七字網誌0528

拍拚賺錢出名聲，放捒(pàng-sak)囝兒為門埕，陰曹地府你先行，敢是因果天注定？

飼囝即款是不幸，如今踏錯受酷刑，叩頭謝罪平紛爭，恩斷義絕爸囝情。

--若是講這款囝無適款，這老爸嘛差不多。


官員不時練痟話，民間受苦當笑詼，食茄(kiô)吞卵來配糜，不三不四誠穢涗(uè-suè)。

--又是假新聞，毋過嘛是要幹橋一下

府城安平鹹酸甜，百年老店敖趁錢，四界人客滿一片，無買試食著飽滇(pá-tīnn)。

--安平鹹酸甜

一根扁擔喝賣麵，麵Q湯甜好滋味，若是小月無趁錢，一碗粗飽上便宜。
--渡小月擔仔麵

暗時欲睏吹冷氣，設定時間省大錢，輕鬆入眠閣舒適，保護地球為囝兒。
--節能減碳

若是決心欲減肥，毋通三頓一直推(thui)，嘛莫問我你若嫷，家己照鏡鏡會碎。

--減肥

來無張持一場夢，去無相辭一場空，海海人生欲入港，回頭一瞇醉茫茫。

－－－悼詹益樺