選舉公報並列羅馬拼音

圖：臺灣教會公報

<選舉公報並列羅馬拼音>

今年3月25日<選舉公報並列羅馬拼音>一案立法院三讀通--過(按：公職人員選舉罷免法第47條條文修正案)。未來原住民籍候選人ē-tàng照ka-tī ê意願，tī選舉公報頂懸使用羅馬拼音kap漢字書寫來刊登政見。咱歡喜見證chit ê 時刻，原住民轉型正義ê事工有leh進行。而且民進黨花蓮市長補選候選人張美慧佇7月11日tō用阿美族羅馬字來寫政見，che算是台灣ê一大進步。

法案規定是原住民籍候選人，張美慧kám是原住民？Che咱無清楚。總--是，法案應該袂使限制chiah tio̍h，che chiah 是民族多元ê參與。咱看見chit條法文，soah心酸酸，台語，客語--leh？教育部mā早已經公佈台、客語書寫系統，何為chit ê法條無加台語、客語？何況講台語--ê kap 客語--ê ê人數kám 會比原住民族人數少？語言kám有平等？過去母語hông迫壓m̄-nā 原住民語--ah。

Koh再講原住民語言使用羅馬字lóng是早期傳教士傳落來--ê，台語，客語lóng有。台灣第一份報紙koh用台語羅馬字寫--ê ，已經佇1885年7月12日tō發行--ah。是án-chóaⁿ 立法委員無想tio̍h chit點？四--月ê時管碧玲sak「國家語言發展法」nā是真正想欲來推sak，應該tō ài kā台語kap客語加入來chiah 是。Kan-taⁿ 限制原住民語，實在hō͘人想無。

咱欣賞立法委員 Kolas Yotaka ê 拍拚為伊ê母語，ē-sái理解，相對hia講台語、客語ê立法委員實在差一大步。

2016/7/13