《阮tau就是圖書館》序 -- 戰爭當時來？

Che故事原底是beh寫去比賽用--ê （2021.8.26），結果無著等，囥beh 3-4冬，今，koh再回收利用。總--是，故事內容大改。

編故事ê源由lóng是beh陪伴囡仔，kap in講母語，講學習、閱讀ê重要…等等。今後來加一寡社會，國家ê代誌，ǹg望in對未來有所可能ê變化ē-tàng理解，甚至有一工有反抗這獨裁ê勇氣。Che mā是咱對所有ê台灣人想beh講--ê。

對家己ê土地，抑是未來，歷史定著ài有思考，m̄是獨獨陷tī工課，現實經濟方面ê成長。無民主、自由，怎有可能有人權？逐工lóng有隔壁ê歹厝邊來恐hat、受驚惶，戰爭m̄知當時ē來，總是，閃ē過一世紀？咱就m̄-thang欺騙家己。

戰爭kám有偌遠？這一二三冬，尤其chit站仔四五月六月ê新聞，看來百面就是揀日子beh拍ah。時間賰偌濟m̄知niā-niā。

啊nā án-ne，到底beh直接投降？放棄？痟想對敵ē留咱一命？甚至保有家己ê財產、土地？有影是戇kah bē扒癢。自古以來共產主義，法西斯就lóng m̄是án-ne。Ē有che天真ê想法，代表過去國民黨ê洗腦教育有成功，hō͘咱無思考ê法度。

台灣目前kám就ài行到chit步？Thài toh看家己無夠重？M̄是阮人厚神經，實在che無法度tèⁿ無看--得。

Che繪本上大ê ǹg望，是咱讀者ē-tàng看khah遠leh，m̄-thang koh相信世界太平chit款hàm古。自我防備、武裝，心防，koh有知識ê精進是bōe當無--ê。Che需要每一个人ê力量，每一个人徛出來。無che意識，就親像kan-taⁿ精牲仔戇戇仔過，等人來掠去食。

Tio̍h，無法度思考，he是欠缺閱讀，欠教育。Che mā是過去獨裁者無愛人去閱讀，用集中營洗腦ê方式kā人ê精神lut khah無賰。

當然，行動是伴相隨。ē講bē做、有讀無做che是大多數人ê慣性。有大量ê閱讀，幼幼仔讀一寡經典，內化成做底蒂，落尾行動，chiah ē有力頭。Ǹg望我ê囝kap讀chit本冊ê讀者，ē-tàng建立厝內「圖書館」，阮想che應該對目前世代是真需要--ê，無論講是AI世代，抑是對抗極權。

上尾，想tio̍h John Adams ê兩句話：

阮必須愛學習政治kap戰爭，án-ne阮ê囝就有可能好好仔去學習數學kap哲學。咱ê囝應該去學習數學、哲學、地理學、自然歷史kap行船、商業kap農業，án-ne hō͘ in ê囡仔有機會去學習畫圖、詩歌、音樂、建築、雕刻kap編織、lia̍p瓷。

民主chēng到今lóng bē長久，真緊就開始lám-nōa，sāi-thái、甚至自揣死路。

阮m̄知chit本冊出版時，時勢會按怎來變化，今，ǹg chit日來ê時，咱lóng有勇氣來面對。

2025-6-15

《青瓦厝ê安妮》的後一本？

 

《青瓦厝ê安妮》的後一本？

有一擺去幼稚園接gín-á，有一个gín-á聽著我講台語，伊用華語問我：「你在說什麼呀？講外國語。」。我知影伊聽無，可能我講的語言親像伊兩个仝班的同學的外國爸爸仝款攏毋是講華語。

毋是華語，就是外國話。Gín-á應該是按呢想的。

5/1咱去政大參加《青瓦厝ê安妮》新冊發表會。主編陳麗君教授用2020年內政部的資料，目前以台語為主的人口佔有31.7%，客語佔5.5%，原住民語佔1.1%。就算目前《語言平等法》通過，台語出版冊愈來愈濟，咱敢真正保證母語袂斷去？抑是明明知，煞無意無意欲救？何況本土語言目前無完善的基礎教育！

