乞食hē大願

新年hē新願望向望咱一冬比一冬koh-khah好，mā tio̍h愛檢討過去一冬咱到底有siánn-mih進展。照下跤年表tsim-tsiok來看，今年有影比過去有進展。總--是，敢有法度講母語有救ah？

咱簡單回顧2017母語進展kap過去來比phīng，總講一句，欲救母語無政治手段，2字，穩死！

Án-tsuánn講leh？咱看1990年，七大縣市民進黨縣市長主辨ê「本土語言教育問題第一次學術研討會」tō知，tse mā是第一pái官方開始leh思考「母語教育」ê問題kap實際行動。到2001年教育部宣佈國小一禮拜愛有1-2點鐘母語課、2001年成立客委會、2003年開始討論《語言平等法草案》，直接跳到2017年，民進黨有影佇政策方面對搶救母語有相當ê幫贊。咱獨獨看台語，suah袂tín袂tāng，佇國民黨執政期間mài論，這m̄知是啥物問題？

吸引koh-khah濟人，尤其是少年人來書寫母語，實踐文字化，tse運動ê方向íng-íng lóng是過去民間leh tshui-sak--ê。總--是，民間資源有限，uá靠ê是心內熱phut-phut ê熱情koh有使命。是講，咱熱情敢有法度對抗時代ê變遷，kap華語市場tshia-piànn？ Lóng無官方ê資源、實際政策，母語終其尾kan-tann是khǹg tī 博物館ê運命niâ。Uì下跤年表來看，官方tsun-tshûn ê程度tsiah是母語活命ê mê-kak，mā thang創造koh-khah濟，多元ê管道，節目「民視台灣學堂：講台語，當著時」tō是誠好ê例。透過媒體傳播，koh-khah濟人接受母語，袂koh認為講母語是臭賤ê，學母語是時行ê運動。Tse無形中，建立「語言平等」ê人權概念。予人鬱卒ê是，he mā是民間leh運作niâ。

2017年，語言平等法公聽會、台語電視台公聽會辦ná leh辦，原住民語kap客語已經sûn其它法源tsiânn做「國家語言」ah，in ê電視台koh有相關ê委員會支持，台語leh？蔡英文chún後屆koh會tiâu，6冬內敢會有台語委員會，平等法á是電視台？

咱ná乞食，討1个電視台to討lóng無，koh講預算有問題。咱tsim-tsiok想無基本法源，暫時nā設立電視台，無tiānn，民進黨落台，預算tō hŏng tok--tiāu ah。Tshan-tshiūnn 2009 洪秀柱thâi台語認證預算仝款。

照án-ne講，平等法才是第一關？根據文化部長鄭麗君ê講法，國家語言無代表有正規教育，he是ài官方語言lah，愛教育部認同--ê (台灣無官方語言相關法令，以教育部認同有正規教育ê（幼稚園到大學，非語言科目lóng kōo母語教育）tsún做官方語言)。就是講國家語言發展法內底主要是「保存」，官方語言才是。Án-ne來講，平等法kan-tann是確定母語有一間「棺柴」thang tuà niâ。Hô-hòng，咱敢確定平等法佇2冬、6冬內通--過？

咱ná乞食，驚講大心喟，民進黨無愛撥經費，khah少爭取設立委員會，才先爭取平等法kap電視台ê成立。咱leh想，咱是m̄是共家己限制ah？Á是tshuā頭執政者無心？

咱欲探討ê是現實面調整未來運動方向，ǹg-bāng個人、社團kap任何團體同齊思考，面對2018 ê台語路。

註：評論徐佳青荒謬的母語觀

註：鄭麗君：國家語言發展法不是規範官方語言

你所無了解ê母語人權

愈來愈濟人leh討論人權kap轉型正義，總--是，che m̄是1工2工tō有法度kā長期殖民教育ê毒素洗清。族群kap族群ê競爭無論，nā以「掌權ê」人數來定義「少數民族」，iû-goân有伊轉型ê困難，尤其牽涉政治利益ê時。Hô-hòng，目前台灣對族群ê認同mā lóng限定tī運動比賽時，逐家chiah會想起chē-chē運動員是原住民，nā原住民欲爭取土地正義ê時，語言平等ê時，tō lóng tèⁿ做無khoàiⁿ。拆白講，咱lóng是選擇性ê正義，咱民主ê素養koh差歐美國家真濟，目光chiâⁿ淺。

