畫筆

<<畫筆>>

一透早，揹畫架仔歡歡喜喜

面熟ê嘉義街路充滿活氣

飄撇ê眼神對頭看到底

街仔路頂ê人嘛予筆鋒掃去兩邊

踅過中正公園噴水池，鳳凰樹紅膏赤蠘

筆尖感受伊ê熱情，心也燒熱

雖罔日頭赤炎，將面曝甲烏焦

覕佇樹仔跤，嘛是會使感受自由ê風

將心願講予風來聽

門埕外，遠遠看見新高山雪景唌人ê模樣

畫筆袂堪得色水ê追求，行出伊生命ê層次

雪落佇畫布，感受伊ê寒

色彩堅凍，筆來鈍去，畫布烌烌(hu)去

光佮影旅行敢會佇遮結束

日頭已經落山，彩霞嘛無塊看

只有鳥仔哮啾啾ê聲，無依無倚

今年冬天若會遮呢寒

想欲替1947年畫一幅圖，向望和平見證年代

畫筆拍折無力，一冬半內只賰白色ê色素

無法度激出生命活力ê色調

無法度畫出槍聲

無法度佇畫布頂懸畫出白色ê驚惶

無法度一筆一筆勾出屈服，壓逼佮反背

佇祖國幻影烏空內失落，揣無落筆ê所在

將畫筆倒插入心臟窟仔

內䘥仔彼咧破空敢會調出閣較媠ê色調

佇火車頭前，纓纏束縛ê血手代替畫筆，西米羅代替畫布

柑仔色ê夕陽做底稿，殕仔色排規排ê友志，鴨卵青色ê厝邊隔壁

靜靜聽候落筆聲，草色軍服ê阿兵哥急性咒讖

藝術家利劍劍ê眼神，閣會當準備畫啥？

◎寫給畫家陳澄波，他在二二八事件被國民黨政府於嘉義火車站前槍斃。其中著名畫作有嘉義街外(1927年)，夏日街景(1927年)及玉山積雪(1947)。

註：

揹(phāinn)：用肩膀或背部來負載物品。

飄撇(phiau-phiat)：瀟灑、帥氣，多半用指年輕男性帥氣灑脫。

對(ùi)：從。

踅(se̍h)：來回走動、繞行、盤旋或是散步。

紅膏赤蠘(âng-ko-tshiah-tshi̍h)：色澤紅潤。

雖罔(sui-bóng)：雖然。

曝(pha̍k)：曬太陽。

覕(bih)：躲、藏。

唌(siânn)：引誘。

袂堪得(bē-kham-tit)：受不了、禁不起、無法承受。

色水(sik-tsuí)：顏色。

烌(hu)：東西腐化成灰。

無依無倚(bô-i-bô-uá)：無依無靠。

拍折(phah-tsi̍h)：打斷。

賰(tshun)：剩餘。

窟(khut)：凹陷處。

內䘥仔(lāi-kah-á)

媠(suí)：漂亮的、美麗的。

纓纏(inn-tînn)：糾纏不清。

西米羅(si-bí-loh)：西裝。

厝邊隔壁(tshù-pinn- keh-piah)：鄰居。

咒讖(tsiù-tshàm)：埋怨、數落。

利劍劍(lāi-kiàm-kiàm)：尖銳，銳利。

會當(ē-tàng)：可以。能夠、做得到。