既然有一个語言平等，為何閣舞一个2030雙語政策？走向國際的講法敢有影遐有理路？目前的英文教育強強欲佮華語仝ah，母語教育一禮拜非強制性的一節課是會當學著啥？這敢有符合平等？敢有符合學習的理論？

前陣仔的《斯卡羅》，《茶經》的收視率已經說明母語是會使有真大的經濟效益，只要咱願意思考，願意去共咱的文化khioh轉來，咱是有法度向世界展顯咱無仝的所在佮歷史。這才是精差，有精差才通吸引別人。

當然母語毋是會使用金錢來計算，不二過，設使母語流失去，欲閣khioh轉來的成本就變懸ah。

Ùi學習的角度來看，學習母語的成本相對比英文較低。因為咱浸佇chit ê環境。相對上， 台灣是一個海島，欲共英文成做華語以外的主要語言，邏輯上就較怪。為什麼欲ùi放棄家己的母語環境，soah去óa一个外來語，顛倒開hiah濟的成本。

毋是無支持英文。是為著雙語，soah共家己的語言放hòng-hòng，這是一件文化的屠殺。 

《青瓦厝ê安妮》其中一位譯者，吳昭瑞老師，伊本身是佇台南女中教英文，伊ang是外國人。伊的囝嘛有來現場，台語、英語佮華語攏會曉講。伊嘛無私偏講母語無重要，會曉講華語佮英語就好ah。顛倒是感覺母語是愛去傳予後代的寶。

咱大漢查某囝嘛是讀幼稚園進前，干焦會曉講台語，一寡華語詞是聽厝邊學的，但是兩三個月了後，伊會使講真liú-lia̍h的華語。真濟家長攏感覺真神奇，講佇厝內嘛有咧講台語，囡仔會曉聽chi̍t-su̍t-su̍t-á，不過袂曉講。

咱真知，家長完全掠毋著學習語言的重點。無彼个語言環境欲學會曉講一个語言是真困難的。就親像咱英文位細漢學到國中高中，甚至到大學。英文的程度猶原是會曉考試用，袂曉開喙表達kah真liú-lia̍h。

華語敢需要大力去訓練？Tiau-kang去學？有一本冊《父母的語言》有講著4歲前愛共gín-á重複3000字詞，按呢表達能力會比一般gín-á較好。這冊無tiau-kang比佗一種語言。總--是，提來用佇母語身上，敢毋是仝款理路。

華語、英語以目前的教育體制，環境就算4歲後學，mā袂影響著伊的未來。

咱定定注意台語冊的出版，嘛有leh思考按怎才會使吸引閣較濟台語消費者。

若是單單倚靠喊起咱人對母語的重視，我感覺是較困難。這是真現實的部份。但是假始共伊變成一个有趣味的game，加入一寡特有文化的元素，無的確閣有機會。 

畢竟母語的路坎坎坷坷，現在的出版比過去好太濟ah。閣有網路通路的行銷，題材嘛愈來愈多元。是講，這是一个真好的時機，嘛是一个非常困難的挑戰。相對純文學來講，用華語翻譯的冊出版來看是無啥，一冬凡勢千偌本。總--是，以母語出版來看是阿婆仔生囝，真拚。

咱向望所有佮咱仝款對母語有認同的父母，佮gín-á講母語，支持母語出版，組織共學團體，chhiâu-chhōe家己的族人，按呢母語的護城河建立起來。予咱的母語有一个歸屬，毋是khǹg佇未來的博物館，親像故事主人安妮hiah-nī-á有自信。

