換頭家換頭殼

<換頭家換頭殼>

聯合報昨日新聞標題<民進黨完全執政…能源政策重大轉變>，記者做1个比較，總講1句，未來的能源政策佇民進黨執政會有誠大的改變。這是為啥物？這內底窮實有啥物精差？在咱人想法，頭家換人，頭殼的確愛換，無者，著等予人刣頭，轉去食家己。佇台灣政治理路來看，的確是按呢！

咱身為1个老百姓，核能問題是帶身命的重大議題，看日本311事件聽好了解，這嘛是過去濟濟反核廢核團體的訴求。綠色再生能源是濟濟國家攏趕欲做的發展，即款趨勢，全世界攏看現現，到今，台灣頭家換人做，台電才開始思考？按呢，過去的抗爭是算啥物？1 場笑話？這共咱人民講國民黨政權是按怎看待台灣的未來，遐的公務人員是按怎看待台灣人員的安全？閣想看覓過去，in(他們)是瞞騙紅頭嶼的人民。即擺選舉的結果，絕對會使替台灣走閃核能的驚惶，即張票頓落去算是應答過去環保人士的向望，咱嘛通了解好的政府，會聽人民的心聲，無啥物做袂來，看欲做毋做爾。

過去國民黨攏用經濟來恐嚇人民，展開國際新聞，德國，法國，荷蘭濟濟歐洲國家攏毋是按呢，人的經濟閣是世間前幾名，這攏是公開的干證。這嘛是台灣應當愛行的路。台電無可能無了解世界各國的做法，干焦是無政府大力推捒，抑者是背壁有烏手咧操作。這咱嘛好通想像政治佇咱的生活不三時咧纓纏，毋是講莫插政治伊就袂來揣你。

現此時，國民黨敗選民進黨執政，毋是講萬事OK，台灣人民會使過1个無核能威脅的環境。咱愛了解想欲過啥物生活著愛家己來追求，繼續監督政治才是會使過閣較好的生活佮國家。

2016/1/19