PP基因新突變[1]
這篇欲講--ê，毋是小說譀古，是誠實ê故事。政治界ê代誌，我真毋捌，彼若毋是因為選舉ê關係，這事情嘛袂hőng出破。人講政治毋通沐，一沐就無法度閣再清白。我咧想，毋是政治ê問題，是人無法度維持往過ê熱情，顛倒予名利淹khàm理智。
PP基因這項發現，早期應該干焦兩種人知知。第一種人免我加話，跤頭趺想就知是有咧研讀上新ê醫學進展ê人。第二種，嘛是少數。你敢有咧讀佇加拿大做醫生ê陳雷？做醫生是伊興趣，寫台語小說才是伊的正職。有讀過伊的醫學小說的人就知PP基因有三種，讀者無讀醫真oh解釋。總講一句，這基因有嚴重擾亂民主、破壞法制ê功能。醫學新知，一般人khah無機會接觸，曷若台語小說閣愈無人hiù潲。所致，少人知影這基因嚴重ê欠點，嘛無去預防。就是因為按呢，才有後來ê基因突變事件。
阿文ê知名度照理講嘛是政治ê產物。有人諍兩黨平爛，才通有伊出頭；有人若綴歌星影星仝款，佮意就是佮意，免想傷濟，愛就愛。這攏是成做真好ê社會科學ê研究題目。佇遮，咱感覺上主要ê是伊個人真特殊ê癖，就是頂懸講ê基因。遮閣再重申一擺，無彼阿雷兄彼篇，我無法可能牽著這項發現。我公開，毋是致意欲搶Noo-be-luh獎，台灣長期hőng打壓，嘛無可能這福氣，是向望台灣未來koh-khah好。若愈濟人知影這突變基因ê厲害，認清佗一位政客tài這暗病，勿去予怹抐烏政治ê水池仔，按呢就是我ê榮光。
突變是需要環境刺激，長期不斷激酵，拆白講有先天基因因素，有後天環境起致。欲佮政治牽扯，就愛定定佮政治人行倚，當然有時政治人需要人伨，政治人普遍有真敏感ê神經，知影佗一个人會伨袂伨，會扶袂扶。這阿文道行愈懸，落尾，醫生無癮做，直接拚市長選舉，閣連紲牢二屆。今，你就知這突變基因厲害。
阿文原地是一个袂曉開刀ê外科醫師，這毋是笑詼，是事實。總--是，毋通kāng笑，上有名ê「Ia̍p-khik-mo̍oh」是伊一手打造，才通挽救千萬條性命。有即項絕技，江湖社會四界傳，愈來愈濟政治人物就欲指名伊看。破病發燒、心臟無爽快、四肢無力、血壓沖懸、胸崁tsat-tsat…，較嚴重ê像換心換肺換腰子等等，揣阿文用「Ia̍p-khik-mo̍oh」就連鞭好勢好勢出院。「Ia̍p-khik-mo̍oh」是有啥大路用，毋是咱遮欲講ê重點，有興趣家己gu--一-下就知。
阿文講話較孽，較條直，敢講袂驚得失人，有伊真特殊ê講話喟口，定定有佮人無仝ê見解，這嘛引起媒體相爭欲播。所致，愈來愈濟毋是醫學方面的議題，記者嘛攏來問伊ê看法。親像核能議題，講「核廢料就是共糞口縫--起-來，直直飼你食物件」，親像九二共識，講這就是「下跪求饒恕」…。時間一久，阿文ê名佇政治人物之間ê名聲愈來愈颺，相爭欲佮伊牽絪挽豆藤，看有互通利益無。
有一改，媒體訪問伊「你定定講家己智商懸，為啥物聯考考二擺才考牢。伊應講「hm̀，你就毋知咧，智商嘛著需要失敗ê刺激才通突破提升。嘛就是按呢，我ê意志力毋是一般人會當比--ê。」有一冬，阿文流年真歹，因為伊佮綠--ê行傷倚，替阿扁仔出頭，講身軀頂ê銃傷是真--ê。就是按呢，毋直啊，藍--ê起毛䆀，刁工挖空欲予跳，講伊偷挹助理費，亂報開銷。一時通人閣議論伊ê名聲，採訪伊，辨公室門口記者不時一大堆。阿文無改伊講話ê喟口「這就是政治暴力，國家機器咧運作，我阿文做代誌一向清清白白，袂去共人濫糝來，袂信毋信，凊彩恁」。有一日，實在hőng問甲忝，拒絕任何採訪，轉去舊厝看父仔母。阿母tng當看電視伊hőng訪問ê對話，心肝鬱氣積牢咧，看伊轉來隨共電視切起來。「我心肝仔，你人無爽快nih？」「無啦，母--à，轉來lau-lau踅踅，看看。最近hòonn，電視較勿看，較免惱氣。」「文仔，母--à共你交代，做醫生你嘛是聽我--ê，才有今仔日，你閣聽我一句去共人插政治！」阿文聽一下，隨愣去，雄雄若像有一粒石頭kiat著，話吐袂出來，目睭吊天仁，干焦心魂走無去。