咱向望這計劃會使繼續落去，世界童語的翻譯事工延續，冊每一冬攏會當出，咱的母語嘛會使講世界知名文學。

每出一本母語冊攏是補足母語受打壓的空喙。

2022/5/3

Tio̍h提懸母語出版ê質 --推薦《台灣動物來唱歌》

 

Tio̍h提懸母語出版ê質 --推薦《台灣動物來唱歌》

 

咱bat寫過一篇文章〈無台語兒童文學，敢有台語e未來〉 ，彼時是2017年。現此時，咱來看這局勢是愈來愈好，台語出版這2-3冬以來，尤其是台語繪本koh-khah大出。予咱買袂赴，直直iā錢。

 

這thang講是國家語言平等法過了ê效應？我無確定。會當確定ê是這是母語人siōng好ê時機。問題是機會來ah，咱敢準備好ah？

 

出冊是簡單，mài賠錢是第一考量。目前時勢好，出版ê意願增加，是講敢有法度回收？Thang好成做後1 pái出版ê力頭？雖bóng是小眾市場，敢無法度hùn闊閱讀者，mài kan-taⁿ束縳tī「母語人」？

 

人人tiāⁿ-tio̍h lóng是母語人，可能是久無講ah，可能是記持拍交落，可能是阿公阿媽ê話…，敢袂使重新來定義家己ê母語？Mài hō͘「母語」束縳咱ê學習，mài束縛消費者，mài束縛市場，mài束縛任何予語言成長ê機會？

 

任何一種語言出版品，lóng tio̍h考慮編輯、美編，通路行銷…等等。冊已經歹銷ah，更加愛顧慮chia ê精差，無，欲án-chóaⁿ生存落去？這觀念佇華語冊出版是常識。Tī母語出版soah是新--ê 。

 

咱看最近李江却出ê繪本《暗mi-moo》、《Tsiâ偷食菜頭粿》、《來𨑨迌》，前衛出版社ê翻譯兒童文學《小王子》、《你無聽--過ê格林童話》。每一本冊lóng mā是設計過，而且koh有QR code聲音唸讀。本文好歹是基本要求--ê ah。假使講文本好，冊皮、美編soah袂去siâⁿ人買，袂看kháu--chit，敢m̄是真枉屈？咱真知袂少母語人出版ê困境，資金無夠。落尾去申請補助、去比地方作家作品集。總--是，以1个真嚴格ê讀者來看，冊皮外觀就先phah-chhèng ah。咱m̄是講chit條路m̄好。總是，應該愛tòe tio̍h時代進步才好，提懸母語出版ê質。相對上，母語人數應該會提懸才是。

 

多元化題材ê文類是咱tiāⁿ-tio̍h真濟動物唸謠。此時soah少人會記。彼m̄-nā是語言失去連結，hām土地ê連結mā斷--去。《台灣動物來唱歌》這冊ē-tàng做未來gín-á繪本siōng懸ê標準。母語kap音樂結合，實際影片干證，tau-tah ê文本圖畫。予阮tau兩个kiáⁿ聽kap看就giàn，koh會逐工唱leh。

 

無台語兒童文學，敢有台語ê未來？今，台語路ta̍uh-ta̍uh-á順，tio̍h鼓舞創作者勇敢koh行--落-去。Hō͘咱未來會有愈來愈濟品質好ê台語文本thang好讀，咱就繼續thin落去！做1个老爸，mā期待有koh-khah濟母語繪本冊紹介koh-khah濟動物，甚至是植物ŏ͘。相信chit工真緊就會來！

 

