破解火場逃生的三個迷思 | 蔡宗翰 Tsung-Han Tsai | TEDxTaipei ( 台語文筆錄 )

各位朋友午安，我是蔡宗翰，我是消防人員，我ùi 高雄，tō 是打狗來--ê。

十個月前桃園1間 bǒ͘-lìn-gù（pó-lêng-kiû）館火燒厝， tī hit ê過程當中，阮有6 ê 拍火兄弟入去，無法度走出來，欲點外鐘ê搶救，尾--a，in ê大體陸續hǒng 扛--出-來。現場所有ê人，m̄-káⁿ kā悲傷tháu現出來，目屎先吞落喉，目chiu看已經死去ê 兄弟，逐家1句話攏講袂出chhùi。

想欲問現場ê 朋友，kám有人tú過火燒厝？

好，無講kài 濟。

咱來想，有3種狀況。假使講，你拄著火境厝，你會按怎來做？

第一，你會走去浴間逃命--ê，請gia̍h手來。

好，謝謝，手先khǹg--leh。

第二，準講火燒ê時，無法度ùi下跤走，會改ǹg頂koân走--ê，gia̍h手。

好，謝謝，手先khǹg--leh。

第三，若是chhèng烏煙，會用澹面巾kā 鼻á kap 喙 掩--leh逃命--ê，gia̍h手。

好，謝謝，手先khǹg--leh。

各位朋友，頂懸hia 3 ê 狀況，恁 nā攏gia̍h手，án-ne，你tiō準備hǒng 扛去埋--ah。

因為che攏是真無愛命ê 行為。逐家有致覺--無？原來造成火燒厝傷亡siōng大ê因端 tō 是咱濟濟人無認捌一寡火燒厝ê知識，按怎應變，koh 有寡錯誤ê了解。Tō 是講，若火燒厝，siōng恐怖--ê，毋是火，是咱家己ê無知。

我真緊來逐家解說頂懸hia 3點毋著佇佗。

一開始，咱ài知火燒厝傷恐怖ê所在是烏煙，大部份死佇火燒厝ê人攏毋是hō͘火燒死--ê，是hō͘ 烏煙嗾(cha̍k)--死。不而過，有1  ê 例 ，咱khah晚chiah 來講。

好，第一，是按怎袂使bih 佇浴間仔？因為浴間仔ê 塑膠門一拄著燒，tō 溶--去，烏煙tō 會直直薰--入-來，一睏頭仔隨無法度來喘氣。第二--lah，是按怎袂使ùi頂懸去？因為你ùi下跤ê 時，拄著火拄著烏煙直直chhèng起來，koh 改向頂懸走，mā 走袂贏烏煙ê 速度 ( koh 愈免講可能揣無路)。

第三--leh，是按怎袂使用澹ê面巾掩鼻仔kap喙。有科學實驗證明，he 澹面巾根本無才調擋he燒氣kap 烏煙。而且--leh，你ùi安全ê 所在，迥（thàng）過烏煙走去便所hia，這毋是koh-khah危險e 代誌？所致，咱到底是欲按怎做？『細pha火緊走，若烏煙to緊關門』才是正確ê原則。

若發生火燒厝，應該tō ài 緊soan。

若是，準講今仔日傷晚發現--leh？

火已經足大--ah，門phah開外口 kap 樓梯攏leh chhèng烏煙，溫度koh燒，chit 時陣，請lín莫烏白亂chông，chit 時陣，kan-taⁿ 簡單做1件代誌，『關門』。

關門chit ê 動作暫時阻擋烏煙，爭取hǒng救ê 時間，等消防--ê來救。

毋知影現場ê 朋友，有人會記五冬前台北白雪大旅社hit場火燒--無？可能逐家攏袂記--ah！伊 tō 是 1 ê 誠好ê例。Chit 場火燒厝有7 ê 人來過往。其中有3 ê 死佇浴間仔，我欲講--ê是另外4 位。Chia 4 位內底有3 ê 走出去房間外口想欲迥過烏煙chiah 死--ê，另外1 ê 是家己跳樓摔死--ê。Lín知--無？事後調查看chia 四位ê 房間內面根本無火燒ê痕跡，hām 淡po̍h-á烏 mah-mah mā 無，袂輸新--ê仝款。

