百年難得一見！
這話有破拍。思考愛倒頭想。逐冬攏發生的機率有偌濟？
1-(1-10%)^50=99.5%。這意思就是必然會發生。
巴菲特足早就看清學校教育無法度滿足伊。
總--是，伊看清人脈會使幫tsān佇伊的趁錢公式，共愈濟錢聲撬起來。
這學校嘛是無咧教。
往往東方人愛錢無敢大聲講，有時閣出一支喙無愛行動。
巴菲特講的，揣出你的英雄，綴伊行，搝伊的衫仔尾，伊所有寫的冊攏揣出來，好好讀！
這就是伊自我學習，向比伊較gió-toh的人學習，勇敢問（好的）問題。
這敢會傷現實？
咱假始來看伊的事業。毋但要求經理人gâu，另一點是「誠實」。
咱攏欲學伊選俗的股票，總—是，選著好的經理人才是加乘投資的力頭。
任何代誌乘於零攏是零。
巴菲特嘛有失敗過。
總—是，伊的安全的a-soo-bih有夠。死袂去，有法度止血。
佇每一擺失敗，攏有勇氣面對，無逃避。
這勇氣毋是人人有。金錢絞勇氣是無價之寶。這予伊度過911事件，予伊度過所羅門弊案。
假始有一工，阿共仔真正拍來leh？毋是1996年台海危機彼種，是像露西亞佮烏克蘭按呢，真正拍起來。
你會有勇氣猶原守護土地，守護手頭的「股票」？
巴菲特1930年出世，今92歲。理查加伊6歲。
伊細漢就真清楚宗教信仰佮歲數無相關。伊是 gâu算的人，定講「樹仔無可能直直發到天頂去。」
即幾年，伊所趁的錢攏位社會運動去。
愛佇冊尾佔袂少的篇幅。愛無法度用錢買。錢嘛毋是測度成功的標準。
伊欲留落來的財產用佇啥物所在，嘛袂有伊的名。
伊佮趁錢時仝款拚勢，努力搝比伊較低層的階級，伊相信這是頂懸階級者的義務。拍拚成做對方（世界）生活的一部份。
這就是愛。
咱理智想，無可能去標佮巴菲特食一頓飯，趁幾千萬成做好額人。
總是，假始予咱愛的人愈愛咱，按呢，咱嘛仝款有財富。按呢，人人攏會使做巴菲特，嘛會使做社會運動，發揮影響力。
以上簡單心得。
2022年7月5日 星期二
2022股市大落著災
2022過一半就落-21%，國安基金敢會入場？
目前的狀況敢會繼續落？
照過去歷史，隔年回轉的機率真懸。
不二過，回轉的速度可能無遐緊，咱敢有法度擋hiah久。有耐性才有法度複利效應。
有時真正毋通家己嚇驚家己。
是講目前國際局勢俄烏狀況、疫情、通彭加起來，敢一定袂崩？落30%，40%？
咱是長期投資。這是真好的考驗！
閣一點，阿共仔敢會拍過來？
年底選情會閣按怎變化？
總講一句，先準備好勢！無論心理抑是生理，預防烏天鵝。
學習後，投資後就欲liam-pinn看著成果？
敢有hiah好空？趁這時陣，讀寡冊，整理一寡清單、筆記，莫看盤，心肝會較清鬆。
2022年7月4日 星期一
紅包橐仔
紅包橐仔
前一暝老爸就吩咐伊這最後一個月就愛分紅包顧柱仔，頂擺票開出來真歹看，這擺絕對袂當閣輸。阿楷請一寡兄弟仔共頂懸送來的錢，逐家分工橐入去紅包，按呢前前後後嘛開欲一禮拜日。
連紲規幾仔工走傱佮人盤撋，阿楷兩支跤行甲撐腿，真袂癮閣再行。看著頭前一欉樹王公，大步行倚，一睏頭仔就坐落來，今仔日的日頭有影會曝死人，佳哉風真秋凊。伊嗽一支薰哪啉涼--水，家己共揹仔的紅包提出來算算咧，量其約閣有一里的額猶未分完。這錢甘開，天下間無生意人遐戇的。心肝頭家己咧想這一般人無法度看破的戲齣。是講，這擺袂當閣輸啊，若輸無定會出問題。
一陣雄狂的風無張持掃過來，袂赴收起來，彼疊紅包吹甲散掖掖，好佳哉這踏少人，聊聊仔去抾是袂減的。佇塗跤舞一睏頭仔才抾齊，點點算算咧減一包。徛起來欲揣，雄雄頭殼起暗眩，跤袂接力，連鞭閣un落去。看到一隻烏貓，來邊仔，毋知影當時來的，伊毋驚人，一雙目睭相金金，開喙展牙叫一聲「來」。叫是家己著痧，聽耽--去，烏貓閣大叫聲「來」。敢講知影另一包飛去佗？家己對家己有即款的想法，感覺愛笑。烏貓位花台跳落來，身形真優雅，若親像人指引方向，頭看向另外一爿去。
