心思無定， 抽籤算命?

圖片來源

◎心思無定， 抽籤算命?  / 杜信龍

俗語說『心思無定， 抽籤算命』。

我講這是較消極ê作法，毋閣也是無法度ê代誌。誰叫伊已經失去了意志，無信心，無勇氣…想當然就愛揣神(佛祖，上帝)來指示一條明路。

大家攏知算命先仰是廟公一支喙糊累累。為啥物？因為『算命沒褒，吃水都無』嘛！怹有可能佮人講有法度化解歹運，避小人…等等。講卡你心驚驚，袂食閣袂睏。到時你自然就按簏袋仔提錢出來囉！代誌有解嗎？家己兮心理，想法無變，敢有可能？

照我看來這句俗語愛改！有另外三種改法！

第一：心思無定，抄經收驚。

較輸講欲去廟裡算命。歸去家己唸經，抄經予心較平靜矣！這嘛算是收收驚。佇經書內底揣著開破兮道理，無的確煞來頓悟。

第二：心思無定，打拳行埕。

運動流汗，行踏戶外佮煩惱囥一爿，嘛幫助頭殼血液循環，思考較清楚，袂一直佇遐踅玲瑯。壓力會當得著解放。自然後壁做ê決定袂青青狂狂，無法無章。而且這攏免開著錢，閣兼練健康。有健康兮身體，才會當繼續行落去，是毋？

第三：心思無定，泡茶燃(hiânn)鼎。

這種人可能本身就修養誠好。知樣家己袂當無頭胡蠅飛來飛去，愛有方向，一步一步解決。若急性，就吃快緊弄破碗。喝茶降火氣，甘甘ê滋味，尾仔嘛有淡薄仔甜。攏袂著急，泡一茶鈷茶，喝喝矣。佇一鈷茶兮時間，思路沓沓仔佮理理仔。倒茶，加水，燃水，等若濟時間這攏是藝術，人生道理。

最後，『抽籤算命』，無好啦。有足濟方法會使用即。問鬼問神？問家己比較實在啦！