<<純情咖啡>>
我啉ê咖啡是上純情ê
無加糖，無加牛奶精
對人，對事攏仝款
請你啉一杯
純情ê咖啡
你ê愛
我ê愛
早著回收轉去囉
現今這杯
純情ê咖啡佮過去彼杯比
袂輸白滾水
行佇十字路口
拄著你
已經十外冬失去了聯絡
面容你我雖然無精差偌濟
我ê記持閣清楚印佇心肝底
你咧
記持huân記持啦
彼此ê目神已經佮較早無仝
熱度降溫，深度加深
過著好無？
這句話煞窒(that)佇嚨喉
講袂出喙
只是喙尾仔微微
相頕頭(tìm-thâu)而已
至少毋是當作生份人
頂擺彼一杯咖啡
是毋是佇南仔門城頂啉--ê
猶原腦海中會當拉回時空
親像看幾百擺ê電影
幾分幾秒
講啥做啥
記錄誠好
有閒無？
假作上自然ê模樣
心內煞phu̍t-phu̍t跳
反正你嘛無可能答應
只是加問而已
抑是欲佮彼當時ê咖啡味
彼ê溫度
彼ê苦甜
重新刺激著你酥軟ê舌
位嚨喉直通到你ê心
有閒嘸？
彼當時你講彼个味即世人攏會記
到今(kàu-tann)，你敢會來失憶
有閒無？
少女ê祈禱ê音樂聲
提醒著我
斷念
收回一時ê眠夢
你微微笑
講彼改了後
咖啡就戒囉
2014/6/28
沒有留言:
張貼留言