母語人權是人權其中一項，mā是tiāⁿ-tiāⁿ hō͘人pàng-sak。母語人權佇《世界人權宣言》內底包括教育權、使用權、傳播權kap號名權。Che少人討論，tī中華民國ê體制內底目前無1件做kah到，經過3 pái ê政權交替1，目前咱iû-goân看無正規母語教育ê規劃，tian-tó是有人leh chèⁿ中國「文言文」ê部份bē-tàng減少，hit種kan-taⁿ死背應付考試ê思維，iû-goân koh欲tîⁿ-tòe咱ê後1代。

Siáng-mi̍h款ê教育tō會培養siáng-mi̍h款ê國民，咱kám有以「台灣」做主體ê教育體制？2 Chē-chē問題lóng愛óa靠「國家語言平等法」3確定了chiah有法度做？咱知知he可能koh是1 ê假議題，因為以現此時總統kap國會人數來看無應該進展hiah慢chiah tio̍h。唯一，ē-sái解釋就是民進黨政府無心lah，無tō是台灣早就sì-kè充滿中國白蟻 the chhńg-chia̍h咱ê té-tì。咱mā thang怨咱台語人無hit lō客家人「萬人遊行」ê志氣。

咱來看阻礙khah少ê號名權，mā是少人致意--è。阿扁在位ê時，正名5 ê原住民族，koh kā 介壽路正名做「凱達格蘭大道」…等等。前幾日行政院通過修正草案增加「平埔原住民」，che敢是正名？ Che 好thang hō͘咱思考che內底ê精差。

傳播權leh？咱今年拚勢欲爭取「台語電視台」，為欲得著國會多數委員認同，不管政黨lóng ǹg-bāng in會使tâng-chê來救台語，實現語言ê平等。總--是，chē-chē koh再陷落「台語á是閩南語」chit款議題，che tō牽涉tú-chiah講ê號名權問題。直直se̍h-lin-long，無法度hoa̍h出去1步，因為咱欠缺「人權」ê概念。

Tī 欠缺學校教育之下，竟然hām媒體ê傳播權力lóng無，kā所有母語ê教育lóng sak hō͘ 家庭教育？Tī市面上華語無論，英語、日語、韓語甚至是廣東話tī大眾媒體ê使用kap台灣母語ê使用根本是天差地，koh濟濟是hǒng當作「次等語言」來對待，講台語tō是粗俗。近來，客語電視台kap原住民電視台內底使用母語ê狀況，等待咱讀者去比較。

無論教育權、使用權、傳播權kap號名權lóng是咱成做1 ê國家ê源頭。內底教育權kap傳播權主要是hō͘咱chē-chē人脫離青暝牛、臭耳鴨ê身份，恢復對土地ê連結。拆白講，無教育權、傳播權，母語使用人口無可能增加，母語注定死亡。以「台灣」名義chiâⁿ-chò ê國家想像，有影是空chhùi哺舌，hoah thiòng--ê。

咱放大「媒體權」，論媒體書寫問題，無論實體報紙，電視字幕來看，應該是99.5% lóng是華語，其它是英文。除了學校體制內，長期「不知不覺」承認「漢字」霸權，漢字才是字，是唯一ê「印刷語言」，che實在是阻礙母語運動ê 1粒大石頭。Sui-bóng，教育部佇2007年5月30日捌公佈推薦用(漢)字，che kap咱不時佇新聞ê標頭看tio̍h ê台語「火星文」tō thang理解官方推sak台語文字化ê失敗，mā thang講是兇手。Tī無傳播ê工具kap正規教育之下，iû-goân chē-chē人無知影咱人話是有文字。語言kap文字ê關係，kan-taⁿ限佇學校教育ê思考。A-tok-á ê字是字，漢字是字，你nā寫chhan-chhiūⁿ筆者所用ê文字tō是「外星文」，真烏白來！Che lóng是m̄願認清歷史，中華漢人沙文ê思考。Tō chhan-chhiūⁿ chē-chē原住民kō͘羅馬字號in ê名受tio̍h chē-chē ê歧視仝款，無法度認同台灣是1 ê多文化，多語言ê島嶼。Nā koh欲論電子媒體ê書寫問題，除了民間社團以外，mā是仝款有ná無，che咱先按hā。有人pháng會以「市場」來考慮讀者量ê濟少，che愛ùi咱長期欠缺ê教育權作伙討探chiah合理。總講1句，文化袂當kan-taⁿ以「經濟」ê角度來看，不而過，文化是有推sak經濟ê法度。

羅馬字á是白話字ê歷史che免koh筆者tī chia加話。Tī無教育權ê推sak，年歲國中以下ê少年人會愈來愈袂曉講ka-tī ê母語，欠缺少年人講，母語ê流失m̄-nā加倍流失，koh死亡ê 歹吉兆。現chūn咱nā無ùi傳播權chit方面有進展，咱mā免向望政府會有教育權還--咱，母語終其尾是政治láu-á選舉時ê chhùi-nōa niâ。咱ê人權mā是in ê chhùi-nōa。