有影to著！紅包佇無偌遠的塗跤遐，不而過，哪會會加一包！
這路--裡的紅包袂使烏白抾，這是一般人有的常識。是講這紅包牽涉著選舉結果，顧袂得這鬼鬼神神的傳說，兩包攏抾起來。開起來看，一包是貯錢，另一包毋但內底嘛有錢，閣加一簇頭毛，一張烏白的大頭相。
伊真少年，生著閣真媠。
抾起來就準抾起來啊，欲擲牢嘛講袂啥過。心內確是有一寡礙虐，有錢閣這媠查某囡仔的相，這鬼神古早著綴時代變做笑詼，有時人比鬼閣較雄，閣較驚--人。
「我是一支柱仔跤，買票走傱跤袂麻，選舉操盤免人教，金錢活水袂當焦。」
歇睏夠啊，心情清爽，七字仔哪編哪唱，鼓舞家己，緊共錢送出去。有影這擺立委選舉真競爭，假始講無顧予好，毋但選無牢爾，和阿爸後一場里長選舉攏會著災。這心思不時就會出來tsō伊的心肝。
路--裡，當著阿纏姨，順紲提一包紅包予伊，閣吩咐這擺頓票定著愛共彼箍人搝落來，愛予咱在地的人來做，閣共叮這是大乙媽ìn的跋，無聽袂使即。阿纏姨無啥政治立場，家己一人佇菜市仔賣菜50-60冬，在地鄉親無人毋捌伊，對柱仔跤來講確實是一个好對象。阿纏姨客氣應好，目神煞親像有寡鄙相的形，閣問伊伊捾一个siānn籃欲去佗，講是欲款去予揣查某囝。自按呢，無好佮伊攪擾，講一聲再會就告辭，斡頭看彼一烏貓佇伊跤邊細聲呻叫，袂輸咧講啥。阿纏姨目箍tsuânn-á[1]紅紅，手一，叫烏貓緊去。
著，阿楷嘛著緊去。「確實，我嘛愛去顧柱仔。」家己哪講哪愛笑。這擺選戰是按呢仔危機，顧柱仔若陸戰，參寡網路抹烏空戰戰術這是綴時代行，政治人物愛學的技巧。庄腳所在，無啥好撇步，跤踏實地去行才有路用。
這工轉來時，阿楷看老爸氣怫怫，提一支裂開的國旗，「無啥潲路用，家己的國旗毋敢攑出來。」面仔袂輸紅面關公，血壓沖懸激心，一手插胳一手比天劃地起姦撟。老爸做文賢里里長即的缺已經30冬外，真資深的黨員，相信有一日會拍轉去對岸，完成統一的大業。
「逐擺黨欲選，我佗一擺無拖這老命？」『今天搞啥，把我手上的國旗搶走！國家的使命忘了嗎？對得起革命先烈嗎？』聽老爸今仔日發生的代誌，伊攑國旗替人徛台，煞予人擋，閣共旗仔搶走，講這是獨立意識，大頭家會袂歡喜。
阿楷佇網路揣著YOUTUBE的影片點來看，真替序大人氣憤，想無掩掩挹挹毋敢共旗仔展出來是為著啥。看阿爸咧詈嘛綴咧詈，共老爸講這顧柱仔跤錢咱家己用就好啊，是按怎欲替怹共權力贏轉來？敢有分著湯抑是粒？
「我汰看無？你準講這錢有影是位黨提出來的？毋是啦，這是位對面來的，遮無路用的這馬和[2]國旗就毋敢捎出來，就是後壁有大頭家咧監查，不時咧評估你的死忠指數。啥物袂當用錢買？任何物件攏有價數，主權嘛通有拍賣。
老爸真骨力地方經營，主委這个位閣是黨有鬥伨，錢聲毋捌欠過，四界辨活動，解決地方問題，親像殯儀館不時嘛有派人佇遐送涼水，花箍，罐頭塔、對聯，無所不至。地方若有啥代誌無法度解決的，就會來揣伊鬥相共，化解。彼舊年廟--裡，講媽祖託夢欲轉去湄洲謁祖進香，有寡聲音講是咱媽祖變人細漢的，無同意去，甚至講這是政治操作。彼閣是老爸一个一个去說服鄉親，兩岸血脈相連，無法度分割。閣安排旅遊，交通接送一點仔攏免人操煩，保證凡但人出現，有食閣有掠。
時代變化緊，風水輪流轉。現此時黨的運作無比以前，即馬是後壁大頭家咧指導，地方運作機制齊變，這是做里長的老爸上清楚的代誌。做一个榮民的後代，有機會替祖國做代誌真感覺光榮。啥知落尾感覺愈來愈奇怪，這祖國毋是伊所想的按呢。
父仔囝兩人交代一下這二、三日走地方的代誌，講了已經翻點。阿楷雄雄聽著貓仔聲，明明聲音真近，欲揣煞揣無佇佗位。假若是位房間傳過來的。
