老師們，請站出來！

阮e心情有夠疼，台灣官員欲阮命，朋友你敢有咧聽，央望逐家來出聲。3/21

私底協議惹人嫌，馬江問答敖跳針，若欲閃避服貿劫，誠心誠意來道歉。 3/23

in是祖國統一夢，逼死百姓入尾巷，將才有帆有知覺，結果如何袂是空。 3/23

有為有帆有將才，看in表現著ē知，央望父母愛了解，帶領國家好將來。 3/23

高梁一罐入落喉，世間肝苦敢會消？雨針刺入阮心頭，天公敢有聽阮哮？ 3/24

大人神威金鋼腿，一跤落去骨頭脆，我為百姓話予鬼(一支喙)，歹德歹行眾人呸。3/24

大人嘛是有某囝，只是一時性地夯，可惡e是馬江惹，當阮畜生伊來騎。3/24  

黑牌警察若鱸鰻，將阮身軀土跤拖，毋管按怎大聲喝，今日過後敢會活？ 3/24

烏天地暗看無埕，掩崁月娘心驚惶，北斗七星伴阮行，花向太陽是天命。3/24

規軀(su)黑衫行如影，揣仝蕃薯拚輸贏，無人知影為著啥， 只有守護破鐵鼎。3/24

只要亂舞想欲統，不管紅藍按怎創，即刻振作捌假悾，較免時到起抓狂。 3/24

規年迥天痟趁錢，夭壽生命無義理，囝孫遊街來點醒，予伊怨嘆彼當時。 3/25

醫生醫病看症頭，痟貪本性深閣厚，歷史文化藥入喉，猛體勇身來放炮。 3/25

社會聲音毋仝調，包容體諒袂苦惱，思辯因果靠頭腦，情緒語言莫出口。 3/25

新聞記者亂亂報，目瞅耳空窒屎膏，無知百姓心智鎖，社會正義起風波。 3/25

少年反抗佔國會，怨嘆未來啥人賠，政客滲尿走若飛，面子全無傷狼狽。 3/29