註1：正規母語教育的來臨或是幻滅？

註2：民報，蔡英文推sak「台灣學」有影ia̍h-sī無影？

註3：民報，語言平等法才是轉型正義第一步

2017/8/28-29

母語書寫民主化ê要緊

母語書寫民主化ê要緊

佇這个時代人人lóng leh hoah民主kap平等，總是，現今社會kám有影攏án-ne？

台灣經歷3 kái政權ê替換，是講咱敢有方法一下仔tō轉大人，講咱出頭天，kā民主 kap平等ê牌仔貼佇咱頭額！

咱深思看māi過去國民黨政權án-chóaⁿ thún-ta̍h咱本土語言kap文化，咱有影hiah有自信óa靠幾冬ê政治輪替就kā百幾冬殖民ê遺毒排了了？

是leh，咱有影對台灣歷史不明，學校教--è是中國歷史、地理。

咱對二二八屠殺無了解，對噍吧哖事件無了解，soah講過去hō͘過去。He mā是咱對民主ê不明，對正義ê扭曲。

台北市咱ê首都，市內路名鬥鬥leh是1張大中國ê地圖。咱跤踏台灣地，soah定定東南西北分袂清楚，看家己無目地，毋知5大山脈，毋知濁水溪佇toh，所致，咱毋敢大聲叫出台灣ê名。

莫怪濟濟退休軍人走去中國秤斤量兩拍賣台灣，咱家己無要無緊。

是leh，咱喙舌講--è，是別人ê話，koh 會phì-siùⁿ家己母語歹聽，粗俗！

咱無正規母語教育，咱敢大聲講咱有平等kap民主？

咱談論gōa濟kái語言平等，原住民土地問題！Soah有人講母語佇厝--nih講就好，是án-chóaⁿ華語mài佇厝--nih講就好，英文去國外學就好？

母語敢免文字書寫教育？書寫教育如何óa靠家庭教育來完成？Che是咱要求母語教育siōng要緊ê部份，因為有文字才有法度保存母語。總--是，有人éng-éng分袂清，認為母語無字，母語會曉講就好，這是真無常識ê看法。政治láu-á mā the̍h文字化ê問題逃閃in愛擔ê責任。所致，咱對台灣愈來愈疏遠，對土地ê關心愈來愈無。無文字教育，就是欲放予母語滅絕。這thang觀察蔡英文總統kap文化部部長鄭麗君未來ê態度是siáⁿ。

書寫民主化是指任何人有寫、讀家己母語ê法度，任何主題，專業，新科技攏有法度談論kap書寫，閱讀得著新ê知識。用家己ê話，寫家己ê故事，che才是母語民主kap平等。佇政治訴求當中，承認咱所缺欠--è，就是講咱承認是「母語青暝牛」，就是講咱m̄-nā kā hǒng liô去ê喙舌討--轉-來，koh-khah欲愛會曉寫母語ê手。Che kap台灣手語協會某種程度是相仝--è。

咱開偌濟時間學華語，開偌濟時間才會thang用華語寫1篇誠gió-toh ê文章？

Che敢m̄-sī教育所起致--è？母語敢免學就會曉寫？濟濟文學家講in ê文章ē-tàng透過「腦譯」ê方式來唸母語，che就是文字kap語言ê關係無平等 kap偏差。蔣為文kap黃春明事件是近代誠好ê例。這就是利益者kā書寫權力佔牢牢，透過書寫皂烏漆白，jia-khàm是非。讀冊人袂koh問，袂koh思考咱chia所舉ê「書寫民主化」問題，因為「咱」ê要求是欲chām in ê手，in袂允准咱kā母語chhōe--轉-來。Che mā thang好理解早期母語推sak者/作者（廣義；見施俊州《台語作家著作目錄》，2016，台灣文學館），相對來講，教育知識khah低。

咱轉來看，hām台語電視台ê催生lóng hiah坎坷，濟濟政客選前大聲講台語poa̍h感情，選後看無chia使用母語ê人，這種民主kap平等是oaiⁿ-chhoa̍h--è。

「講，聽，寫，讀」che四項，應該lóng是母語運動內愛考慮--è，咱學外來語攏有chit種想法，soah面對家己母語soah無chit款「平等」，這mā是koh 1 kái殖民體制毒素ê干證。

咱欲講--è，推sak母語m̄-thang袂記書寫民主kap平等。毋通喙leh hoah，手直直寫華語。雖bóng有時是階段性ê策略，總是，愛會記--è m̄-thang kā家己愈sak愈倒退。

2017/8/4