Frankfurt(main)station
現準beh出國ka-tī 去chhit-thô 其實應該是無難chiah tio̍h。有錢(有人無認同)，有閒koh開時間tī 網路chhōe 資料應該lóng 有法度，當然英文總是ái bat kóa khah ē 輕sang。當然你nā koh-khah勇，去he 國家有內戰，saⁿ-put-gō͘-sî leh抗議ê所在，tiāⁿ-tio̍h ài khah chim-chiok。
蜜月旅行本底是beh去希臘，尾--á，改去德國。希臘是gún bó͘講--ê，hō͘ 我phah-chhèng，he 是顧慮安全ê i-toaⁿ。希臘是 1 ê 破產ê國家，聽講本島chián-liú-á koh chē，雅典本島有chē-chē ê 死人骨頭，古廟寺，去--hia
he 絕對m̄是lán ê 菜。Nā beh 去 tō ài 去外島，可比講米克諾斯島kap 聖托里尼島。米克諾斯島講是全世界所有ê khóng色 kap 白色 lóng 用khah chiok chiâu-chn̂g koh sù-phòe，hō͘人有法度完全放hō͘ 輕sang，bōe輸suh 空氣tō má-se-á-má-se。Chit 點hoān-sè 去紅頭嶼，菊島，火燒島kiám-chhài 無kah差chiah tio̍h。Án-ne聖托里尼島聽講是過去失落ê「亞特蘭提斯(Atlantis)」he 有足chē足chē古早古早ê傳說，lán 無歷史追究ê精神khùi力，伊koh有1 點是欣賞夕陽落愛琴海，tī 街á路消遙自由leh 行踏。Che 講起來 實在袂khip引tio̍h 我，tī 網路sa 幾張相片來看，kap lán 西海岸ê 夕陽，m̄ tō是kâng 1粒！我m̄是leh 唸siâu念phí，無，北門海岸ô-á 架1 排koh 1排，日頭落海時，出海人行船，海鳥回航hit 種情景，kám 講lóng無看過？真是了然！真是可憐！無彩人ê錢koh beh 出國看！He tiāⁿ-tio̍h hō͘ bó͘講無lô-bān-te̍k-khuh，taⁿ，你mā 好--ah，去國外to 一定lô-bān-te̍k-khuh o͘h！
Sī án-chóaⁿ尾á，選tī德國？過去tī2013年bat tī 荷蘭Nijmegn 出差3禮拜，去足chē所在，Keukenhof花園，Amsterdam城市，Vaughn藝術館，kinderdijk風車，市集(菜市場合作社)…感覺袂bái。無論是硬體，軟體lóng hō͘ 人感受真好！Che 當然是kap台灣ê城市來比。內容tō 看未來有閒工chiah 來補。人所ài ê是了解歐洲先進國家ê社會生活，nā是差不多，去hia是欲chhòng
siáⁿ？當然，錢伯á nā chē，ta̍k冬beh去toh位lóng thèng-hó出去看看--leh。總--是，lán無本錢。在來是想beh hō͘ bó͘了解歐洲人ê 生活社會，kah免伊giâu-gî我對 1 ê國家ê 想像。良心講伊出國比我khah chē kái，put-jî-kò lóng是東南亞國家niâ。Lán ǹg-bāng--ê是欲看東西方國家ê比較。荷蘭pháng是未來koh有出差ê機會，só͘-tī，我心肝頭所想--ê，tō是德國。
時間真逼，我koh pûn-tōaⁿ，機票先thiah決定出發時間，火車票(德thih pass)，房間開beh 2 工tō 訂好！當然頭起先有做kóa工課。可比講申請1張信用卡去國外lù，有khah濟ê sǎ-bì-sù，che是kā 人請教--ê，hō͘我訂房間省千jōa kho͘ ê 手續費。Chhit-thô人mā是 ài 有1、2步ah，lán chit 點過去khah han-bān，kan-ta死做gōng做活日niâ。訂機票是第一kài ka-tī訂 (無透過旅行社，過去香港， 北京lóng是旅行社辦--ê)，mā 是sit-kak-chhat--去，名去hú têng-tâⁿ，真冤屈，ka 開1600 kho͘，ka-chài ê m̄是上飛龍機前chiah 發現，無--者，tō chhoah屎--ah。訂房間mā是運氣運氣，ka-chài我koh有買1本冊來看，叫lán tō ài tòa 火車頭附近，khah免 kha-báng大kha細kha 拖來拖去。有影，我koh 法蘭克佛 kap 慕尼黑chhōe tio̍h khah 俗ê 房間。Chia--ê mn̍gh-kiāⁿ訂了，tāi-chì應該tō chhun 時到出門平安，ka khah 細路ê行程計畫--chi̍t-ē，chhōe門路thang虛華niâ。錢先到，人綴尾ê概念。
（PS. 香港機場轉機等chhiâⁿ久，ài tán 12 tiám-cheng，tiān-náu ū chah tī sin-khu piⁿ, choán-chiap-thâu
soah khǹg tī kha-báng, bô-ta-ôa, ke-khai kui pah kho͘ káng-phiò. L ）
2015/11/13 寫
2015/12/1 補
沒有留言:
張貼留言