阿文連回歌 第二集

<阿文連回歌 第二集>

1.         各位國親ta̍k-ke 好，koh欲kap lín 來lî-lô，châng暝m̄知好睏bo̍h，khah緊起來放屎膏。

2.         chit kái欲sòa第二集，唸歌hó͘-lān 是tú練習，故事欲聽mài趕急，nā有kah-í tio̍h買專輯。

3.         阿文做人真tiau-tî，靠勢好額無義理，hoah風有風nā hah-hì，權力當作chhit-thô-mi̍h。

4.         細漢讀冊免人教，智能超過有三百，出世3歲會phah-獵，雙kha中央加1支kha。

5.         朋友lín聽tō知影，膨風hàm古滿稻埕，八字輕重已經定，hau-siâu 代誌人愛聽。

6.         阿文同學是阿清，阿清讀冊有精英，tòa tī chng尾真hiau-hēng，欲渡三頓真不明。

7.         阿清幫伊寫功課，hō͘ in 四界lōa-lōa-sô，phāⁿ -chhit開錢遊 phah-poh，食飽閒閒惹風波。

8.         畢業證書是錢買，欲講英文會連回，人人kā伊當笑詼，chit kho͘ 學歷有問題。

9.         不時大聲leh講話，月給仟萬講無濟，he是實力ê關係, m̄是伸手厝內the̍h。

10.     阿清心內真怨嘆，嘛是堅心克艱難，信靠上帝有幫chān，m̄-thang失志tiāⁿ哭chhan。

11.     阿文笑伊真散赤，sán koh po̍h-pán hō͘ 鬼lia̍h，後pái出世欲好命，規去緊叫伊阿爹。

12.     美金做床激大牌，阿文chháng-chhio 真 hiau-pai，1 支lān-chiàu tōng-tōng-hàiⁿ，袂輸khōng金欲hông知。

13.     阿文siáu想做市長，一票五萬金十兩，做官好thio真gâu 想，有錢ta̍k-ke lóng 會收。

14.     阿文高票來當選，烏西金額有周全，行無三步tio̍h 歇喘，緊吞1粒大補丸。

15.     笑咱ka-tī無志氣，看錢目花心chiâu開, 有錢無收會礙胃，chhan-chhiūⁿ tòng-gōng大kòng-tûi。

16.     阿清命運有kàu 慘，chhōe 無頭路目kho͘ tâm，一身功夫hông 暗khàm，目屎攪môe作伙kâm。

17.     Mài怪我來使lám-nōa，今ná故事有拖沙，小弟屎尿kiông欲chhoah，全全in-toaⁿ無ta-ôa。

18.     阿文阿清ê故事，先唸kàu chia 免tiû-tû，後壁精彩iā koh有，後回tiāⁿ-tio̍h 唸khah久。

19.     人講nā老無路用，萬項代誌mài khut-kiông, 幸運成功 mài sioⁿ thiòng，nā無tháu放會內傷。

20.     內傷欲醫真簡單，想欲斷根無困難，不管你是好額散，即包藥粉有幫chān。

21.     食飽三頓配1包，七七四九工nā kàu，放屁大聲lóng袂臭，任何癌症一定hâu。

2016/7/20