民進黨對siáng 謙卑? 烏道、國民黨iā是人民？

  <民進黨對siáng 謙卑? 烏道、國民黨iā是人民？>

「謙卑，謙卑koh謙卑」是蔡英文講--ê。總--是，是對siáng? 國民黨iā是人民？向望民進黨hia政治人物m̄-thang 袂記人民ê期待，接soà落來ê台灣局勢絕對會比伊所想ê koh-khah挑戰，除非in kan-taⁿ 想欲分 1 chhùi á政治牛肉niâ，che 早 tō hō͘人民看破kha手--ah。Lán做人民--ê，絕對ài 加倍來監督koh抗爭不公不義ê代誌。

咱來kí最近ê例，第一是台中市市長林佳龍，參加烏道頭人伊老母ê喪禮。Chit 件代本身是無要緊，我kap你有交情私底下去liam香是「人之常情」。今á日，風風光光辨khah chiaⁿ chhia-iāⁿ ，佔人ê 路，阻礙交通，這是算siáⁿ? 官方kap烏道ê交情chiâⁿ 公開，m̄驚人講，你是烏道ê市長iā是人民ê市長？公開說明市政府kap 烏道感情chiâⁿ好，你ê「人之常情」kám有對人民想過？進前大肚山規山坪樹á 剉了了 hō͘生意人拚經濟，空氣污染ê問題soah lóng無半步？受苦ê是siáng？選伊m̄是欲hō͘伊走社交--ê，是欲做代誌—ê。Chit 款市長kap胡志強有siáⁿ 差別？另工是m̄是會公開替金錢豹phah廣告？警察ê資源是替chia ê 人烏白舞？Chit款ê政治làu-á，咱ài 來反抗，台灣袂使koh án-ne落去！而且伊koh 是五都之一ê市長，chit款市長，lán 來kā phùi chhùi-noā！

Koh 另外國民黨黨產ê問題，顧立雄委員講「不過度追殺」，chit 句話，lán 來kā 伊 phùi chhùi-noā，失做1 ê台灣人 ê格！顧立雄是siáⁿ-mi̍h立場講chit款話，人民hō͘你權力，m̄是欲hō͘你練chhùi花，m̄是欲hō͘你施捨hit款「無理路」ê謙卑，che kám 是讀法律人ê「公平正義」？二二八欲kàu--ah，全國各地lóng有chē-chē ê 展覽kap 演說會，顧委員應該去聽聽--leh，台灣史去讀讀—leh，m̄-thang 講hia維護殖民者ê話，che m̄是謙卑，是對受害者ê二次傷害，空chhùi koh 再 1 pai 流血！德國納粹食kàu 8-90歲koh leh行法院hông審判要求in 對過去猶太人ê傷害來負責，別人是án-ne追求正義ê轉型，咱--leh？Soah 驚歹勢，iáu-bē有正義kap歷史真相ê洗清tō對kap施暴者原諒？Án-ne是欲做siáⁿ國家，永遠hō͘殖民者，利益者看soe-saiû！到taⁿ，二二八事件，清鄉，白色恐怖tō lóng無tī歷史課本講清楚，講siáⁿ-mi̍h過度追殺？過去國民黨追殺台灣人已經七十年，今á日，lán kan-taⁿ要求歷史真相公開niâ，kám有過份？民進黨是對siáng謙卑？Àu 臭lām爛ê政黨iā是人民？Iā-sī民進黨欲享受做殖民者ê滋味！

Koh 有--leh！「國父」遺像徹除、「國歌」制定kap制憲問題，民進黨是欲謙卑siáⁿ?大力去掃除hia 殖民者ê遺毒，chiah有法度面對未來，做有尊嚴ê台灣人。對台灣人民ê訴求謙卑應答，phah拚實現，m̄是 koh是hia烏心生意人kap烏道。民進黨應該想--ê m̄是未來4 年iā是8年，應該是四佰年才tio̍h，無殖民統治ê 四佰年。Ta̍k-ke 目chiu peh hō͘金來看，看是民進黨國民黨化iā是伊chhoā台灣人行向正義ê 道路！ 咱chiâⁿ緊tō知--ah。

2016/2/24