彼日，阿文母--à話一講出去，煞感覺後悔，插政治這代誌嘛是伊一時想--ê，無經過大腦深深想過。暗頭仔，飯食袂落，茶湯啉濟，睏無好，不時反身起落走便所。發仔予伊按呢舞，坐起來問伊啥代誌，英仔才共這想法敁予聽。這發仔一聽，嘛恬去啊，無插英仔，無應伊半句一字，斡咧倒咧睏。不而過，喙角若食著甜，微微仔搝咧搝咧，無人知影伊咧想啥，一个真大膽ê想法佇伊頭殼碗仔咧轉踅。英仔看伊無應，毋敢閣講，號做翁婿受氣，驚一下趕緊覕佇棉被內睏，大氣毋敢喘一下。寒--人，庄腳地靈較靜，有影較好入夢，無偌久兩人睏甲十三天外。暗時，一个血sai-sai ê老身，行倚來怹眠床，拐仔攑懸懸就位床頂大力摃大力mau。兩人疼一下，大叫一聲，目睭擘金，日頭早就曝到亭仔跤，原來是夢。
透早，兩个翁仔某，全身跤手烏青一大堆，遐腫遮腫，腰骨酸疼。兩人相問是按怎，才發現攏是做仝款ê夢，比現實閣較真ê夢。彼位老身是啥人，佗位ê冤親債主，捎無頭鬃。發仔想想咧無啥對同，叫某去備辦三牲四果祭祖，點清香跋筶跪拜。隔工暝，當好睏彼个老身閣來。無講無坦，拐仔攑咧閣大力摃大力mau。兩个翁仔某即改毋敢大意，隨落床就跪「阿爸，莫受氣」。
老身講：「恁不孝！」「阮佗位不孝，阮晟養囝真成功，做台大名醫師，記者相爭採訪，政治人物嘛相爭揣伊徛台。」「恁戇啊，按呢敢有較縒，做醫師敢有插政治輕可，敢會hőng告？現陣時機夠ah，咱兜欲出𠢕人啊。恁真袂曉想！」「插政治？」發仔即時才沓沓仔頓悟。共阿爸問按怎做。「作永遠ê政治家，有名koh有利，上蓋風神。咱兜有真特殊ê基因天份，這陣是上好ê時機。無把握，就無後擺啊。」隨講了，兩个翁某起床相看，閣是仝一夢。兩个無等天光，就咧討論按怎安排，直直到麻霧光。
發仔隨敲電話就文仔轉來。共夢的內容講予聽，叫伊去佮人參選市長。阿文確實有醫學ê知識，伊有捌讀過陳雷的醫學報告真知。先天基因確實有比人較優勢ê所在，無適合ê時勢就無可能發揮。窮實前幾日，敏仔叫去插政治時，伊就開始咧評估，因為基因本能，真自動思考分析目前ê局勢，按怎做對家己有利。即幾冬ê媒體報導已經免錢替伊拍廣告，民眾一向攏佮意明星特色ê政治人物，這絕對是一个好機會。
「藍--ê若是欲繼續政治操作，迫害我，我就欲來選市長。」即句話一講出去，藍--ê才發現慘啊，袂輸共一隻tuh龜ê獅仔拍醒，欲翻頭來咬伊。根據民調，阿文竟然分別超過藍綠百分5外，這氣勢才輸阿扁彼時一點點仔爾爾。落尾，hām綠--ê嘛是鼻仔家己摸摸咧，毋敢派來人選，顛倒支持伊。加一个戰友，總比加一个對敵較好。
「我牢啊，我牢啊」阿文暢佇心內，面仔嘛是激嚴肅，為欲展現氣魄，上任就隨共忠孝橋拆掉，真濟民眾攏感覺選即位市長確實有影無仝。彼年二二八紀念日，阿文上台致詞講甲欲哭欲啼，講怹阿公按怎予國民黨刑，無死tshun半條命，轉去無偌久就激鬱氣死死去。台下跤發仔敏仔聽甲嘛綴咧吼，真濟人嘛真怨慼國民黨ê獨裁。一位穿白衫白褲烏布鞋仔ê人聽甲那幌頭那起愛笑，我感覺真無尊重人，就行倚過，請伊愛對這紀念會尊存一下，伊應講「這基因開始欲位隱性變顯性啊，準備予好。無，會出代誌」偷偷仔挹一个物件囥佇我ê橐袋仔。看一下伊ê名字卡姓蘇單字名惟，感覺真毋知佗位看過。
後來，有朋友參加這三四冬ê二二八紀念會，才發現阿文逐冬講伊阿公ê過去每一冬攏無仝款，死法無仝才感覺怪奇。一下仔講是hőng刑死，一下仔講著肺炎死…死法ê因端攏鬥袂起來，是毋是有影佮二二八有牽連真使人憢疑。是真濟朋友嘛對阿文ê支持開始感覺是一種錯誤，五大弊案就是真好ê例，進前品ê無一項佮做有到。有一對父母向望有阿文彼款高智商，提錢請我去看是毋是會當分析是啥款ê基因起引--ê。阮一个同事有機會得著發仔ê血水檢體予我來做基因破碼ê穡頭。就是按呢我才查著陳雷兄彼篇PP基因論文，沿即條線路閣揣才知彼年穿白衫白褲烏布鞋仔彼个人，是一位研究基因權威。總--是，伊佇阿文上任無偌久，就遇著車厄死亡啊。我想起伊予我ê物件，是一粒USB，拍開擋案全全攏是PP基因相關ê研究。我捌敲電話予陳雷兄討論我ê發現，這PP基因假若有突變ê現象。伊真久攏無講話，干焦講「慘啊，準備予好。無，會出代誌。」
咱咧看時代咧進步，科技咧進步，hām獨裁ê步數攏會進化親像基因突變。出啥代誌，我遮真oh閣講落去啊，咱朋友若有致意目前政治ê變化，大概真知咱ê操煩。向望咱醫學界ê友志較濟人開始致意這款基因，甚至有研發疫苗的一工。以上。
2021/5/22-23
