阿文連回歌 第一集

<阿文連回歌 第一集>

1.          各位國親真gâu早，欲聽 niú-suh ài chhōe我，今ná日頭有kàu熱，樹kha納涼聽唸歌。

2.         欲講阿文連回代，眾人咒伊屍無埋，無親無chiâⁿ欲kā拜，狗仔啃骨血sai-sai。

3.          阿文橫霸佔黨產，pián人家伙真áu-bân，烏心事業錢照趁，不時害人leh哭chhan。

4.         阿文老父有出名，反背國家叫人爹，祖傳絕招leh好額，眾人起chhoh kán-in-niâ。

5.          Chit 口灶人真òe-sòe，串靠關係炒地皮，散赤羅漢睏墓地，hô͘-sîn báng-á四界飛。

6.          Koh佇網路賣毒品，我講ê話有影真，各位朋友nā m̄信，chiah問網路大面神。

7.          投資事業是真闊，罕見動物做冷盤，你nā看著留chhèng汗，赤iāⁿ熱天起畏寒。

8.          建設工廠重污染，有毒溪水人人閃，空氣烏煙無檢驗，無人hoah聲敢kā嫌。

9.          Gín-á體內毒素積chiâⁿ濟，絕症無醫無té賠，政客講che無啥貨，kan-taⁿ sô頭激笑詼。

10.       Hiau-hēng歹德天公知，無照天理有主裁，全全記佇簿á內，十八地嶽有安排。

11.        Hit 日in tau tah烏雲，淒慘狗螺聲無hioh-khùn，雷公sih-nā siòng準準，chi̍t-ē tō hō͘見閻君。

                                                       

12.       烏白無常來lia̍h人，指名姓連頭1孔，tōa kho͘ chhū 食ài眠夢，欺騙社會是內行。

13.        阿文chi̍t聲siàm屎jiō，哀父叫母起走標，siáⁿ知siang kha tiàu大石，hō͘伊tiām-tiām袂起chhio。

14.       Phah落十殿等發落，m̄是tī hia leh chhit-thô，三頓照phah吞屎膏，燒鼎抱tiâu kiāu牙槽。

15.        Ngeh-á gia̍p 舌 soah hô͘-chio，khah sóng 去食青丸藥，想欲hoah聲袂當叫，nā無等下真歹thio。

16.        阿文才知有地嶽，想起過去真不目，仁義道德無知覺，心肝頭仔足刺chha̍k。

17.        後來故事怎發展，看我án-chóaⁿ 吐liân-siân，m̄免khioh錢siáⁿ lóng免，輕鬆聽古小神仙。

18.        Soah看時間已經晚，我欲來去洗溫泉，nā欲繼續聽我chōaⁿ，燒酒kōaⁿ leh 後1 攤。

19.        阿文故事有精彩，社會事件lín lóng知，做人端正tiāⁿ食菜，四kha落地m̄-thang thâi。

20.      日頭已經來落山，歌仔cha̍h-chí 先kàu chia，勸你朋友nā落kiā，維骨力tō ài賣來食。

21.       我chia tō好有thang賣，1 粒kài俗仟佰八，你我兄弟有交陪， 食pháiⁿ腹肚mài相chhōe。

2016/7/14