Siáⁿ？ A-tok-á學台語，講台語？

< Siáⁿ？ A-tok-á學台語，講台語？>

我國中讀冊ê過程hō͘我chiâⁿ痛苦，高中聯考liáu-āu我想欲學1項運動，ē-sái hō͘我chiâⁿ有活力koh ē-sái tháu-pàng壓力。尾--a，我好朋友Phùi-that-á 問我欲phah劍道無，我tō去學ah。我學mi̍h-kiāⁿ其實lóng 3分鐘熱度niâ，不過，chi̍t開始he決心kap認真ê程度有影是會hông驚--死。大學一年á我有繼續phah，捌phah過 2 kái大專比賽，kàu taⁿ我iû-goân思念，以後ē-sái寫小說來計錄，先欠--leh。有1 kái kap甲組學長去受訓，阮乙組--ê lóng hi-leh-leh，我練kah kha皮 liù皮出血珠學長chiah叫我停，其實我mā知，是講我chhan-chhiūⁿ 無phah 袂使--chit，mā袂感覺疼kap thiám。

我寫台語tō是án-ne，hit種感覺你nā有致愛ê mi̍h tō會了解，nā中毒leh。有藥醫？Tiâng時會好，我lia̍h袂準。教練捌講過1句話，ài贏chiah會有信心chiah會繼續，che 變成我後來做tāi-chì 1 kóa方法，tō是ài有寡成就，成績。當然寫台語，少人會有hō͘你鼓舞，歲頭á有--ah，我早早tō體會。所以熱情的確是ài有--ê，siōng無ài ka-tī鼓舞ka-tī。

鼓舞ka-tī，我招寡有名--ê a-tok-á來學台語，講台語作伙phah-piàⁿ leh，hō͘ lín 知台語ē-sái做「國際語言」，討論文學lah。知m̀？過去翻譯a-tok-á ê冊，我看張春鳳做chhiâⁿ濟，我想我kap伊想法有仝。Tō是練習台語，接觸世界文學--ah，án-ne chiah袂lóng hông當作台語kan-taⁿ án-ne niâ-niâ。當然我m̄是講台語有限制，別人ê mi̍h 有khah好，mài khioh 話屎。Chhan-chhiūⁿ phah劍道，ài有強ê對手，你chiah會進步。Koh看人講翻譯文學，án-ne kám袂使有翻譯台語ê文學。未來hoān-sè欠人才--leh。

翻譯是1種功夫，學習in ê話是藝術，理解hia金句mā是1種人生哲學，濟濟種好處講袂完，我tō是án-ne有閒tō翻，順趁認捌hia有名ê（死）人，kan-taⁿ讀目前ê台語冊是無kàu--ê。而且短句niâ，短短á時間袂開chiâⁿ chē時間，án-ne學習ê效果siōng好，nā 寫mi̍h-kiāⁿ tu̍h袂出來，tō來翻譯，che張春鳳mā捌講過仝款ê話。翻好翻bái che看個人台語素養ah。

我捌有幾pái教Hui-le̍k-peng同事台語用羅馬字 koh bat kap Hu-liàn-suh同事講Khà-hu-khà ê話題 tō án-ne khang-khòe事chiâⁿ順利。Che jú hō͘我想講翻譯chit ê事工chiâⁿ chán，好處有影chē，尤其對1 ê tú開始寫台語ê人 ē-sái強逼ka-tī有khah好ê台語思考kap文學創造。而且咱來看，台語ē-sái寫出hiah有道理ê話，hiah súi ê話。當然內底是the̍h人--ê。總--是，透過chit ê過程，語言能力會變強。Chit 點我感覺少人重視，sui-bóng有人翻譯詩，總--是，chiâⁿoh感受原底作者所想欲表達--ê，che mā是看個人台語素養。

內底內容前前後後應該有欲有1冬ê時間翻無濟，對我來講是hō͘我tī chit ê台語hiah-nih-á差ê環境ē-sái跳入去完全ê台語思考，che m̄ tō是過去學習外語ê過程？Mā希望有人án-ne來開始寫kap翻譯。

A-tok-á講台語學台語，án-ne活tī台灣袂曉講ê你，m̄-bián學？Iā是看輕chit項事工 á是認為浪費時間？希望有1工，jú濟人來話，a-tok-á mā想欲來學，搶欲kā台語文學翻譯做in ka-tī語言ê 1工，án-ne 才是有國際化lah。

2016/7/30

動手寫評論投稿

<動手寫評論投稿>

Tī chit ê社會話語權/言論自由，tiāⁿ-tiāⁿ hông扭曲，過去是先輩是án-chóaⁿ phah-拚來--ê，無民主sense kap台灣歷史背景--ê的確無法度了解。

話語權kap言論自由hông扭曲mā是現此時台灣社會阻礙進步ê原因。媒體亂tah號碼，皂烏漆白，人m̄是你thâi--ê mā 講是你thâi--ê。Khah害--ê，chit大堆人hông 洗腦，你nā phì-siùⁿ 伊ê認同者tō當作你是伊ê敵人，欲kā你壓落底，永遠無法度超生（m̄是指我ka-tī，是指大環境）。Hām sió-kóa批評指教lóng袂使，尤其是你是chi̍t ê 細隻囝niâ，你tō無資格講話kâng-khoán，講出來ê話hām siâu lóng m̄是。

