佮進前寫e七字仔，有關核能議題矣做整理，準備來投稿！
【核災惡夢】
地牛反身心驚驚，核廢囥你門口埕。水土保持甘有影，代誌發生按怎行。
過去資料作參考，佮天相輸伊袂倒。算來算去無結果，時到煏空說拄好。
百姓生命遮呢薄，全部財產攏予落。遠走他鄉無人靠，囡仔後代烏趖趖。
核四電廠準備動，大屯山區搖憨人。政府官員咧眠夢，講這一切無輕重。
明早日頭閣位東，時間一久就放空。向望日子好輕鬆，求神拜佛茫茫茫。
建設工程來創空，阿沙不魯屎尿工。毋知何時大地動，鴨卵較峇嘛有縫。
今年敢是好年冬？青春男女揣某翁，等待有日開心窗，煞來搖醒雪中紅！
註：
煏 piak 裂開、斷裂、迸裂。
烏趖趖 oo-sô-sô
迸 piàng 慘了，遭了。
屎尿工 引自「放尿攪沙是歇後語，袂做堆的意思」
鴨卵較峇嘛有縫/鴨蛋再密也有縫
後記：
今年二月大屯山佮宜蘭連紲發生規模4及規模5.4的大地震，尤其大屯山是一粒活火山，若像一粒隨時有可能爆發e炸彈。而且核一廠焦式tû存地點佇山坡地爿仔，工程品質等等e顧慮。 台灣徛在地震頻繁所在，東爿是環太平洋火山帶，西爿是菲律賓海板塊，若是發生像日本311核災，台灣有辨法應付嗎？受苦的是我們的下一代佮較少年一代，無人敢結婚生囝。
沒有留言:
張貼留言