2020最新勸世歌

<<2020最新勸世歌>>

1.          各位國親lóng暗安，食飽phò-tāu bóng 哭chhan，增加情感確實讚，時kàu借錢無困難。

2.      免錢講古是我請，我ê外號烏狗兄，內底劇情lóng有影，你tō tiām-tiām chim-chiok聽。

3.          M̄-thang看我體格好，bē輸kha-chhng 真gâu gô，gún ē pháiⁿ-sè你o-ló，今年四十像阿哥。

4.          無食神丹iā仙桃，講是先天he是無，有影訓練ê因果，阮某ta̍k暝kā我po。

5.          先講過去夭壽害，體重超pōng 雙重hâi，行無二步kha tō pái，khùi喘bē離聲聲哀。

6.          咱人愛食nā飯桶，不時sa 物 that chhùi-khang，愈kiâm愈甜愈m̄放，致使soān尿真費工。

7.          M̄是我ài講過去，歷史thang好來知機，學習別人ê慧智，khah好ka-tī孤傷悲。

8.          Hit暝tú-tio̍h生死關，2隻烏狗leh相 oan，我soah雞婆看袂慣，差一點a bē赴soan。

9.          In tú起狂欲來亂，目chiu òⁿ-òⁿ真不滿，喙á開開咬人款，準備hō͘我無周全。

10.      心驚起kha欲來走，soah來poa̍h倒田水溝，狗聲chhan像kā我kiāu，chi̍t路無放綴牢牢。

11.      大聲救人叫阿爸，佳哉溝底水lóng焦，跳來水溝欲來咬，只好出手koh雙kha。

12.      烏狗性地有夠pháiⁿ，人肉m̄是好食材，你nāiau-ki我了解，一切我ē來安排。

13.      明日gún tau ē拜拜，3隻豬公早tō thâi，lóng hō͘你食mā ē-sái，m̄-thang hō͘ 我血sai-sai。

14.      狗á窮實有靈聖，我話伊lóng有tè聽，吠二三聲nā講定，約束tō ài照品行。

15.      你娘你爸好佳哉，chit條性命khioh tńg來，講che白賊是無奈，豬公飼狗真無采。

16.      Siáng知隔工門chi̍t開，2隻狗á起leh吠，搖尾討食iau鬼，叫我m̄-thang無是非。

17.      惡人無膽你mā知，如今án-chóaⁿ來安排，後pái出門tiāⁿ-ē會bái，tio̍h想計策chiah應該。

18.      1工3頓減1頓，1塊豬肉配清湯，禮拜日時chi̍t kóng nn̄g，chhôe-á chah leh chiah 出門。

19.      Ta̍k工運動走3千，腹肚tiāⁿ-tio̍h袂hiah腫，lán ê意志ài堅定，khah贏去點光明燈。

20.      Ka-tī運命ka-tī拚，hō͘in tú-tio̍h心驚惶，橫直運動a無siáⁿ，m̄-thang kap狗sio輸贏。

21.      經過七七四九工，hit暝ē暗霧茫茫，想講烏狗袂pìⁿ-báng，心情chi̍t時放輕鬆。

22.      Hiông-hiông想欲食消夜，跪loeh poa̍h 杯問王爺，烏狗走去烏山嶺，無閒chhih-chhih bē來chia。

23.      準備錢銀來chhia-iāⁿ，歡喜出門好心情，四界看無烏狗兄，月娘笑笑無出聲。

24.      來到南門真pháiⁿ命，tng-tio̍h烏狗駛牛車，明年準備做阿爹，1台牛車真gâu騎。

25.      Phah斷in leh做tāi-chì，chit聲無走kám白痴，我命註定無該死，平日訓練有準備。

26.      四kha烏狗極gâu 走，nā無報仇氣bē消，府城chi̍t-liàn走透透，kui暝無睏bē-thiám頭。

27.      烏狗有影真苦惱，現準走標我siōng gâu，過去怨恨無消tháu，現準koh輸chit隻猴。

28.      Chi̍t路走來kàu打狗，chit聲pān-sè真不妙，chhōe in兄弟來討siàu，看我欲招iā m̄招。

29.      Kui陣狗á nā破病，hō͘ 伊kha̍p tio̍hē上天，身軀lóng 無半sián錢，只有拚命走落去。

30.      來kàu柴城真美麗，chhùi ta kā人借杯茶，hit 人.恆春ê子弟，月琴唸歌使人迷。

31.      Hoān-sè你早tō知影，姓陳名達伊ê名，伊tī chit tah 有名聲，四界走唱hō͘人聽。

32.      烏狗聽曲無tè pūi，坐tī邊á m̄知機，我m̄ chi̍t時無注意，曲調聽來真傷悲。

33.      烏狗笑笑soah-soah去，過去tāi-chì放bē記，in欲來學唸歌詩，聽in虎爛心giâu-gî。

34.      其中原故有怪奇，千萬m̄-thang hō͘in欺，1路拚去台北市，nā無時kàu走bē離。

35.      故事kàu chiah 先 chhé-pái，內容nā無理路來，請你m̄免khǹg心內，等候後期你tō知。

36.      運動健康mài等待，tiāⁿ-tiāⁿ訓練好身材，chi̍t暝ē-tàng來9 kái，你某kah袂chhōe阿財。

2015/12/10