當然言論自由m̄是講講話tō m̄免負責任，咱ná m̄是國民黨袂見笑ê láu-á，koh無權無勢。寫評論是欲hông ta̍k-ê看，思考，當然有心人欲扭曲che mā tiāⁿ-tio̍h有--ê，put-jî-kòe，in ka-tī soah kan-taⁿ bih tī 電腦後壁niâ，chi̍t-tiám-á路用mā無，tī民報論壇欲寫20篇，chit ê過程當中我mā已經看破in ê kha手ah，算是有學習--tio̍h。Che mā符合我平素時學習ê態度，tō是實作才有法度體會。Koh有，你kám知有gōa chē人會願意用台語投稿？ 1 隻手算會出來。 （不過，最近chit半冬可能換編輯，投--ê台語稿無1篇刊，mā可能寫了sioⁿlám。）

我欲講過--ê，寫che lóng是有目地--ê，kap任何作家仝款（我無感覺我是作家，免khau-sé），練台語kap文字化，hông讀台語，hông了解政治語言ē-sái是台語，加強台語思考，koh有對國家社會ê關心（我無認為我未來會繼續koh有心chiâⁿ，che是chin傷身命代，除非咱lóng以興趣chit點來對待）。台語運動m̄-ná kan-taⁿ tī文學niâ，而且目前網路ê chhui-sak是siōng有效--ê，針對現狀國家即刻議題來討論，背後ê語言目的jú大。我mā相信看--ê人 無chē，a̍h 看--ê ê人chē-chē kan-taⁿ會講用正字ê問題，he是in無了解台語運動背後ê過程。我--lah，mā是當作我台語學習當中，siōng實際去參與，tī錯誤當中去改進，mā是1 ê手段。尾--a，我ē-tàng體會hia 台語老師ê 想法 kap 1 kóa台語運動者ê想法。He是學者，教育者，評論者kap運動者幾ā種身份ê錯亂，ǹg-bāng 寫台語ê人 chi̍t-ē-á隨變作台語天才。Chin bô-ta-ôa，台語hông壓迫sioⁿ久--ah。當然其中chi̍t-kóa-á是kan-taⁿ欲做便老師niâ，che已經對我自我學習是造成傷害，我kan-taⁿ選擇封鎖chit款人。講chit句，tiāⁿ-tio̍h有人氣phut-phut，講我講話chhiàng-chhio，我大面神，以我來看我kan-taⁿ想欲寫台語niâ，記錄kap 走chhōe失去ê記持。Chhui-sak台語ê路chiâⁿ長，袂因為我1句話tō崩--去，jú免講我siáⁿ-siâu lóng m̄是。捌有台語老師看出我寫--ê不滿，隨kap我會，講「因為sioⁿài台語chiah會態度上有khah激烈」，我mā隨kā 會--tńg-去，講「我kap你仝款，袂輸你」。我真kah-ì hit lê老師量chiâⁿ大，真確實有1 ê老師ê pān。Chhan-chhiuⁿ tī網路寫評論心得án-ne soah hông當作起歹心，我kám無話語權？Chit句話koh是批評？Án-ne是欲做siáⁿ-siâu作家？我kám有chhoh-kán-lak-kiāu？好--lah，好聽話我是寫袂出來，che m̄是我ê人。當然，人欲聽m̄聽mā是自由，寫chit篇算是我koh再回想ka-tī ê初心kap回顧。

我m̄ káⁿ 講讀chiâⁿ chē冊，koh而且有kóa tāi-chì m̄是講讀冊gōa gâu tú gōa gâu，chhùi nā會吐金leh，講--ê lóng是tio̍h--ê。Khah害--ê，koh無ài好好á聽人講，想看māi人講--ê是m̄是有理，toh-ūi是tio̍h / 好--ê，tō 耳空am--leh tèⁿ臭耳人，無tō kā人趕趕loeh，插chhùi開始講伊ê大道理，che kám是溝通。Hit種造神ê概念，ka-tī 就是真理，he實在是有影chhui-sak母語ê毒。

咱mā理解hit種「放尿袂攪沙」，「牛tiâu ta̍k母牛」ê講法，叫咱袂相冤ài合齊。總--是，he 是假議題。咱lóng心胸放闊闊，大聲講出心內話，欲聽你ê回應kap指教。你soah lóng激tiām-tiām，認為lán是歹人。Hit種假和平假包容，thian-tó是對chhui-sak母語ê 1種傷害。當然，che是我個人淺pi̍h-pi̍h ê看法。母語chhui-sak者ê基本原則ài有，總--是有koân有kē，jú濟人jú koân jú有救，thian-tó講，jú無望。任何社會運動lóng仝款，欲chhōe tio̍h 1 ê適當點ài時間，無hoah聲，gōng-gōng做實在bô-khah-choa̍h，無人會可憐，免看別國án-chóaⁿ爭取母語教育，看咱有法度出動3000人做「還我台灣話運動」無？M̄-thang ìn我〔誰理你〕--ah。

2016/7/30