入去房間了驚一下，看著一个人查某囡仔坐位伊的眠床墘，學生仔頭，穿一軀高中生的制服，簡單閣秀氣，目睭大大蕊會電人，喙䫌兩粒酒窟仔真深lōng，哪笑哪欲共人搝落去的款。
共問伊是誰，伊無欲應，無聲無說干焦微微仔笑。閣共問，伊嘛是微微仔笑，雄雄起雞母皮起來，感覺即个查某囡仔生做成面熟，毋知佗位看過。即時才想著下晡時抾著的紅包橐仔，手phi̍h-phi̍h掣伸扲，共內底相片提出來看。頭前這个查某囡仔佮相片內彼个生張對同對同。斡頭起跤就欲lōng[3]，無細膩踢著戶橂規个摔一下，袂赴起身規路撾[4]爬的爬出去。大聲叫老爸無人應，一陣螺仔風絞過來，感覺後壁有人，斡頭看彼个查某囡仔綴佇後壁，閣是微微仔笑。
查某囡仔開喙就問，「你咧做柱仔跤喔。」
阿楷心肝頭一時三魂七魄走甲無塊揣，做柱仔跤是老爸愛伊做的，按呢敢會害死人？兩排喙齒tia̍k-tia̍k叫閣大舌，一句話講袂好勢，一字一字斷做子母音才吐出來。
「l---i, b---eh, tsh--ong,
s---iann---？ G--ua,
k--ap, l---i, b---o, u---an, b---o, s---iu。」[5]
話講煞，心愈虛！無定著老爸過去做里長包人工程，斷人錢財，害人跳樓，抑是幫助遐烏龍菁仔欉敗害社會，間接成做共犯。阿楷毋敢閣攑頭看，跪佇塗地，直直頭kho̍k。
隔工透早，老爸發現伊倒佇大廳，，手--裡提一包紅包，號做囝昨暝因為選情的因素煩惱睏袂去，驚伊去寒著，挔[6]一張被仔欲予蓋，無細膩去共阿楷拍醒。
「我無愛做柱仔跤啦。我毋敢啊。我支持台員獨立啦。」老爸喙䫌大力共揌loeh，伊才精神。
「你今嘛好啊，予鬼卡著，日頭曝甲尻脊啊，閣咧陷眠，起來上好，緊去顧柱仔！」
「我無愛啊啦，彼查某鬼知影我是柱仔跤，足恐怖。」話哪講敨彼包紅包予老爸看，指相片的查某囡仔。老爸看著相嘛感覺面熟面熟，心肝頭tshiak一下，想著啥的款。毋敢加話，緊𤆬去大乙媽祖宮收驚，乞符仔化水啉。
行入去廟緊揣廟公，佇耳空邊講昨日暗的狀況予阿標師知，這毋但牽涉著鬼神代，閣較是人間利益衝突的現實佮過去犯的罪過。阿標佇地方人人尊存，喝水會堅凍，烏道白道聽伊名聲逐家攏著愛目睭擘金，無，會食著羹。佇阿標師耳空邊nauh規晡久，干焦聽伊直吐大喟，幌頭，落尾目睭放kheh-kheh。聽著阿楷伯有相片，隨叫提予看，「有影，人塊做天咧看，人袂撨摵[7]得」家己一人直直唸。看了，指示助手提去燒掉。
話無閣講落去，拖仔內的法器，師公道服款好，準備開壇驅邪壓煞。伊生張矮頓矮頓[8]，人食老後閣淡薄仔曲痀，一軀道服拖塗跤，手攑蛇鞭法索向東南西北四方摔掃[9]，擗[10]來擗去，歕牛角風吹招喚眾神守護，歕甲前廟迵後廟。阿楷徛挺挺毋敢震動，阿標久無共人收，一遛手法索飛出去，親像一隻蛇飛出去，落佇外口當拄咧發爐的金爐。這發爐代予人解釋是大乙媽有話欲講。
這件地方新聞當然予壓落來，彼日按呢的因端，廟臨時臨要暫停信徒入門參拜。講是最近選舉期間，媽祖需要時間下凡巡查，四界咧無閒，嘛指示愛支持地方出來選的少年兄。
幾ā冬前，民主意識發穎[11]，和[12]鎮藍宮傳講媽祖顯聖託夢濟濟信眾，講廟裡主委四冬就愛重選，四冬輪一擺，袂當一人連紲做二屆。這威脅著一寡騙食佔權的佬仔，先顧腹肚，才顧佛祖，原地靠這賺食，食甲油洗洗，汰有可能講放就放。外口傳說廟內十偌个金庫、金條、金牌疊甲若山，鎖匙佇主委遐，無輸開銀行，放款做莊，買賣土地錢滾錢，一鉎五厘稅金攏抾袂著。欲做主委，講好聽是愛媽祖允，講歹聽是背景無硬袂使即。
