論閱讀--「做一个母語作家是人生上好ê投資」

 

論閱讀--「做一个母語作家是人生上好ê投資」

 

咱m̄是天才，一出筆就會曉寫，何況是hŏng thún-ta̍h hiah-nī-á久ê母語。窮實，市面上已經有put-lih-á濟ê華語工具冊，教咱án-chóaⁿ寫，是講咱觀察mā是頭á興興niā。假使讀著無興趣，m̄知影án-chóaⁿ讀，iah-sī欣賞，講寫會出來會hŏng感動ê mi̍h，這有影就較oh。

 

咱有一位好朋友施á俊州，論家己「m̄是一流作家，卻是一流讀者。」咱mā m̄是欲做一流讀者。是欲kā家己講，記錄生活掠外，除非你生活不時充滿值得寫ê mi̍h，nā欲維持寫作，你tiāⁿ-tio̍h就ài óa靠大量閱讀、甚至是tài有功利、意識性ê閱讀，才thang加添你寫作ê範圍，深度kap闊度。

 

有人問寫作無靈感，án-ne差不多是下跤二種情形：第一，生活kho͘-á傷過e̍h，第二，無siáⁿ leh讀別人ê作品。有寡作家，mā有可能寫真濟mi̍h，總是，走脫袂出一寡個人歷史ê心情，我個人mā有chit款問題，he是落尾家己閱讀別人ê作品發現家己有仝款ê症頭，你nā母語作品看濟就知。Chia m̄是欲批評，he是歷史造成ê，是欲講這就是「機會」，ài行無仝款ê手路，hō͘母語闊度提升。Nā無閱讀，當拄用母語寫ê你，可能會行先輩過去行ê路。這mā是學習過程，mā是個人啟蒙ê過程。咱m̄是講這無好，是感覺較拍損，ka-ná行袂出前世代ê影跡。透過閱讀，hō͘家己ê kho͘-á hùn--開，靈感是ài家己挖出來ê，m̄是hiông-hiông雷公kòng--tio̍h才會有。

 

對母語寫作ê人，koh有一種長期自卑ê個性。講無資源，欲讀母語冊真少，母語環境真欠缺。這咱lóng同意，是講，bē-chêng做就哀，是欲án-chóaⁿ行會遠leh？

 

窮實，現此時母語已經有koh-khah好ê政治環境kap科技ah，有台語電視台，語言平等法通過，網路有電子字典，輸入法…等等。早期我kā圖書館ē-tàng借ê台語冊lóng轉來看，少bóng少，內底ê台語mā kap我ê語感khah bā。我捌初估2020出版ê台語冊上無是2019 ê 2倍。有影，nā經濟上無問題，thīn母語作家交關in ê冊是就是參與社會運動。我個人是óa靠文學獎獎金kap投稿稿費，「koh再投資」，買冊不時吸收，分析欣賞文本才有koh-khah濟想欲寫ê題材。欲講我ê靈感是買--來-ê，讀來--ê，這有影對對對！

 

敢一定ài讀台語冊？台語冊敢逐本lóng好？任何語言出版ê冊tiāⁿ-tio̍h有好有bái。除非你kap我仝款有收藏台語冊ê phiah，kap有相對上獎金kap稿費來源，無，就好好á讀幾本á經典就好。這有一點仔違背頭前講ê大量閱讀，不過這ē-tàng靠讀華語冊來補，chit點咱等ē才來講！讀寡好ê台語作家，就是「功利kap意識性」ê閱讀。比如講，讀陳雷，陳明仁ê小說好通理解台語kap華語ê精差、小說ê結構，讀陳正雄著獎ê作品才知台語詩kap我寫ê級數無仝。提chia三人ê做標準，koh去讀其它ê母語作品，問家己差佇佗？Koh講一pái m̄是欲拍分數，是欲訓練閱讀ê素養，敢有合味無？

 

台語閱讀ê素養，認捌羅馬字是第一。M̄-thang看羅馬字無，sui-bóng羅馬字mā是字是一種常識，總是有誠人，甚至是文學獎評審mā leh phì-siùⁿ。咱才tiāⁿ-tiāⁿ比文學獎時食虧，逼咱文稿使用全漢，感言全羅。算來這是咱佇體制內做ê抵抗。閱讀陳雷、陳明仁ê作品愛有意識性觀察in ê台語詞比較其它台語作家，你若有法度分別出來，代表你ê台語素養相對上有進步，有利益tio̍h。我觀察chit幾年來，台語寫作確實有進步袂少。總是，無認同羅馬字ê人永遠是袂進步，寫二十gōa冬lóng仝款。

 

華語作家敢lóng讀華語冊niâ？誠濟好ê翻譯冊敢lóng無teh讀？就是寫了好，有市場需求，才會有人欲翻作華語。Lia̍h母語作家來看，更加袂使欲讀台語作品不可chit款想法。當時仔，你手頭hit本台語詩集，你用「華語」讀，hoān-sè無知覺he是台語冊。所致，有母語意識leh讀是一種tiau-kang訓練。這thang 幫贊你ê作品kap別人加khah「正範」。任何人講語言會進化，落尾無語法精差…等等ê評論，讀in ê作品ài khah斟酌。

 

