2015年1月2日 星期五

2014彼一年

<<2014彼一年>>
運動練身體
2014結束--ah,我較貧惰,現今才來算總帳。今年phehchōa長行山(tn̂g-kiâⁿ(北二段4/24~4/28,甘卓萬8/8~8/12,能高安東郡11/6~11),一擺嘉明湖,一擺鎮西堡搜救(4/11-4/13),玉山塔塔加做義工(11/15~11/16),二擺柴山揹水(恆春旅行,kám koh有?),三擺馬拉松(南橫45k3/8,綠島42k 9/28佮集集42k 12/28),這是較運動方面。欲走馬拉松,當然是要練--la,無,穩死--êÁn-ne開錢,是我愛êNá-sī beh Kap lâng比賽,當然tō ài 練。雖bóng今年ê練習kha bô 好,比賽場bô gōa-chē,算是學經驗,練體力kap耐性,明年koh再衝!無健康ê身體,路是無法度行遠ê。可惜本底欲去新康橫斷,後來路斷去,等明年。明年若有機會行四擺長行,想欲行玉山,北一段,馬博,新康。毋知影是毋是較早睏較有眠--lah,空思夢想niā-niā

台文路起行

我想今年上重點ê是我寫台語詩,讀台語佮tsih-tsiap台文界前輩。寫台語可能是我讀高中時ê想法,hit時老師講台語有音無字。我心中一直有一ê疑問佇hiah。三冬前ùi北部轉來府城到舊年開始去讀書館借冊,彼時借ê台文冊主要是楊青矗寫ê,直直到óa十一月底開始寫台文,2014一月開始,每日要求家己攏ài 動筆寫,不管長短,好bái,三月開始投稿。我是欲臭彈膨風,已經有20首詩刊出來(台文戰線*1,台江文學雜誌*4,李江卻雜誌*5,海翁雜誌*5,教會公報*4,民報*1),閣去比林百貨所辦ê『為林寫詩』徵文,內底有82組作品得第二名。10月份拄選舉ê事項,我mā tī民報發了10篇外ê文章。是--lah,是有tām-po̍h-á 虛華,不而過,án-chóaⁿ 講這是我今年努力拍拚ê證明。想欲留寡記憶,做寡有用ê代誌(有用無用看各人)。硬欲講ê話,12月中有投嘉義市所辦ê桃城文學獎,隔年一月底開獎時到,才來加話。我一冬ê台語詩無詳細算,phó-lio̍k-á算致少有百五首才對。當然--la,其中罵人姦撟ê鬥句無法度記佇文本內()。明年四月文化局在地作家徵選是毋是àikap i la 一下-á 豬屎--lehNá behtō ài開始準備-lo

台語確實開我袂少時間,kha講我是專門科ê。是好lí 佳哉,有網路fb頂懸gâu人,我有興趣嘛有開時間看冊。一開始看冊是亂亂看,投稿也是亂亂投。冊一開始是看楊青矗,林沉默佮陸耳門漁夫(漁夫主要是楊斯棓醫師紹介e),拄拄好,in ê冊讀書館差不多攏有。這嘛可能造成我一開始寫較濟七字仔佮鬥句ê詩,林沉默ê政治詩嘛影響我袂少,我嘛寫足濟姦撟政治人物。Sòa落來,我開始去聽台語前輩ê演講,誠好,府城又閣是台語發展ê發源地,其中熟似(捌見過捌講二三句話)周定邦,施俊州,柯柏榮,林裕凱,廖瑞銘,陳明仁,林文平,陳胤,陳正雄,李長青,劉惠容,舊冊店潘靜竹,潘景新濟濟前輩,閣捌見過林宗源,楊青矗兩位大老。閣有--la,胡長松小說家佇基進側翼ê政治宣傳場 (hiah嘛見過陳豐惠老師),聽伊唸詩開講過,後來參加in台文戰線ê會員大會又閣見tio̍h濟濟台文前輩,林央敏,康原,宋澤萊,陳胤,高月員,高文俊,小城綾子,陳金順。陳金順老師現準嘛佇府城,佮i有一段因緣。I捌退我稿欲五擺外,結果我無放棄。想袂到,最後i收入我彼首迷戀he嘛是i 2014年最後一本編輯ê。陳老師嘛予我足大ê鼓勵閣送我iê“天星照路小說。Hit 日,長松老師佮陳胤老師鼓舞我去頂台唸chit迷戀分享予逐家,我是緊張koh歡喜。對--la,有當時--áin 凡勢會出現佇府城舊冊店。逐家文友互相交流 phò-tāu話仙,潘姐仔會泡咖啡予你啉! 雄雄漏勾兩位,一位是現準佇日本讀學位ê呂美親閣有一位是佇教會公報負責台文版ê陳逸凡。算算leh,今年確實誠幸福--lah。聽in講話唸詩,評論,血攏欲燒起來。怨嘆家己無in ê才調。算起來,我聽in咧演講講課,無開一銑五銀,誠是báu-sí-ah。是--la,我家己開欲3萬外箍買台文冊(強欲200)無算在內。

那是欲講網路頂ê gâu 人愈濟,基本上是攏無捌見過,可能hām本名攏毋知!捌交流過ê潘科元,杜建坊,廖淑鳳,蕭平治,Tsì-sîng TionnChongle Chhua…濟濟台文學者佮老師,清單寫袂完。廖淑鳳老師是楊斯棓醫師紹介ê,老師人誠好,定定佇我烏白寫“ê文章抓漏。張桑是網路頂有名ê七字仔王,我定定佮伊七字仔交流,足心適。毋知伊是毋是有歡喜佮我即ê烏魯木齊ê菜鳥仔 la-ti-sái

現今轉來看即一冬,莫干焦講成績,成績攏是騙人--ê,好看頭niā-niā,家己爽好。閣有一點ê我有認真行落入去,佮前輩ê交流學習。這是我感覺趣味ê所在。無趣味,人生有啥意義,敢毋是?

其它抑是未來計畫
chiah-koh- pó͘

2015/1/3

1 則留言:

  1. 今年結婚,搬新厝,去德國蜜月,走2 kài 超級馬拉松,寫一首台語歌曲有著佳作,咱台語有繼續寫,有繼續讀,mā收集欲2、3百本ê台語冊,koh參與tām-po̍h-á台灣文藝ê編輯…peh kan-ta去一chōa 能高安東軍,二星…
    時間有影無夠用,lán gōng人袂曉分配時間,致覺身體無hia活動,機械部品陸續開始koh-iūⁿ.... che 路 án-chóaⁿ 行,tō 計算,beh chim-chiok算 chiah bōe tâⁿ--khì.

    回覆刪除