無我，汝敢會較開活？

浩劫重生。 於往蘭嶼氣象站途中，馬路上！2013-0929

樹葉仔上過密閘窗，汝嫌

樹葉仔落規塗跤，汝嫌

樹根跨過汝兜，汝嫌

汝無當作，樹仔是一條性命

一條性命，保護千千萬萬兮性命

汝欶兮空氣，位佗來矣？

汝跤踏兮土地，誰共伊攬牢牢？

汝喝兮水，誰共伊鎖佇塗跤？

頭殼頂兮日頭，誰為汝閘？

鳥仔早已經無看著啊

天頂兮景色烏暗

分袂清南北東西

一台拖車

載著伊，樹仔

百年兮修行

今仔日 來結束

五馬分屍

我聽著伊偷偷哭兮聲

我看無著塗跤兮影跡

日頭無免閘啊

因為天地已經是烏暗相連

揣無路通轉

無法度來喘喟

欲轉去兮路 山崩地裂

家園埋入塗內

我聽著伊偷偷哭兮聲

樹仔怨嘆講

無我，汝敢會較開活？