2021/9/2 @教會公報3637期

〈台語作家-陳金順〉

 #整理冊櫃整理人生

有時作者kap伊ê作品有時差真濟，這tī台語作家身上ká-ná較少leh發生。​

​

咱第一pái kap金順兄應該是2014年台文戰線會員大會，hit年開放m̄是會員ê人參加，咱才有機會koh再進一步接觸。​

​

Khêng-si̍t，咱mā對金順兄真hòⁿ-hiân，真想欲認捌伊。​

​

因為伊退我ê稿足足連續退4-5 pái！​

​

咱真厚面皮，愈退我愈ài寫。（好佳哉，hit時雜務無hiah濟，咱才有時間繼續mî-nōa。）​

​

咱感覺伊ê人做代誌有伊ê堅持，袂chhìn-chhái，烏白是非有真明ê界線。​

​

早tī見面ê時，我就差不多kā伊ê作品收集完，mā lóng讀了。這是咱對作者一貫ê作法。Ùi伊寫作ê記錄，就知無輸一般華語作家ah。可貴ê是，ka-tī辦雜誌，taⁿ 寫作投稿lóng m̄捌hioh。前陣á開講，講欲繼續讀學分班ê代誌，咱心肝leh想，伊真正是勇kha馬！​

​

咱tī體育場遇tio̍h伊比 tī台語場koh-khah捷。咱想tio̍h村上春樹，欲做作家有影ài規律，練身體kap練筆仝款ài致意。路，才行ē久久長長，m̄是欲ùn豆油。Chit點thang好hō͘咱學習kap思考。​

​

母語長長久久，需要koh-khah濟人參與，mā需要作家生產koh-khah濟作品。​

​

好ê作品是ài時間粒積--ê。

〈台語作家-張春凰〉

 #整理冊櫃整理人生

咱捌寫過一篇文〈無台語兒童文學，敢有台語ê未來？〉@教會公報 3438 期，思考台語ê傳承。​

​

佇厝--lìn，咱lóng kā gín-á講台語，in台語mā真gâu講比大人khah gâu，是講無教伊華語，伊soah mā講kah siah-siah叫，án-ne去上幼稚園恐驚ē kā台語全放袂記。​

​

Lóng看chit二、三冬台語繪本愈來愈濟，敢有法度延續落去，有影ài靠父母lah。父母有意識，án-ne就會有需求，出版社mā才會出版khah濟ê母語冊。​

​

所致，做人父做人母，公媽--ê，hō͘咱ko͘-chiâⁿ一下，趁新年將紅包減三-四百換一本台語冊予gín-á kap孫á，我想真是真好ê投資才tio̍h。​

​

無，食老無人kap咱講母語。​

​

張春凰老師應該是我知影上推sak kā世界文學翻譯做台語ê人，利用共筆集合眾人ê力量出版袂少ê gín-á故事。另外一个團體是5%計劃。​

​

咱捌看伊冊後預備欲翻ê清單不止仔濟，落尾，m̄知敢有翻完無，咱無siáⁿ清楚，nā有友志知è，才tàu相報，勞力。​

​

翻譯是一門學問，目前lán khah leh做ah，我想是真phah-sńg ê代誌。Khêng-si̍t，翻譯ē-tàng kā台語sak koh-khah遠leh。​

​

為siáⁿ-mi̍h SIRI bē-tàng講台語？Google bē-tàng翻譯台語？​

​

成做一个工程師來講，這代誌是kín-choa̍h-bān ê代誌，因為有市場tī hia，準講台灣台語死亡chit件代誌應該mā是會發生，欲成做作家ê人千萬m̄-thang看翻譯無。​

​

咱買tio̍h chia ê冊mā是機緣，m̄是欲展po。是koh-khah展現éng-kòe台語出版真oh，現此時是siōng好ê時陣。​

​

咱tō緊tàu相thīn，hō͘作者寫koh-khah濟，翻kah濟作品。向望，每一个gín-á lóng ē-hiáu講母語。

〈台語作家-周定邦〉

〈台語作家-周定邦〉​

#整理冊櫃整理人生​

Kap定邦兄熟sāi ê故事khah濟，在咱看來是奇人，欲40歲才入去台灣文灣館食頭路。無為別項，為台語，為唸歌。​

​

另外伊koh ē-tàng tī體制內做母語運動，這是我感覺伊siōng厲害ê所在，嶄然kap大部份（母語）教師作家、母語學者作家無仝。即點koh thang hō͘ 想欲行即條路koh驚iau--死ê後進thang好參考。​

