民間唸歌--台語文學ê底蒂

<民間唸歌--台語文學ê底蒂>

Beh講台語文學，thèng-hó thiah做2項，第1 是台語，第2 tō是文學。筆者朋友老師Marcus ùi 1829出世到2014年有leh寫作ê台語作家列beh二仟外--ê < 台語作定名單草編;台灣文藝 No3.2 2015 >，che 算是未來台語文學史siōng好繼續來稽考ê史料。台語史料無親像lán人知影 hiah-nih少，是lán m̄知kap 無知。有興趣--ê，來對名單，頂懸bat幾--ê，bat讀過in ê作品--無？M̄-thang soah kap人來大細聲，che 本身tō是1種自卑 ê心理。文學有無ê分析，tiāⁿ-tio̍h khiā tī歷史時間空間來講，1種同理ê心情 khiā kâng路看，m̄是用主觀ê目尾掃掃leh，判伊「低路」學術性ê刑。讀者chún-nā讀過超過400本用台語寫ê冊，便ē-sái了解筆者想beh講lán台語ê變化，台語ê好bái。Che無免學術，正常人語感niâ。講che m̄是欲phoe作家ê台語好bái，lán了解歷史運命hō͘lán ê困境，是beh應對學者tiāⁿ用「學術」ê名義來lia̍h伊ê話尾，無，taⁿ，你是看gōa 濟冊，欲ka人指教？M̄是讀冊tō有gōa giang，mài誤解。有tō有，無tō無，m̄-thang看1本tio̍h講kah去過全世界。濟人三十六招，tiāⁿē用hit招，用字ê問題？Siáⁿ！看無PE̍H-ŌE-JĪ，漢羅lām pháiⁿ看樣！Che m̄是hông看破kha手，博士博用hoah--ê tō 有，m̄ bat字kiam thái-ko！Èⁿ，看hō͘ 詳細，是台語文學a̍h是文學台語。文字kap語言 ê交插，變作畫符á ê美術觀。

頭前無影hiah氣phut-phut，是有tām-po̍h-á 無法度消tháu ê 心情！過去有人講台灣國風，將褒歌，唸歌七字仔講是lán ê 寶，無--ah，昨日11月22號拜日ē-po͘ 楊秀卿先--ê kap in sai--á tī台灣文學館辦從藝70冬音樂無gōa chē人來，sī-án-ná 國風kiōng-kiōng beh tiāⁿ--去！現場有人phah楊先--ê名，講是in ê sai--á，soah 佔人場thi̍h欲20分，現場人lóng gāng--去，世間大面神leh演！聽講府城是台語文化ê大本營，he m̄ tō 是笑詼1 齣，無thài ē án-ne-siⁿ！原汁原味ê台語 soah無人 beh ti̍h，大聲 hoah 文藝有限，目頭gia̍h koân-koân，phì-siùⁿ民間文學，lán ê國風，底蒂！Koh 搬演學術性ê論戰，tī牛墟內拚輸贏。台語m̄-chiâⁿ台語，ka hiat-ka̍k 強勢論述演化ê干證，he m̄ tō 是ka台語判極刑，koh 再leh gia̍h大旗來做頭。掀冊lia̍h句，有影茫茫，所認bat ê台語模樣tò͘ tio̍h 厚厚ê北京味。是lah，有sián ê 頭，tō ài 2 片鏡chiah 看 ē tio̍h。1 片鏡是反省，án-ne 另1 片鏡 我chiah 送 hō͘ 你，thang 好治療！

講hiah chē，m̄是叫你看醫生，是ái加讀冊。舊年底台灣文學館出1套台灣民間文學有聲冊，he tiāⁿ-tio̍h是lán台灣國風再現。Lán民間tòe ē tio̍h時代，ka 民間唸歌，採集褒歌kap民謠做有聲冊thang好治lán ê耳，用漢羅lām寫治 lán ê 目，che 比十全大補湯kap大神丸koh-khah補！硬beh chèⁿ，無，去買來看，全改寫漢字，ka-tī 唸看māi leh。放--落-去聽，是m̄是ē-sái想像內底無kâng層次ê語境，透過聲，遊走tī歷史空間內，走lia̍h字句之間失落ê詞khiú lán失落ê魂，挽回錯亂ê聲調。Che 是另1片鏡，照你我ê 驕傲 ê 死人面。「承認」chiah 是路，che 是siōng好ê肥。總--是，chē知識份子腹腸e̍h，面皮po̍h。Chit 套冊聽講市草無好，taⁿ，讀者你1日1 kho͘銀救台語，1工開半點鐘讀聽，買來看māi leh，免聽筆者1支喙leh phùi。筆者少讀冊koh無博士博ê認證，論台語文學ê底蒂，確實無合，無，the̍h去問你爸á母長輩序大in tiāⁿ-tio̍h會知 chi̍t 味，台灣真正ê味。

2015/11/23