逐冬繞鏡搶轎是一種勢力的展現，各派人馬毋是搶甲流血流滴，無就是位這條路拍到另外一條巷仔。落尾嘛是冬瓜標師出面才扞定。彼冬阿水仔這古意人無代無誌欲去報名選主委，逐个人無看好，另一派的人極加看衰尾，根本袂癮正眼共看。伊干焦𢯾三塊磚仔佇廟口埕排予好勢，徛頂懸演講，講主委換人做，廟裡錢財袂拍無，主委選舉著公開，地方進步有人才，媽祖口號烏白用，可比烏道如惡雄。落尾阿水仔氣勢愈來愈旺，愈來愈濟人來聽伊演講。逐工廟埕真鬧熱，閣會鬥喝口號，排擔仔賣物愛先申請，買物件攏愛排隊。阿標仔去外口踅一輦看，終其尾擋袂牢，無出手袂用。
這阿楷老爸想一下，毋敢閣想落去，過去的應該予過去。嘛知這時代咧進展，這柱仔跤是無可能扞久，家己嘛毋知按怎做，這擺閣選輸毋但財產會出問題，權力攏會無去。所致，猶原無叫後生停手。
隔二工，阿楷嘛是照起工去巡街走巷顧柱仔走傱，昨--日查某鬼的代誌已經放袂記。彼是行到樹王公的時才閣想起來，想一下彼查某囡仔生長嘛是真媠，若毋是鬼，做家後應該嘛是袂䆀。聽起貓仔叫，這空思夢想才閘止，發現家己無應該遐無禮，尤其對方是鬼！鬼佮人敢會使作伙！
閣是仝一隻貓，阿楷印象足清，伊目睭尾仔有一粒紅紅，番薯形的蜞[13]，彼是床母留落來的記號。
阿楷跔落來，身軀頂一寡喙食物裂做小塊仔共唌，手哪揲[14]共叫，「你敢有看著彼个查某鬼？我是柱仔跤無毋著，毋過我無害人啦。」烏貓倚來舐手心的物，舐甲清氣閣欲討。
這會議是欲評估量其約票聲[15]會有偌濟，對方票會有偌濟，佗一區贏面大細，佗位會當繼續顧，佗位放棄…等等。內底眾大老已經坐佇上頭前排，面色無講kài好看。中央彼个毋是啥人，就是阿標師。身邊的人攏懸伊一粒頭，真顯目的精差，雙跤踏袂著塗跤，佇半天直直顫，真齷齪的款。手頭提的是逐个庄頭會頓票的清單，哪看手扲愈絚，兩片喙唇合峇峇，喙尾皺痕勼倚，鼻頭嘛皺懸懸，一面貓鼠面。
下跤坐的是有阿楷老爸佮幾个仔信任會過的柱仔跤。看阿楷行入來就問，「今仔日行了啥款？」伊應講「鄉親假若無前規冬遐伨，講無二三句，就講無閒，紅包㧣予怹閣會挨推[16]。」
阿標師位椅仔跳起哩桌仔，手頭的紙大力抨出去，一手插胳一手指向遮柱仔跤。
「這選舉毋是為我爾爾，逐家攏有好處，這工課是大頭家交代的，絕對袂當閣輸！」
時代確實咧進步，陸戰顧柱仔應變掠外，空戰網路文宣嘛著愛出動。這幾年忠國勢力愈來愈氅𪁎，佮地方烏道，宮廟培養勢力，逐擺選舉掖錢，網路抹烏對方，製造假新聞，共對敵往過做的記錄歹的四界放送，好的聽好[17]拗做歹的，予對方開時間，開錢去澄清，民眾無法度思考，無法度好好仔選舉。家己私底下佮大頭家聚會的時閣愛唱六星歌，宣誓一生孝忠黨，黨就會提供資源拍贏選戰，所致地方勢力繼續生湠深根。
阿標師鼓舞逐个，大喝繼續戰，目尾看向阿楷老爸看伊胸坎前的國旗，扽蹬[18]一時仔，才閣繼續講。
「這意識形態真重要，不二過，佇江湖街踏愛會曉變巧，2022是真重要的一冬，咱袂當予大頭家失望，按呢咱才會有好未來。」暗示阿楷伯毋通閣遐白目提國旗出來。怹兩人雙目對看，知影彼此的想法，阿楷老爸氣勢煞矮人一層，一腹氣吐袂出來。
阿楷毋知影佗一條筋絞無搝予絚，攑手問「當時欲辨造勢活動，對方已經開始「百日行路入鄉里」，是毋是嘛來辦一个「一二一八大戰決，自由經濟大出發，海翁出帆會轉斡，統一忠國著爭奪」。阿標師聽了tìm頭無應，窮實伊無斟酌想伊講的話，是想著彼的查某囡仔。
轉來厝，阿楷老爸對大頭家這代誌真煩惱，伊是挺咱的黨，毋是大頭家的黨，怹的使命是反共，恢復大中樺，大頭家是統一，消滅咱主權。這暗招囝過來薰提出來，拄一支過予囝。
「阿爸你想著喔，你毋捌予我食薰，今仔日開會起毛䆀 nih？」阿楷問。
「你敢會知阿纏姨仔有一个查某囝？」聽著老爸講煞起憢疑，逐擺去伊兜攏是看伊一人，菜市仔嘛無人共伊鬥相工，佗位來的查某囝？