假使講in 若phah開門發覺烏煙chhèng kah 規四界，莫烏白chông，緊關門bih 佇內底，無的確，無的確，in ê 運命會來改變。所擺，千萬毋通想欲bih 佇便所，抑者是走去khah 懸ê 所在 kap 揣澹ê 面巾。毋若（M̄-nā）無路用，顛倒愈危險。會記--leh，『細pha火緊走，若烏煙tō緊關門 ê 概念』。這佇siōng致要ê 時陣，會決定會當活命袂！

窮實我頭前所講--ê，che 防火，應變ê 觀念已經有足濟先拜前輩leh 看--ah。我感覺足哀悲--ê是，雖罔阮足拍拚做誠濟宣導ê 工課，mā是koh 足濟悲劇來發生。

我發現kan-taⁿ少數人ê 力量是無夠--ê，koh需要濟濟友志相keng 鬥相工。若我--leh，我三不五時 tō leh思考我koh 會使做啥物？

我到外勤ê 分隊，教第一線ê同事按怎做防火簡報，這是我第一場教簡報奇巧ê 課，chia 半冬以來，已經超過500偌名。

我發現咱消防兄弟毋若ài 對抗火燒，koh 有民眾錯誤ê 觀念。佇chit ê 資訊復雜，滿四界ê世代，咱著愛用正確ê方式，kā正確ê 觀念，講hǒng每1人聽。

我行入學校，去過高雄khah iap-thiap（揜貼）ê 所在六龜國小，冬外來，到嘉義，屏東，十幾間學校，chih-chiap（接接）上百偌名教育工作者。我請chia ê 校長，老師轉去in 家己ê 學校了後，kā 我所講--ê，koh 教 in學生囡仔。學生囡仔轉去厝--lih 了解，koh 教予 in 兜 ê 人。我1 人ê 力量誠細，不而過，若結合逐家人ê力量tō 會使產生改變。

予我koh-khah有精神ê是，有足濟消防人員kap 學校ê老師 in 來kā 我講，這予in 誠大ê 幫贊，我mā 會phah拚繼續做--落-去。

Khiú--轉-來火燒chit ê主題，逐家koh 會記leh 我進前講--ê掠外ê例--無？

大部份死佇災ê人攏毋是予火燒--死，是予烏煙薰薰死，án-ne 啥物情形是掠外？

消防人員是掠外ê 例，因為人拚生命走去外口，in chit 陣人是拚生命ùi內底衝。

桃園chia 6 名平均無夠25歲ê消防兄弟，拚生命救出2 條人命了後，可能拄著爆火，袂赴走閃，予欲上800幾度e 火活活燒死。

Hit 工暗頭仔，我心情誠沉，轉去厝，我一入去厝，聽見電視新聞ê聲，我某坐佇彭椅，目眶紅紅。伊kā我問，以後你若予派去做外勤，會使莫入去火燒e 所在無？我無應話。Hit 工，規ê 下暗伊攏無kap 我講一句話。

欲睏進前，我陪我欲一歲ê 後生讀故事，唸予聽，那唸頭殼那出現其中1  ê 死去ê 消防兄弟形影。In 後生kap 我後生差不多大，不過，in 後生已經無老爸----ah。

今仔日，最後，我想欲kā 逐家講--ê 是，毋通予無知變做你運命ê 殺手，ài 會 記--leh，『細pha火緊走，若烏煙tō緊關門』ê 觀念，koh kā 你身邊ê親chiâⁿ朋友講。有正確ê觀念，m̄-nā咱會使救家己ê性命，koh會使減低消防人員去搶救hia 錯誤觀念ê民眾走入去救in 犧牲生命ê風險。每1 ê 衝火場ê 兄弟，in 攏有in ê家庭， 可能chit 秒鐘in leh 救人，後1秒 hām kap 厝內人講sá-iok-ná-la ê機會 tō 無。

通人攏認為消防人員是英雄，事實是，阮是一陣平凡koh 再平凡ê 人niā-tiāⁿ。阮出去拍火，干焦siáu想平安--轉-來，向望會使看見厝內人ê 笑容，向望會使看見囡仔長大成人，向望看見作伙救災ê 兄弟平安。多謝逐家，勞力！