簡單講，你試看māi提一本華語冊，用台語念，袂曉ê詞，查辭典，tiau-kang翻譯出來。音樂無國界，文學敢to有？語言、歌詞有法度百分之百翻譯？因為無可能，咱才欲寶惜咱ê母語，kā寫--落-來。如果你煩惱無靈感，橐袋仔錢無，有意識性讀華語冊是母語作家袂當放棄ê代誌，因為he m̄-nā是咱目前環境上多元ê寫作內容，mā是咱圖書館上濟ê冊。免開你一銑五釐。

 

閱讀上大ê開銷是時間，絕對m̄是錢項。誠濟人讀誠濟冬ê冊，落尾m̄知影leh讀siáⁿ，愈免論講有gōa濟寫作出產。咱mā是chit規冬來，才有hit lō意識去修正，透過閱讀kap寫作ê循環沓沓仔進步。臆看māi，拍開咱學習ê通關ê chit款冊敢是用咱母語寫--ê？Nā m̄是，che是m̄是咱母語作家ê好機會？欲寫作進前，先問家閱讀ê功夫下gōa濟。

 

2020/1/17-18

短論--「做一个母語作家是人生上好ê投資」

 

 

短論--「做一个母語作家是人生上好ê投資」

 

有一本冊叫做《寫作是最好的自我投資》，內底有講著袂少為何現此時人按怎看「寫作」chit 項代誌，提升自知度、影響別人，按怎做，會面對著啥物困難，落尾成功趁錢…等等。這是一本予對寫作ê人有一个真好ê指導kap方向。冊寫了真淺白，咱友志想欲用母語來寫ê人，更加愛來讀。是講我毋是單單欲推chit本冊予咱友志niā-niā。因為咱有koh-khah大ê野心，「做一个母語作家是人生上好ê投資」。

 

人生上好ê投資，因為寫母語是少數人ê堅持kap驕傲ah。這敢to解釋？去街á路問一下，有gōa濟人袂曉。

 

是講你敢無發現，台語市場包括文字出版、音樂，電視煤體愈來愈濟使用母語？這敢毋是一个好趨勢。咱kā咱友志講，想法ài tòe著時代，mài行出去。濟濟人陷佇「台語文學」，「文字」頂懸gōng-gōng-se̍h真拍損。你敢無發現濟濟華語作家一支跤踏入來母（台）語ê創作是為何？咱大膽下一个較正面結論，這是怹人生上大ê突破，kap早期濟濟台語前輩仝款。

 

「投資」二字無影較現實，時間就是一種資產。咱照鏡看家己，看人生你想欲留落來siōng價值ê物件是啥？

 

母語寫作就是社會運動。有人偏愛文字討論，咱早期mā是ùi使用漢字開始，漢羅到用全羅寫日記。這是需要時間練習eh。任何m̄捌羅馬字ê人，的確欲討論母語是khah oh。這m̄是咱chia欲講ê重點，我個人認為漢羅lām寫是1種資產配置ê概念，mā是上符合目前ê讀者市場！當然，有人tiāⁿ-tio̍h koh有話，是講你敢知chia幾冬，我使用漢羅投華語詩刊有gōa濟？我用漢字參加文學獎，用全羅寫感言，台頂宣傳咱ê理念。He有gōa濟華語作家ta̍uh-ta̍uh-á出台語冊，你到今有gōa濟建設性ê行動？對siáng有利益著！若無，你ê「投資策略」是有問題。Koh講一擺，咱ài換位思考，才通延續台語ê歲壽。

 

母語寫作就是個人運動。有人看著文學，soah台語重頭輕，mā有人講有台語無文學，咱不時mā看tio̍h台華頭人lóng冤家量債。咱mā無想欲參戰，mā無hiah大ê權，改變siáng。家己問家己就好，你一冬讀gōa濟文學冊、母語冊，是欲討論siáⁿ？母語初學者敢免ùi生活講起、寫起，kā強欲死去ê台語khioh轉來？Ia̍h-to袂曉走，就想欲飛？這就是我個人感覺想欲寫，學母語ê人看袂明ê所在--想傷濟！有話就講，有話就寫，這m̄是直接，m̄是真自然？論真，做袂到是m̄知影方法，是無練習，無自律ê精差niâ。所致，m̄-thang大心肝，照起工án-ne才行會遠，kap人生仝款。寫作人生，人生寫作！

 

我個人用台語寫日記，7-8冬，lóng mā是用làng làng-phāng ê時間寫ê，khêng-si̍t mā是為著欲練習台語。咱毋是專業作家靠這趁討，皮帶hâ kah chhun一支骨mā是iau死，這甚至少數華語作家做ē到niâ。何況欲撥工寫khah有文學ê作品。建議逐家去認捌蔡培火，用白話字寫日記，寫詞譜曲白話字之歌，編字典，「十項管見」是上有名ê著作。伊加入中國國民黨，佇體制內sak台語文，he koh是另一點值咱思考ê代誌。母語寫日記，一兼兩顧，對母語能力提升kap家己人生有一个負責ê態度真正不止仔好。

 

咱掠這个題目「做一个母語作家是人生上好ê投資」來探討，真oh tī一篇文章講完，咱向望引一khah無仝款ê思維hō͘讀者來思考，尤其咱tiāⁿ-tio̍h ài學習『華語』界，che我知濟濟先輩無啥認同，是講in敢攏免讀翻譯ê作品？接sòa落來nā有機會chiah koh來講kah幼leh，咱母語ài按怎做才好？當然，nā有法度吸引友志作伙行，這就是我上大ê利益。Làu一句網路話母，nā有感覺心適，請chhi̍h讚，kā阮o-ló，分享！

 

 

2020/1/16