台語正音，正港台灣人

來源中天新聞

<<台語正音，正港台灣人？>>@Pháinn-gín-á Uan-lí-siā

台視新聞1/16『小巨蛋站國台客語跳針連發專家助正音』。是，又koh是台語議題，筆者m̄知影是歡喜ia̍h-sī ài悲傷。歡喜ê是hō͘人重新思考台語母語ê重要kap咱ê關懷（kám有？ia̍h-sī只有台文界ê人），悲傷ê是新聞媒體ê低路，比半桶師khah不如，m̄夠用功。án-chuánn講？人明明是號做「台語教學聯盟」，記者suah kā人改做「方言教學聯盟」，che是tó chit 條筋tîng-tânn去？又koh是中國國民黨執政ê毒素koh tī咱ê頭殼腹腸內，明明是母語(注1：99 年底臺閩地區 6 歲以上本國籍常住人口在家使用語言以國語及閩南語最多，每百人有 83.6 人在家使用國語，81.9 人使用閩南語，使用客家語及原住民族語者，則每百人僅有 6.6 人及 1.4 人。)，硬欲講是"方言”。這不管是tī台語界，kap任何chit ê講母語ê人無法度通了解—ê。若是看過去筆者tī民報投過台語相關議題，台語欲生存是khám-khám-khia̍t-khia̍t—ê。現準連一ê所在ê名，tō討論hiah久，在咱人來想，kám講che m̄是教育kap政策ê問題？Koh tī原路se̍h-lin-long。有siánn政治人物出來講話？In只有選舉期間才來làu幾句- á台語，客語爭取認同？

是—lah，觀察相關ê媒體報導，lia̍h中天新聞1/13報講“正港“台灣人ài 會曉十ê台語名詞討論，che m̄是koh一擺操作族群問題？是講，ta̍k-ke kám知影tiānn-tiānn聽leh 新聞chéng-ām koh洗腦！認同台灣人ê人tō是台灣人，siánn-mih正港m̄正港！新聞自由suah變成意識型態ê宣傳工具。會曉講kap boē曉講，是政策教育問題，m̄通sak來做“意識型態”觀點chiah來，mā m̄通sak hō所有評論者講i是沙文主義者。筆者koh再講chit 款新聞三五月日tō koh會出現，對母語kám有影是幫贊，ia̍h-sī看戲ê心態，lia̍h做阮chit款人kāu-sua-sap，製造議題，出名niā-niā。若是án-ne，望讀者kā筆者講chit篇文章ê有偌濟人來讀才是。你我攏知知-lah。

政策kap教育，前人學者攏講足濟—ah，用字正字爭論到taⁿ mā是leh吵。咱講過母語推sak絕對ài óa靠政府，這是事實，無，終其尾，mā是koo-khu̍t。阮所會當作ê是盡量chhē出台文ê出口兼huah聲(mā感謝民報hō͘咱機會)，平常是以chit種使命感來保存語言，咱ài知語言kah文字是無仝-ê，文字只是符仔—niā-niā。無用tī生活當中，未來只是khǹg tī博物館作骨董，死人骨頭ê物。所致，千千萬萬m̄通陷tī文字e討論niā-niā，ài tī生活，工作，新聞…等等來實現，不止仔tī文學方面，是ài各方面--lah。咱轉來用siōng簡單基本ê思想，hiah ê 評論者(報導者)平常kám有leh講，寫母語，sīm-chhiáⁿ是創作？咱m̄是欲來批評mā甘願因為chit款質問(chit-būn)顛倒來接受批評，假使講，正經欲為母語發展，提出辨法，若無，實際liâu落去做。是—lah，chit款講法有影是以較懸ê標準來檢驗hiah ê述論者(報導者)，mā可能是無公平ê講法。阮所向望m̄是kan-taⁿ來生造無法度收煞ê問題，che無法度hō母語見光。當然，咱攏知影新聞媒體boē去考慮che。Che mā是咱chiah台文友志所 chheh心—ê。

最後，四句聯勉勵友志，“你我攏是台灣人，m̄通像in厚使弄，中國思想tō ài放，完成建國m̄是夢“，ta̍k-ke加油，台灣加油。