束pa̍k ê 力量

<<束pa̍k ê 力量>>

我bat 看一本冊，看幾á pái，冊名叫做<<斷、捨、離>>。是日本人寫--ê，內底chē-chē lóng lán人ē-sái the̍h來做人生 ê 警句良言。尤其是現此時ê 社會，政治，經濟kap 環保議題，siōng 至要 ê 是重新修復lán 人 ê 心靈狀況。Kā 束pa̍k lán ê thài-ko mi̍h--á lóng 總 1 ê 1 ê tàn-hiat-ka̍k。

Lán the̍h 目前台灣政治來看，國民黨 tō 是 1 ê 例。伊kā lán 統治beh 70冬，koh 想beh 接sòa 明年hōaⁿ總統大位，這m̄是看台灣人無？看台灣人 1 ê 比1 ê khah phàn-á？

展開歷史，二二八事件，白色恐怖，禁台灣話，koh 不時kap 中國偷來暗去，講貨貿欲 kā 台灣賣--掉，無看māi無ài 聽lán台灣人ê心聲…chē lóng 舉例舉bōe了。雖bóng 這幾冬lán 有 khah 覺醒，不而過，in a̍h-sī beh 趁最後1 口khùi kā lán 拆食落腹，永永遠遠無hō͘lán 有重生ê機會。Che tō 是 chē chē 台灣人到taⁿ iáu-goân m̄願覺醒，hō͘ in án-ne 束pa̍k leh。過去ê 殖民統治，kā 台灣意識洗khah 無chhun lōa chē。總--是，lán ài 想辨法 tháu hō͘ 開，bô-chiah，後代kiáⁿ孫beh nā 有未來？做in hia 政治làu-á ê 棋lí-á。

親像 chit款政治làu-á，kan-taⁿ 注心 tī in ê 政治計算，無顧台灣人 ê 飯碗，早tō ài hō͘ 倒！無lán tō 一世人，食烏心油，食烏心食品，suh lap-sap 空氣，風颱天驚崩厝，塗水流淹四界，lóng免扛去種！Taⁿ leh，kan-taⁿ 煩惱in ê政治地位，70 lōa 冬 ê 統治，a̍h koh thio 無夠，繼續m̄ 放lán soah！黨產繼續累積，lán ê 稅金 lóng 變成in 私人 ê sai-khia！連戰in tau 三四代做公務人員，財產世界排名竟然會得鼎，這是lán ê théng-sēng。Lán tō khau-sé ka-tī講che 是『台灣奇蹟』。馬英九án-nóa耍弄司法，檢查官變做伊ê ka-lé ang-á 不時為伊開後門。Che lán ài 感覺見笑，台灣人ê 智慧選chit ê m̄-siâⁿ-lâng做總統！Koh 有hia 國民黨內chē-chē ê sut-á-kiáⁿ，林益世，賴素如，柯朝欽，劉政鴻…等等，tó 1 ê hông lia̍h去關？Lán 抗議niâ，tō叫警察hám lán 學生gín-á，派水龍á車沖，硬拖流血流滴。看文章ê你寫文章ê我，kám m̄免有責任？Lán 有出聲無？有行動無？心肝頭koh有siáⁿ-mi̍h 束pa̍k--tiâu leh？

昨暝in國民黨ē-sái 耍弄 ka-tī ê 黨員 ê權利，hia ê 支持者 kám 有影hia 無良心？是，in tō 是無！In hām ka-tī-lâng to beh thâi！這無良心--ê，tō 是lán chhī --出來--ê。莫怪lán ka-tī號鬼島chit ê名，tō 是有chit款pháiⁿ-mi̍h-á，tō是有chit 款惡鬼寄生tī台灣。我m̄是beh 替洪á秀柱講話，chit 款人mā m̄值人替伊講！Beh講1 點是，台灣是lán--ê，目前叫鬼島，siáⁿ-ná是鬼島？Tō是有國民黨chit 款pùn-sò leh kā lán 凌遲！Lán koh hō͘ in 束pa̍k，無法度自由，無法度發展，無法度大聲講ka-tī ê 話，1 條『大中國』ê 鍊a pa̍k-tiâu-tiâu 叫lán 做 in ê 奴才，ài kā 跪大聲叫『主人』！你講，lán kám m̄是台灣人，台灣 ê 主人？M̄是，太平洋kap台灣海峽無khàm 蓋，做你去，mài 來ko-ko-tîⁿ。

國民黨束pa̍k--ê m̄-tō 是 lán ê 靈魂？無放sak chit 款 thài-ko-mi̍h，kap in 斷絕關係，心肝nā會清，生活怎樣平靜？明年選舉tō 是1 ê 機會，1 ê重新ê機會，hō͘國民黨倒，台灣才會ta̍uh-ta̍uh-á好！好thang完全脫離過去大中國 ê思考，成做台灣人ê意識，成做台灣獨立ê目標。

2015/10/18