2014年4月9日 星期三

318 學運 七字仔

整理學運期間所寫e七字仔!1430字! (揣時間閣再整理!)


in是祖國統一夢,逼死百姓入尾巷,將才有帆有知覺,結果如何袂是空。 3/23
有為有帆有將才,看in表現著ē知,央望父母愛了解,帶領國家好將來。 3/23
烏天地暗看無埕,掩崁月娘心驚惶,北斗七星伴阮行,花向日頭是天命。3/24
e心情有夠疼,台灣官員欲阮命,朋友你敢有咧聽,央望逐家來出聲。3/21
私底協議惹人嫌,馬江問答敖跳針,若欲閃避服貿劫,誠心誠意來道歉。 3/23
只要亂舞想欲統,不管紅藍按怎創,即刻振作捌假悾,較免時到起抓狂。 3/24
規年迥天痟趁錢,夭壽生命無義理,囝孫遊街來點醒,予伊怨嘆彼當時。 3/25
少年反抗佔國會,怨嘆未來啥人賠,政客滲尿走若飛,面子全無傷狼狽。 3/29
民主學運來打拚,誰知烏道擋阮行,刁工放炮展奢颺,小人步數術仔囝。 3/25
勾結對岸認阿兄,命令細漢鬧會埕,等候領賞入京城,奴才本性來捧鼎。
囂俳聳鬚較車聲,想欲予阮心驚驚,無情無義無痛疼,烏箱烏道烏身影。
同根同生蕃薯命,理念無合莫仝行。太陽花開規山坪,敢會有差你這件?
規軀黑衫行如影,揣仝蕃薯拚輸贏,無人知影為著啥, 只有守護破鐵鼎。3/24
大人神威金鋼腿,一跤落去骨頭脆,我為百姓一支喙,歹德歹行眾人呸。3/24
烏牌警察若鱸鰻,將阮身軀土跤拖,毋管按怎大聲喝,今日過後敢會活? 3/24
棍仔無情按頭摃,若像報仇起抓狂,雙手懸懸來阻擋,頭破流血險死亡。 3/26
阿娘看著伊阿郎,咒讖獨裁早入墓。和平結束海波浪,公開協議較正當。
高梁一罐入落喉,世間肝苦敢會消?雨針刺入阮心頭,天公敢有聽阮哮? 3/24
大人嘛是有某囝,只是一時性地夯,可惡e是馬江惹,當阮畜生伊來騎。3/24 
水炮一沖身雖倒,意志堅定阿不倒。少年出頭為寶島,獨裁政權一定倒。
新聞記者亂亂報,目瞅耳空窒屎膏,無知百姓心智鎖,社會正義起風波。 3/25
e專門是嘐潲,只愛頭家呵咾敖,管伊別人按怎哮,賺錢生活上重要。
是非義理放水流,父母看著起見笑,踏出家門著掩頭,這款囝兒真不孝。
新聞亂報予掠包,家己演戲烏白鬥,記者面子失了了,街頭相拄起姦撟。
梳妝打扮入鏡頭,良心早就予狗咬,mai5 ku1攑咧話來敨,真真假假亂操操。
烏道橫霸插政治,一切攏是為利益。國家大義掛喙邊,卸世卸眾無地比。
刣人放火笑微微,聽著風聲走去覕。惡人無膽像鳥鼠,政府無管據在伊。
公開唱聲啥天理,酒店撨事毋免錢。工程全包免細膩,好話無聽落小弟。
尪仔官員無理智,目睭只賰看著錢,錢若趁飽大陸去,攬著三小咧欶奶。
百姓仝心抗痟兒,推翻獨裁有志氣,未來家己來算計,保護囝孫好安居。
食煙腸愛配蒜頭,氣味十足鎖鼻頭,若欲吃爽兼止枵,就加大腸來共包! 4/2
一串煙腸十二條,肥肥短短閣彎曲,香味衝鼻喙瀾流,欲提時陣無半條。
害阮目屎強欲哮,頭家笑笑伊來撨,心想一條吃無夠,開脾紲喙凍袂牢!
頭娘看著起姦撟,手攑關刀掃帚頭,青驚拍謝緊來走,佳哉煙腸早入喉。
頭娘生氣按頭揌,盈暗欲睏莫轉來,戇頭戇面做阿凱,社會抗爭管你代?
厝內開錢你了解,囝兒學費對佗來?無能政府毋知歹,家己顧好較實在。
阮佇邊仔心悲哀,對阮所做袂諒解,是非正義若有在,無免街路血絲絲(saisai)
國民黨產泅過岸,管伊蕃薯火燒山,利息繼續咧生湠,早就計畫擉(tia̍k )算盤。
插恁國會佔偌久,賣台協約伊作主,黑道出面鬥相舞,決心硬簽毋認輸。
社會正義毋公平,歷史文化sai喙䫌,無能政府創啥貨,民主風氣不再回。
科技進步變化強,網路分享是力量。鄉民團結有思想,國家民主一定昌。
社會聲音毋仝調,包容體諒袂苦惱,思辯因果靠頭腦,情緒語言莫出口。 3/25
獨裁統治半世紀,歷史洗腦足清氣,改變毋是靠一時,學運救國愛堅持。
醫生醫病看症頭,痟貪本性深閣厚,歷史文化藥入喉,猛體勇身來放炮。 3/25

沒有留言:

張貼留言