70年代，大乙宮就捌有主委選舉，彼是阿楷老爸第一擺做人柱仔跤，正確講是做阿標師的柱仔跤。阿水仔逐工佇廟埕演講，這是真前衛的做法，通人攏感覺真趣味，真合草地氣[19]，上蓋重要的是予庄腳人知影民主是啥，權力佮權利閣是啥。聽伊喙角全波，批評烏金，講拜拜毋是拜假的，香插袂正，心欲按怎會正？叫兄弟顧廟寺，舞地下政治，借錢免還，閣有錢通領共一寡民眾心肝頭毋敢講的話講講出來，人人呵咾，比大頭拇。便若講了，下台眾人就喝當選。這聲勢迵廟內外埕。
過無偌久，水仔無閣出來演講，通人嘛無閣看著伊。聽講一日佇來廟埕準備演講的時，予人綁去，和伊拄讀高中的查某囝嘛𤆬𤆬走。到今，無消無息。
阿楷聽一下規个人愣--去，感覺這政治代誌有影垃圾甲。家己接老爸的缺做這柱仔跤是趁寡所費，無想別項，若是講害著人，甚至害人家破人亡，這伊甘願無愛做。兩人討論到三更，老爸先喝忝，轉去房間歇睏，阿楷一人看天頂的月娘sű-suh[20]。看一个烏影一目𥍉倚來跤邊，是烏貓。
「你哪會閣來？」伸手來共搔[21]尻脊。烏貓喙咬一个物予伊，皺皺帕帕一張紙，展開共看，這相片毋是hőng提去燒去啊，是按怎閣佇遮！
烏貓有靈定著有所求，阿楷知影這查某鬼仔會閣來揣伊，知怹兜的悲情，若是閣來，看是毋是會當做寡啥貨無。伊嘛是拜媽祖大漢的，假始講有人利用神明來利益家己，這伊嘛毋願閣做矣。
烏貓真有法度感應人想法，開喙展牙對阿楷叫一聲「來」，阿楷小寡躊躇，共老爸留落來彼包薰抽一支，點𤏸大力欶一氣，對烏貓講，「好，𤆬我去。」
行到一叢木麻樹仔跤，烏貓踅三輦，然後跳起哩樹仔頂，大聲哀呻，親像紅嬰仔咧喝大人，吼甲真悽慘。
本底號做家己做好心理準備，啥知雄雄軟跤，un佇塗跤，月娘予烏雲閘去，蟲豸的叫聲攏總恬去，親像咧等待啥物代誌的款。遠遠看見一个人行倚，阿楷緊覕起來，彼个人形體矮頓矮頓，手捾銀紙錢佮香，相[22]好樹仔跤邊仔一垺塗堆就跪落去。
「遮錢提去用，毋通閣來揣矣。過去就予過去矣。」可能鼻著阿楷的薰味，驚有人，銀紙無燒，香無插，青青狂狂就起跤走。原來是伊，阿楷想起阿爸講的代誌，按算家己無愛閣做這柱仔跤，閣替這人敗害社會。
月娘光耀[23]落來，烏貓跳落來樹仔跤邊塗堆叫一聲，佮一个穿製服的查某囡仔咧司奶，查某囡仔捋伊的尻脊，「多謝你𤆬伊來。」
「你行較倚咧，免驚啦，你抾著，我就是你的人啊。」阿楷毋捌想過𤆬某這件代誌，更加毋捌想過𤆬鬼仔某。
行倚細聲共問，「我欲按怎稱呼你？」心內嘛是tám-tám[24]。
真細步仔行倚，來到阿敏的面頭前，兩人對看笑笑。到底是查某鬼迷阿楷，抑是阿楷願意去煞--著。這真歹解說。
「你有啥冤屈的代誌，需要我做的？原來你是阿纏姨的查某囝，我會好好照顧你。袂閣予你流浪啦。」
翻轉工，柱仔跤的穡頭無愛去做，一人先去報案，講是30冬前的命案。分局長聽著命案，是大條的，叫阿楷講予聽。啥知，聽了感覺伊咧嘐潲，而且若是真的，這案伊嘛袂癮開案，驚惹著地方頭人。凊凊彩彩共回應，講這無具體證據，莫烏白浪費官方資源，若是予鬼卡--著，大乙宮去拜，揣阿標師收驚。
「揣阿標師收驚？我看是收命。」這代誌看來愛家己動手，已經答應阿敏討回公道，閣無好去揣老爸。想想咧來揣阿纏姨啊。
想著欲見丈姆，禮袂會無，家己攢準備一寡水果，穿西裝，皮鞋，閣刁工縖一个紅色的tsiű-tsiú，佮伊平素時的穿插差大碼。去菜市仔，看無人，問隔壁擔講是已經幾月日無來排擔啊。一聽著按呢，趕緊叫車去伊兜看覓。
一到位，看外口搝紅布，頂懸一字喜掛佇門口，外口無半的人。阿纏姨仔是按怎咧辦喜事？總--是，知影伊人應該是閣康健，無啥代誌。
