蔡英文推sak「台灣學」有影ia̍h-sī無影？

悼念鄭正煜，蔡英文承諾持續推動本土教育。(來源民報)

<<蔡英文推sak「台灣學」有影ia̍h-sī無影？>>

昨日(25號)民進黨主席蔡英文參加南社社長鄭正煜先生ê追思禮。熟似鄭老師ê人，ia̍h-chiah-sī對台文phó-lio̍k-á了解ê人lóng知影鄭老師一生ê心血lóng he tī 母語教育運動kap本土化，民主化推sak。Tī鄭老師過身進前，心肝頭iu-guân放bōe落心ê是『台灣學』ê推sak ，hō͘  lán台灣人更加了解ka-kī ê 歷史，關心土地。

蔡主席ka-kī mā有講起i tī 12月14日去kap鄭老師捻香時有講鄭老師ê心願i會時時khǹg tī 心內，增加台灣人對土地ê感情kap認同。Lán ài知道現準時有13 ê縣市是民進黨leh huānn-- ê。無道理，講無法度做sáⁿ，he會笑破人ê chhùi，講歹聽—ê，卸世卸眾。筆者hoán頭去chhuē小英教育基金會所創辨ê想想論壇，竟然chhuē無一篇台文文章，chit點án-chuánn講ê得過！是講kám會是市場ê顧慮？不而過，本土文化教育敢一定ài用市場來思考？Mài bōe記，台灣歷史，母語教育是án-chóaⁿ hō͘ 中國國民黨來洗腦。蔡主席ài記ka-kī講過ê話，siōng簡單--ê方式，uì想想論壇開始落手，然後要求ta̍k ê民進黨執政縣市增加母語教育kap文化推sak。民間能力是有夠--ê，總是需要政黨資源來sak，chiah會行久長。無者，放尿攪沙bōe做堆--ah，永遠bōe ha̍h-chê。

除了鄭老師外，hō͘台派人士看作是台灣國國歌〈台灣翠青〉歌詞作者鄭兒玉牧師mā相連sòa來過身，in兩位lóng是台灣教育背後siōng重要ê頭人。今á日，蔡主席ài了解母語是國家發展ê基本kap文化。Che mā是民主進步黨ē-sái為台灣進chit步做--ê。M̄是為tio̍h選舉，chiah來làu幾句á母語pua̍h感情ê表面功夫。

過去筆者tī民報論壇刊過兩篇台文文章，“爭取台灣語文教育權tī 11/29日“kap “賴清德，請支持母語教育“。Hit時筆者所向望ê是選舉後，民進黨koh會使chhuā頭，延續過去2000年政黨輪替對台灣教育來拍拚。Lán來lia̍h台南市市長做一ê例。賴市長tī 2009年2月27日做立法委員時tī立法院抗議台語認證預算hông thâi 掉，甚至到2012年2月21日做台南市市長mā發hō͘『聯合國教科文組織』chit張批，向望將Siraya(西拉雅)語言uì『死語』變成是復興當中ê語言。總是，不管有最後ê成績suí ia̍h-sī bái，lán ē-sái看見賴市長為母語教育ê心。尾á，賴市長m̄知是leh想siánn，tī舊年soah講2014年推動英文是第二官方語言，天地lia̍h顛倒反，suah bōe記過去ka-kī為母語來出聲ê形影。tī “賴清德，請支持母語教育”文章寫了chiânn清楚，“gún m̄是反對講英語來實現國際化。問題是賴清德根本是頭尾lia̍h倒吊，kám講賴神bōe記ka-kī母語是台語，選舉huah khah大細聲kap民眾跋(pua̍h)感情時講ê話是台語，講sánn-mih釘根生根tī 府城…等等。別人欺負lán bô夠，你賴神mā beh來參chit kha chiah有夠khuì？“。

所致，筆者所向望ê是蔡主席ài提醒13 ê縣市長，ka-kī mā mài bōe記ka-kī對鄭老師，對濟濟關心台灣教育ê朋友ê約束來推sak“台灣學“。有樣欲做tō uì想想論壇開始接受母語書寫。無者，只是政治chhùi-nōa niâ。