阮tau就是圖書館

 阮tau就是圖書館

主題: 圖書館是一个所在。有各種ê冊，解答所有ê疑問。

目地 / 動機：吸引gín-á閱讀。向望培養gín-á對閱讀ê好慣勢。

Chhōa阿齊去借冊，伊問chia為啥物有hiah濟冊？

阿爸ìn伊，這叫圖書館。所有ê冊lóng ē-tàng借轉去看，koh免錢neh。

阿齊講內底有啥物冊？敢有我佮意看ê冊？

有ah，親像你上佮意看ê恐龍，有寡冊lóng有特別紹介o͘h，koh有足濟足濟ê插圖，有--ê畫tio̍h足古錐。

親像伊會講佗一種恐龍愛食啥、會siû水袂、會飛袂，有--ê走足緊、有--ê ām-kún足長、有--ê身軀全全刺。

你看伊koh有聲音neh，chhih chit粒就會有恐龍ê聲走--出-來。

好，我欲借。阿爸你看koh有動物園neh。

Ho͘，你ē-tàng借轉去，先看一擺，後擺咱去動物園你就會當認真濟動物o͘。

好，我欲借。這是啥物冊？

Chit本是水果歌。伊koh有CD。阿爸ē-tàng唱一擺予你聽，後擺你就會使綴CD練唱喔。你看內底lóng是你佮意ê水果，龍眼干，ná-pua̍t-á…。

龍眼干，三兩半，你點燈，我來看。

龍眼干，三兩半，你點燈，我來看。

看啥物，看新娘，新娘美tang-tang，嫁好尪。

好，我欲借。伊內底無火龍果neh。

無愛緊，阿爸另工才來寫，寫予你唱，好m̄好？

好喔！

這是啥物冊？這足趣味ê，畫ê誠sui，我敢ē-tàng借? 

會ah，這是leh教色水kap圖形

這是欲hō͘較細漢gín-á leh看ê。你細漢，阿爸mā借袂少即種冊予你看，你敢會記eh？

有lah，這借轉來予妹妹看好ah。

真讚喔，有想著妹妹。Án-ne 妹妹逐工lóng會進步neh。

是ah，阮足愛妹妹eh。

這是啥物冊？這是算數。算一，二，三，四…。

你最近轉來lóngleh唱指頭仔歌，he就是算數ah。阿爸放予你聽ê數字歌，就是欲予你知影數字喔。以後你若去seven買優若乳，有找錢，你愛數看māi錢額是m̄是著ō͘。

你敢會記數字歌按怎唱？

一二三，白鴒鷥穿白衫，四五六，一隻牛兩支角。七八九，十隻狗四界走。Ná走閣ná吼。

著著著，我會曉唱。這本我無免借，我會曉。

一人一張卡，干焦會使借20本。你kap妹妹二人會使借40本喔。不而過，你借hiah濟，敢看會了？

會啦，你陪我讀就讀會了lah。阿爸你嘛ē-tàng借，阿母嘛ē-tàng借，阿媽lóng ē-tàng借喔。

按呢，咱ē-tàng借足濟足濟本hoonn，借hiah濟冊，厝就變成圖書館ah。哈哈，阮tau就是圖書館啦。

2021/8/26