「阿纏姨，恭喜喔，恁兜辦喜事nih？阿纏姨…」阿楷人佇外口喝咻一睏。
過無偌久，一个婦仁人穿合軀的旗袍，頭後擴踅兩粒頭毛摠，頭額毛繐仔[25]用一个尾蝶形的頭毛鋏仔鋏甲真精神，面仔笑笑，行出來看。斟酌看，阿纏姨生張佮阿敏真正是母仔囝形，雖罔年歲有啊，猶原有法度看出少年時美麗的生張佮體格。
「是你，我已經等你一月日啊。」無著想這人是阿楷，替伊老爸共人鬥扞柱仔跤的人。
Pháng[26]是天意的款，查某囝一個月前託夢來，討欲嫁，吩咐老母著寬心，共厝內拚掃好勢，會有人來講親。上蓋重要是去共伊的大體揣出來，好好仔安葬有一个好歸宿。阿纏姨看這阿楷人是真古意，客氣。總是，無阿水仔的氣魄佮理氣。一時講袂出話，拄才歡喜的心情攏拍無去。雙手掩面，真艱苦。
阿楷提阿敏仔相片出來予纏姨，開喙就講「我有答應伊，我無愛做柱仔跤啊。一寡代誌是我過去毋捌，我即馬較理解矣。」
「理解啥？你捌一箍潲！」雄雄變一个聲，阿纏姨頭攑起來睨惡惡看伊，若查埔人欲招人釘孤枝。
「你敢知影啥是民主？民主毋是位天落落來的，是生命去跋的，你這个菁仔欉戇甲袂扒癢，替人扞柱仔，組織地方對抗民主，選你做囝婿是欲鬼幹！」看著阿纏姨變一人，歹沖沖的聲嗽共惡，驚一下tshua̋nn[27]勼起來，毋知影欲應啥。
「你敢會比你老爸較出脫袂？做柱仔跤，你憶著[28]啥？吮食民主的血肉，斷了自由的筋骨，未來敢會較好？」無想著阿水叔性地有影烈，有影是敢徛佇大乙宮演講，佮阿標師爭取委員的人。不過，嘛是按呢，今仔日伊是倚阿纏姨的身講遮的話，伊是鬼，毋是人。
想著抾著這紅包，拄著這鬼仔教伊這實實在在的政治代。家己心肝頭感覺世間已經無比這閣較譀古的代誌啊。
「驚像我仝款hőng掠去做肉粽角？每一个世代攏有伊的問題，是講你有阮彼代有的優勢，主要的是你想欲留予後代啥物佮你本身按怎看家己。以早柱仔跤金主是忠國黨，現此時柱仔跤是對方歹厝邊出的，用錢寄付三跤仔，直接買主權，這生意手法真高段。閣遇著恁無思想，顧穿顧食毋通曝干的人，落尾，就是做人奴才。無，你看米國仔是按怎三不五時就派官員來探台員有好勢無？訓練咱的阿兵哥？」
「阿水叔仔，陰間的資訊嘛遐爾仔流通！你做鬼hām這時勢、國際新聞攏遐清楚，3G訊號敢有通去遐？」阿楷聽阿水叔若攑一支鴨頭仔[29]直直彈，一支喙講無煞，嘛無欲害伊的意思，愈聽愈感覺這水仔叔無遐歹，是一个真為咱地方，愛護咱國家，為社會的鬼仔爾爾。
「做人時，為政治死，和查某囝受拖磨，15-6歲青春蔫去；做鬼三十冬外，正義毋捌見光，看大乙媽逐冬hőng掠做若人質，成做政治的儌注[30]，世人看媽祖面，就號做扛轎的是善男信女，窮實彼比魔鬼閣較會害人，閣較殘忍。」
外口紺的天，雄雄霆[31]一聲雷，天強欲必[32]去的聲，地牛翻身低沉的吼聲維持一兜久仔，阿纏姨精神啊。家己想一下，真知拄才的代誌，人真忝。阿楷共扶驚伊昏昏倒，叫伊坐落來歇睏，欲斟茶予啉。坐一睏仔，較精神，阿纏仔就問楷仔，你若欲𤆬鬼仔某，好，綴丈姆來一逝。
隔幾工，地方新聞獨家報導，講有人半暝仔佇樹王公附近燒銀紙，若拜若會，彼人閣予路邊的攝影機錄落來。是一个矮肥，曲痀的人。這新聞通人議論，較老一輩的就想起30冬起的代誌。拄著這選舉期間，任何新聞攏通報，真真假假，是欲消磨逐个人對政治的看法。
楷仔老爸看伊二、三工無閣去扞柱仔，叫來問最近咧變啥蠓。應講無愛閣扞啊，共阿水仔彼套講予老爸聽，閣講台員愛獨立，才要有好未來。
「幹你娘，你去予鬼幹--著。是按怎講這番薯仔話。行，閣來去收驚一下。」老爸真受氣，感覺予囝忤逆，想欲叫阿標師閣收一下。
「揣伊創啥？敢有錢通提？敢保證你老爸後擺里長選會牢？」老爸半譬相講，阿楷毋知是毋是愛共老爸講，伊欲去佮纏姨去揣阿敏的死體，欲𤆬娶神主牌仔。