​

咱是佇2014年世界母語日佇政人冊局就看tio̍h伊本人，人講話真正氣，不時喟力十足，論堅持，做代誌規劃，袂死執是咱多年來ê觀察。​

​

Nā kā無出版翻譯ê劇本、所編ê台語冊、無出版ê唸歌算入來，伊創作ê路m̄捌停，這就是咱心肝頭做一个「作家」ê形象。​

​

創作多元，詩mài論，咱mā讀過伊ê小說，koh有戲劇，布袋戲，koh有少人創作ê七字歌á，hām gín-á唸謠mā有。​

​

Nā讀過定邦兄ê作品，才知家己台語有gōa低路。​

​

有人講正範無正範，用字無重要…等等ê理由來nôa家己ê欠點，這khêng-si̍t已經失去語言ê人格ah。Chit點hō͘有心欲學台語ê人thang好思考。​

​

2017年咱捌kap定邦兄學月琴，咱khah不成材，無法度學好，感覺真歹勢。Koh 2018年參與100 phō͘唸歌筆錄，咱負責一部份，mā是舞kah li-li-lak-lak，佳哉伊kap凱--哥收尾。Mā期待接sóa另外80 phō͘唸歌筆錄ē-tàng sūn-sī完成。​

​

定邦兄第二人生講欲為唸歌，伊mā出版4套歌仔冊ah，一本比一本khah精彩。​

​

前陣á聽講出版m̄是講真順利，會曉寫歌á kap唸歌á全台灣應該算無10个人ah，這條路無好行，定邦兄soah堅定行--落-去。向望伊thang chhōe tio̍h好êsai-á thang kā唸歌thn̂g--落-來。

〈台語作家-陳正雄〉

 咱tī2014年熟sāi chiâⁿ濟台語人，後來才知是正雄兄用台文筆會名義佇葉石濤開袂少台語講座，咱才有這機會。​

​

正雄兄人重心思，重感情，總是，有時tiāⁿ-tiāⁿ放袂開，soah家己激氣。是苦命詩人。這話是咱相信有某種交陪才敢講。​

​

向望伊心情khah tháu--ê，詩人平常時講話，免帶詩意，有話就講，m̄-thang向望別人有詩情thang理解對方ê心情kap想法，意象留予詩就好。​

​

正雄寫ê詩不時leh tio̍h獎，結構能力是咱做袂到--ê。非常適合想欲寫詩ê人來讀。​

​

咱知影伊想欲交hō͘主流出版社出散文、小說集，咱mā萬分期待。

真拍損，有一寡in-toaⁿ，chôaⁿ放掉！對咱一个愛母語，愛讀冊ê人，koh是好朋友有講袂出喙ê不甘願。

真心向望伊ē-tàng繼續寫，千萬m̄-thang停。

〈台語作家-蕭平治〉

 咱蕭老師出ê冊除了上新2本是前衛出--ê，我看其它ê有錢無tàng買。​

​

咱福氣kap蕭老師熟似，才thang有法度the̍h tio̍h chiah好ê寶。​

​

一冬見二、三擺，逐pái見面lóng真歡喜，歡喜這序大疼惜咱。網路頂不時看老師發表新文章，lóng是為tio̍h beh kā失落ê台語辭khioh轉來，比咱khah拚勢，咱敢理由mài寫khah濟作品？​

​

準講暫時為生活三頓，寫作ê趣味kap向望mābē-tàng chhìn-chhái放牢才tio̍h，這是咱講hō͘家己聽--ê。​

​

有人問m̄知影欲寫siáⁿ，在我想是真怪奇ê問題，敢講m̄捌好好過生活。​

​

看咱蕭老師，家己做老師chôaⁿ家己寫教材，koh用散文解釋諺語，為家族寫史記。