2018年9月27日 星期四

拍交落的亡魂


n   拍交落的亡魂

彼日佇台南法院共你殕黃的宣判書掀三遍
閣對恁一陣人的跤跡到台南監獄
就是現此時的Shinkong michukoshi[1]
捒開重khuâinn-khuâinn的玻璃門嘛掀開你的生死薄
冷氣位你的鼻面喙大力揌--落
頷頸的索仔痕閣開始沓沓閣滲（siàm）血
今，你心悶誰人共歷史割引二一添作五出賣
殖民者的銑聲催死恁的氣魄
今，彼張討日檄文敆著時代的青狂不目
拍無去

我綴你的記持倒踏[2]
先位香煙茫茫的西來庵行--過
看見王爺惡khia̍k-khia̍k的目神
迵過我屈服殖民者的靈魂
你憂結結的面腔袂輸看無尾路的款
我那流凊汗手那掣想欲共你額頭厚tut-tut的烏雲戽--走

我掰開你記持的路草
行過喝殺喝刣的南庄
鼻著一罐一罐心狂火𤏸的火油點𤏸你的無奈何
聽見日本警察佇火海咒詈恁世代囝孫
今，帝國天皇過盤食銅食鐵的王鹿仙
我驚無細膩予你看出咱共同的命格

重新共你的記持插枝
行過予日軍銃雨沃甲血sai-sai的噍吧哖虎頭山
我袂怪你愛使性地搬彼囉厚譴損[3]的漚戲
無竹篙鬥菜刀、淨符護體，欲啥步？
掘番薯、抾生芎蕉渡三頓是欲按怎佮人輸贏？
你問我咱當時仔[4]袂閣出脫！
強強欲萎去的頂八卦欲按怎hiúnn[5]？

掀到你記持的上尾頁
綴你粗跤赤手走路到王萊庄
佇狹櫼櫼的房內啉酒喝喊、
聽見你堅心的喟口用一生硩孤注
煞嘛無為時代變遷來變撚[6]

踅到遮染血的坑崁
散掖掖的骨骸親像挕掉的薰頭
遐紙頭無名、紙尾無字的孤魂
跤鐐閣咬死死佇跤盤
歷史裝飾恁的餒志化做一場閣一場的爆笑局
剾洗恁的血汗、訕潲[7]恁反抗的決心
無人看恁真有腳數干焦怨嘆恁無認份
就是按呢，才害王爺公著磨
今，一身軀閣hông呸痰呸瀾
洗袂清的穢涗

我共恁無人致意的歷史窮斤算兩
毋是刁意故共咱獨立的向望漲懸價
是欲共hông抨佇壁角的驕傲抾--轉-來
親像老曲盤的坱埃清洗清氣
閣予世間人疼痛恁所疼痛的即片土地
予恁的香火傳--落-去…

[1] 新光三越，日本名。
[2] 倒數。
[3] 厚譴損:迷信。
[4] 當時仔:有可能。
[5] 指有能力去達到的意思。
[6] piàn-lián。隨機應變的意思。

By 於
標籤：

沒有留言:

張貼留言

訂閱： 張貼留言 (Atom)