懶魚醉貓e烏白寫: 1日1 kho͘ 銀救台語

2015年11月2日星期一

1日1 kho͘ 銀救台語

< 1日1 kho͘ 銀救台語 >

台語冊無人賣？Chit 句話put-lih-á沉重，有影無？當然有影！Lán lia̍h每1冬出台語冊ê數量，雜誌無算，教材無算來看kám有超過十本？Kám ē趁錢？出冊mài了錢tō bōe bái iā lah。目前固定時間有leh 徵稿--ê，有台江雜誌 (季刊)，台文戰線 (季刊)，台文bóng報 (月刊)，海翁雜誌 (月刊)，教會公報 (週刊)，其中海翁kap台文戰線無提供稿費，筆者 (本人是有固定來投稿表示支持kap 相thīn ) m̄ 是欲來嫌稿費ê問題，是ài ta̍k-ê了解台文界ê困境，是點出台語界ê困境kap sàn-hiong。Lán小想--chi̍t-ê，身為讀者ê你，kám bat讀過chia ê雜誌？Kám bat出錢買過？無，誠心拜託，1冬買1本2，3 百，1日m̄ 夠1 kho͘ 銀，kám有chē？

Iàn-khì？這是當然！2冬前開始gia̍h筆書寫台文，ùi全漢、漢羅 (教羅、台羅) kàu全羅，收集台語冊che lóng 是lán意識認同leh 操作，m̄是食飽siūⁿ閒。主要是民族認同，家庭背景ê關係，老爸老母m̄ bat字，kan-ta ē-hiáu講台語，驚惶父母語無--去。尾--a，朋友有講是「政治狂熱」leh作怪，che mài kap人chèⁿ。生活 ta̍k項tāi-chì lóng mā 是政治，ka-tī m̄願看破而已。Koh 牽--落-去，講siuⁿ遠m̄ 是lán ê主題。

學語言，tiāⁿ-tiāⁿ ài 有工具性ê需求chiah ē學。真不幸，lán ê環境愈來愈排斥母語，無需求當然tō 無人欲ài 有chi̍t ê工具。台語死是緊早慢--ê。koh 講--落-去，tō 真悲觀。筆者ê先拜朋友tō 有影khah 勇，siáⁿ-mi̍h lóng m̄驚。 ( kan-ta 驚無錢出冊niâ，錢伯á m̄答應)。

Beh 冬半前tī台南政大冊局，看俊州兄 1 人tī台á頂講hit本新出刊ê「台灣文藝」 (半年刊，目前siōng新第四，第五chò-hóe出 2015/ 11/3)，伊講khah chhùi角全波，講伊研究ê教會台語史gōa久tú gōa 久，koh tī 網路án-chóaⁿ kap Sakura poa̍h冊買台語史料 ( 買冊買史料，價數隨在主人hoah)。Hit時我hām白語字是siáⁿ lóng m̄ 知。「台灣文藝」冊皮真súi真有設計，聽講mā是伊1 人設計--ê。人後來ná 認真kā看 koh kap 頂面ê雜誌比較，有影無hau-siâu，1粒1，che是雜誌風格，無siáⁿ 好屁--ê。編輯kap美編校長兼kòng鐘che是chiok sù-siông ê tāi-chì。冊koh 縫線，印刷無chhìn-chhái，聽人講kan-ta 嫌字siōng 細，chit 點可能顧慮頁數錢項ê 因素，有影無ta-ôa。Che siáⁿ-ná我chiah 清楚，m̄-tō是尾--a，我mā變成其中1員lah。無稿費人事費，tian-tó是出錢出力，講是有榮光lah，無錢ê sit-thâu 做khah樂暢。是講，chi̍t開始無濟，oān-nā tàu-saⁿ-kang，oān-nā學。心理上hit 悲觀ê成份，有ta̍uh-ta̍uh-á 散--去，he可能是無閒 ê關係。Put-jî-kò，現實面nā無人賣，tiāⁿ-tio̍h ē會怨！是講，有siáⁿ路用？買1 本，台語ê壽命ē-sái koh 延1，2分鐘mā 好，做歷史ê干證mā 好。現此時，koh ài 做推銷 ê 事工。

Chit 本雜誌，有幾ê特點kap 頂懸所講ê雜誌週刊無kâng。內底有chē-chē過去教會台語作家出土 kap 紹介，有替過去台語文學性重新來贊聲koh hō͘ khah chē人了解台語文白話字ê歷史是chiok早tō有--ah。無人讀過，當然m̄知，學者知影koh bōe giàn讀，tian-tó來phì-siùⁿ 唸siâu 唸phí，he tō ka-tī phóng 屎抹面--lah。聽講年底俊州兄有出2 本冊 < 台語作家著作目錄 > kap < 台語文學發展年表 >，lán 可能ē-sái koh khah 清楚台語文歷史ê原貌，洗清台語文ê枉屈。當然1 ê人1 支筆，有限mā 會有têng-tâⁿ，che 俊州兄ka-tī真顧謙，有準備hông批ê心理，這mā是學者ài 承受--ê。年底hia 2 本冊lán chiah koh tàu宣傳，he是台語界ê福氣。用字是chit本雜誌其中 chit ê特點，漢羅主張，che lán無kah-ì koh 辯 koh說明。Nā beh講，讀者thèng-hó提內底『脫線爆笑劇』來看--chi̍t-ê，ka-tī án-chóaⁿ用全漢書寫，試1 遍tō了解。

Siōng新2期筆者我有參與，用耳空聽1字1字寫--落-來。俊州兄comments 講mi-mi-mauh-mauh，ka-tī 有sió-khó͘ pháiⁿ-sè ，he 是個人才情問題，chit點我有知覺。筆者無kàu 2 冬ê功力，做khah án-ne，ka-tī ài 偷笑--ah。在內，筆者對興趣ê mn̍gh-kiāⁿ ēkhah 厚面皮，mā m̄驚別人講，別人牽教，che lán lóng歡喜接受。Tńg來想，脫線爆笑劇內底ê台語，有影讚，有影純，講無華語khùi tō真有影。讀者chi̍t開始先聽，試看māi 有才調寫筆錄無？尾--a，tō oān-nā看，oān-nā讀，chiah 知我leh 講siáⁿ，無法度騙ka-tī LÔ-MÁ-JĪ ê 好處。所致，tī che ê過程中，tiāⁿ-tio̍h koh ē發覺台語書寫ê問題。時kàu nā koh beh討論用字問題mā koh ē赴。Ah-ná 文學性問題是個人主觀，另1 點，是你讀gōa chē台語冊，beh kap 人來討論？koh 有時代背景beh chhàm--落-去討論無？讀che，先讀hō͘ 爽，心適chiah有法度來了解。