老爸嘛感覺著無啥對筒，無閣繼續問。拍算欲綴囝後壁看怹咧創啥。
來到樹王公跤時，阿纏姨佮兩个工人已經佇遐，工人攏攑iân-pit-á[33]咧挖塗，看來已經挖一陣仔。過無偌久一个穿插若地理師的人行來，佮纏姨講一下久，遐指遐指，羅經[34]攏提出來，指頭仔點來算去，落尾指示樹王公南方3米外的所在。兩个工人隨停手過新的所在繼續挖，挖無3尺深就看著啊。
一个冊揹包先挖出來，埋佇塗袂堪得歲月的吮食已經破糊糊，阿纏姨會認即是t查囝的。伊忍咧無愛哮出來，總是，嚨喉鼻腔低沉的苦痛早就湠出來矣。
這代誌進行到一半，就hőng放送出去，來一堆記者，新聞SNG連線，比菜市仔較鬧熱。阿楷看著老爸佇後壁，目神真緊張的款，才想著老爸敢有參與著這命案？按呢是毋是害著阿爸？
警察局嘛來啊，頭先攑牌仔警告講是非法聚會，落尾，有影挖著一寡事證，才知代誌大條，局長連鞭命令封鎖現場，大乙宮阿標師嘛派一寡兄弟來現場探消息，烏道白道攏齊齊來。閣挖一尺深，發現一跤大跤塑膠橐仔，綁死死，真重真沉，現場逐个人攏恬靜落來。
鑑定人員判斷是人屍，要求送去法醫做刑事報告，毋通破壞現場。自按呢現場人聲沓沓仔冷。不二過，新聞已經開始轉播這命案，阿纏姨嘛接受訪問，表達這絕對是伊失散三十冬外的查某囝，伊絕對欲替查囝討回公報。
這新聞鬧甲真大，法務部請知名法醫楊月松來驗屍，講是hőng催死，驗DNA的結果確定是阿纏姨的查某囝，阿敏。
知影這無意外的報告，阿纏姨猶原是無法度接受。「叫你毋通插政治，你硬欲，害死家己害死囡仔，予我食老無依無倚…」逐工一人行去大乙宮廟埕前，大聲嚷。較老一輩的鄉親知影阿水仔佮怹查某囝的代誌攏真毋甘，經過的人嘛聽甲真艱苦。
總--是，這新聞過無偌久就予衛生部部長無掛喙掩的新聞，副部長外口飼查某生囡仔的代誌蓋去。真濟人無閣致意這可憐的婦仁人，當然嘛毋知過去有一个叫水仔的人佇廟埕用生命演講，點醒咱人民主自由的精神。
阿楷逐工就來探阿纏姨，驚伊起痟，身體袂堪。上驚的是有人會揣伊麻煩，尤其是這會影響選舉。阿標師派兄弟照三頓去共請安。阿楷老爸嘛叫伊毋通閣予鬼仔牽咧行，時到會像阿水仔仝款，填海做肉粽角。
「你才予鬼仔牽咧行，人國旗攏毋予你提，你是憶著啥？你hőng出賣啊，而且是你家己願意的。」阿楷仔對老爸真無法度理解，真受氣刁工講話剾洗，到今閣欲替怹講話。
「做代誌，毋免講五四三的。會hőng幹，你去選！」老爸真受氣，煞講袂出啥道理。真驚後生予人處理掉，親像水仔仝款。
阿楷無愛聽老爸的話，決定欲學阿水仔仝款佇廟埕演講，閣講後擺欲出來選，改變這政治的結構。一開始真濟過去的兄弟攏來共伊呸喙瀾，比中指，𧮙姦搦撟，共伊的mai-khuh偃倒。遮的行為，閣較予伊確定伊所做的是正確的。老爸毋甘伊hőng按呢欺負，嘛開始躊躇這30冬來家己替阿標仔做的垃圾代。
行來阿纏仔兜，想欲來揣伊參詳保護伊的後生，向望阿纏會當體會做父母的心情，看是毋是會當勸伊莫閣佇廟埕演講。至少選舉期間莫去共阿標仔刺激著。
「刺激？你咧講啥貨？好意思來阮兜講這！阮水仔彼時佮你是好兄弟，你敢有徛佇伊遐？到今，死佇佗，你敢知？你囝閣比你較有腳數。」阿楷老爸毋知欲按怎應，一粒頭殼若千萬斤重，攑袂起來。
「你遐𠢕分紅包，規氣去廟埕分啦。」講煞，就共伊趕出去。
阿楷老爸想想咧，鬼才捌政治？咱人毋去捌政治，敢講做鬼的時才欲去捌？家己舞這柱仔跤三十冬外，到尾啊，做的是煞是害著家己國家的利益。半暝警察局敲來講阿楷予人攑bat-tah[35]
拍甲頭殼全血，送去急診。看著囝的時，伊規的面腫甲若麵龜。彼是投票前一禮拜，看來阿標師是決心欲閣阻擋任何對伊不利的代誌。
