懶魚醉貓e烏白寫: 補充--民報/中國sông報一文

2015年1月13日星期二

補充--民報/中國sông報一文

圖來源 TVBS

<<補充--民報/中國sông報一文>>

台語歌íng-kuè tī台語文運動算是其中chit部份，過去禁歌咱知影過去政治壓迫ê地步。演唱是一種娛樂，mā應該是chit種文化ê表現。限制你娛樂ê面向，親像叫你buē-sái大聲唱出你心內ê話，變成ài做in認同ê mi̍h件，然後變成時行，若是咱kā時間khiú到現準來看tō ē-sái理解，che tō是殖民洗腦。文化koh khah 免講，限制文化發展，由殖民者來定義siánn-mih是文化。Tī 現準社會發展kap教育政治來看，寫台文，講台文，甚至唱台語歌攏是幫贊台語ê壽命延續。

進前投一篇“中國sông報“ tī 民報，內底所寫ê是欲反抗媒體koh-chài洗腦讀者。教育kap政治已經無khiā tī母語 chit pîng --ah。娛樂媒體koh 欲來參--chit跤。Che已經是軟塗深掘ê地步--ah，che 是chit種殖民者心態ê『沙文主義』。假使今仔日，二姐江蕙tī退休進前大聲講台語是i ê母語，請教育部kap相關單位ài好好仔提倡教育，未來chiah會當有khah濟文藝作品繼續流傳。若chiah ê藝人ē-sái chhuā頭咱平常書寫習慣án-ne是毋是足美滿。變作chit種“市場“趨勢致使咱ê教育方向se̍h-彎，毋是 kan-taⁿ kā母語當成chit種娛樂工具，增加i文化ê內涵，甚至是tuì文學觀點來看。我認為語言m̄-nā是án-ne來變化，講kap寫母語無應該變成一種挑戰，應該是一種足sù-siông ê代誌。若無教育，若會有koh khah好ê作曲家，作詞家。總是，講現今社會kap政治，直接kā母語認定是方言，粗俗文化ê社會病態kap政治創治。教育部部長吳思華kā國中母語必修改作選修，潘維剛講推sak本土語言傷害民族感情…hit款語屎，毋知台語歌壇金曲歌后ê二姐聽tio̍h心內感想án-chóaⁿ？做chit ê忠實ê FANS是毋是ē-sái對演唱歌星ê敬仰，欣羨心理化做chit種積極ê語言學習。我想咱ê母語袂予人看無koh驚i消失。語言消失，借問一下千年萬年了後，koh有人會聽有江蕙ê歌，了解歌詞內底表達e情感？若是演唱者自認為家己毋是kan-taⁿ chit ê娛樂者，更加是chit位文化傳承者，án-ne我認為i ê格是使人尊重—ê。

講到『沙文主義』，最近chit寡人自認是支持台文，suah講khah“激進派“ê台文人是沙文豬。Siánn是弱勢ia̍h-sī 強勢？án-ne講kám公平？ in毋捌動筆寫台文，平常mā無講台語，寫寡文章tō來論述台文，大聲講語言平等，細力仔做，lām-sám chit寡文言字詞，看起來足有學問，親像leh王祿仙賣藥仝款。Chit位論述評論者變成chit位使弄者，in mā毋是現實生活ê實現者，án-ni in寫ê mih件kám有值人來看？逐人攏有伊ê自由論述，m̄-koh若變成chit位使弄者，我看法是i受ê評論應該愛khah懸mā ài有人khiā出來指正chiah tio̍h，che應該是chit種社會責任。

有寡人叫台文人愛“包容“，毋通siunn過『沙文主義』，有影是天地顛倒反！講i愛台文發展，suah有hit款ê論述。我是感覺『不以為然』。所致，我chiah有hit款論述者kap使弄者ê定義。Koh有chit點chiânn趣味，是激(kik)進，ia̍h-sī是基(ki)進，我想台文人要求ê是基本koh 進步chiah tio̍h。基本指ê是人權方面，ah-ná激烈是chit款情緒動作表現，免講人權mā khap重要。若是無tī限定ê基礎內討論，講ê攏是加--ê，浪費生命。