七字網誌 0617

風光出巡足奢颺，警察排列送伊行，保護人民欲創啥，扶(phôo)lān升官才值拚。
平常頭家有指示，暴民抗議予伊死，槍托(thuh)棍仔撼(hám)落去，若欲升官免細膩。

http://www.appledaily.com.tw/realtimenews/article/new/20140613/415600/


講伊做人攏道義，開喙合喙攏法治，若是烏西出代誌，黨證提來度危機。

透早出門無清醒，車站買票無紮錢，佳哉站長定相見，江湖救急渡陰天。

食飽閒閒若無事，提紙揭筆鬥四句，東南西北在你舞，隨心手寫莫躊躇。

心適寫詩爽家己，寫好寫䆀莫掛意，定定讀詩閣動筆，加添生活的趣味。