阿楷不時做夢著阿敏，伊攏會來看伊，不過攏是坐佇伊身邊笑笑。「我欲走啊，袂閣來啊。我佮老爸任務已經完成啊，拜託你照顧阮老母。」彼日過，阿楷脫離上危險的時期，唯一影響的是頭殼目尾留落來一位番薯形的號。
開票彼日，老爸𤆬伊走去無人揣會著的所在，真驚人結果出來會有人對伊不利。嘛叫伊手機仔毋通開機，凡勢有人定位會揣著。
後來，楷仔人較好勢了後，有影是照約束去𤆬阿敏的神主牌仔轉來。聽講一開始，嘛是跋無杯，問講是毋是兇手無掠著毋甘願，閣應毋是。問甲三暝三日，猶原無一个結果。老爸看囝按呢𤆬一个鬼仔某𤆬袂入門心嘛袂得過，這無關輦轎，徛桌頭[36]袂使。乩手起童了後，一下仔若查某咧行路，一下仔若查埔大步走，不過毋寫字就是毋寫字，紅頭仔法師按怎問就問袂應。到暗時十點開票煞，新聞放送講是少年仔陳山丘贏阿標師3388票，確定推翻這久長烏金政治。乩手大喝一聲「好」，佇香烌板頂寫字。
楷仔老爸嘛無閣選里長啊，嘛無做柱仔跤啊，不過閣真認真替鄉親服務，四界走傱。阿楷共神主牌仔請轉去了後，聽講是媠某指示叫伊網路紅人，宣傳的內容就是彼日寫的「轎仔字」，政治民主化、主權自主化、社會自由化。
彼冬新正過年，路裡真濟政治人物四界分紅包，內底貯一箍銀意思意思咧共人祝賀，這紅包敢會使提？阿楷老爸鄙相講這毋知是毋是佮大頭家出的，欲提紅包規氣去路裡抾嘛較贏，無的確閣會𤆬一个捌政治的新婦轉來！
@2021/11/10-23
閩客文學獎第一名。@台江42期
得獎感言：
即幾冬咱攏真無閒，工課抑是生活攏是。寫作佮文學獎比賽嘛變成咱生活ê一部份，這慣勢已經八冬外。時間制限ê因端，咱設定啥物時愛準備投稿抑是投文學獎，這嘛是即幾年來tām-po̍h-á適應這節奏。講慣勢嘛毋是百分之一百有影按呢做，有時嘛是逼家己拚暝工，甚至是請假khû佇厝內硬thuh，有時嘛是放棄一寡原底欲投ê雜誌抑是文學獎。
總--是，盡量要求有寫，有投，然後提升質。佇每一擺落筆，評審ê話去分析分拆家己ê想法，閣有這社會ê規則。即幾冬ê成果看來已經成做一个正向ê循環。上重緊ê是，文學手路進步掠外，家己所欲表達--ê，家己一開始用母語寫作ê初心今閣無變。
母語ê發展比往過攏真好ah，是講母語蔫去ê速度愈閣較緊。這毋是咱一二人就會使轉變。佇遮向望有志定著愛看向未來，時代咧變真緊，推sak母語ê時，嘛著愛思考按怎佮未來做tsih接。
[1] 就這樣。
[2] hām
[3] 牛、馬等走跳。快走，快跑。此意思是被驚嚇，快步走。
[4] kōo，使用。
[5] 你欲創啥？我佮你無怨無仇。
[6] hiannh，拿被仔的動作。
[7] Tshiâu-tshi̍k，算計，計劃。
[8] é-tǹg-é-tǹg。
[9] sut-sau2。
[10] phiak，手拿東西，大力甩發出的聲音。
[11] puh-ínn。
[12] hām
[13] 床母做記號，胎記。
[14] ia̍t。招手。
[15] 票數。
[16] e-the。
[17] thìng-hó。
[18] tùn-tenn。猶豫。
[19] 地氣。
[20] 有心事的樣子。
[21] so。
[22] siòng，視察。
[23] tshiō。照。
[24] 餘悸。
[25] 瀏海。
[26] 大概是，可能是。
[27] 就這樣。
[28] 得到。
[29] 散彈槍。
[30] kiáu-tù，賭注。
[31] tân。
[32] pit，裂開。
[33] 圓鍬。
[34] 羅盤。
[35] 日式台語，球棒。
[36] kuan lián-kiō, khiā toh-thâu。道教儀式，利用轎身在一個有「
香烌」的桌子上面 寫字，由桌頭解讀。
訂閱：
文章 (Atom)