北極危機，全球滅絕

< 北極危機，全球滅絕 >

對世界環保議題，是ùi 3、4冬前開始有phó͘-meh-á了解kap認捌。Pùn-sò͘ ê 污染，空氣污染，核廢料，生態koh-iūⁿ，樹á ê知識，溪河維護…等等， nā有機會 tō 會去了解，ùn 豆油 ê方式khioh kóa現代人需要知ê常識。無chit款常識，欲改變是無可能--ê。總--是，chit款ê議題m̄是ta̍k ê人lóng願意去理解，jú 免講改變，除非he已經影響tio̍h 咱 ê生活，通常政府nā願意chhōa頭he是kài緊改變 mā siōng 有效率--ê。真可惜，咱台灣輸歐洲輸kah thiám-thiám。咱chiah看民進黨政府kám 會khah出脫--ê袂？

前幾日koh看見北極ê冰層面積jú來jú細，甚至講m̄是今年底無tō是明年會來消失--去。Che tiāⁿ-tio̍h對人類有chiâⁿ大ê影響，氣候ê變化kap生物ê滅亡。Chit款現象窮實佇過去幾年lóng ē-sái來感受--tio̍h。風颱青磅白磅ta̍k禮拜lóng來，koh有莫名其妙ê龍捲風，台灣ê國土tiāⁿ-tiāⁿ chhan-chhiūⁿ 1條紅燒ê番薯。相連sòa ê 歹吉兆hām科學家lóng無樂觀，電影三不五時leh搬世界末日ê劇情chhan-chhiūⁿ leh暗示講叫咱人ài改變生活ê形態，無chiá，ài受濟濟艱苦罪kòa。總--是，咱人kám 有深深ê體會kap願意接受chit款ê事實？無，受苦--ê mā是ka-tī。人類歹剃頭，自私自利，資本主義chhōa頭ê意識tiāⁿ-tio̍h ài退1步，chiah有希望。龜phiah ê屍體內全全是塑膠mi̍h，魚á 袂赴大漢因為食sioⁿ濟塑膠粒á koh 用細細罟目ê魚網lia̍h魚，割魚翅染（ní）紅ê大海，大海tiām-tiām無聲thèng候時辰欲來報冤，咱，iû-goân m̄知覺悟。冰層面積jú來jú細，咱ê運命jú行jú e̍h，jú來jú短。未來囝孫是欲án-chóaⁿ過？我實在chhōe無答案，tī現此時利益為先ê世界，咱人m̄願àⁿ頭承認ka-tī ê自私，除非hit工來ê時，才會講是ka-tī ê無知。311事件tō是siōng好ê例。可惜，人性ê惡iû-goân 無法度來消滅，歷史重搬ê戲齣注定會koh來，1 kái 會比 1 kái koh-khah精彩。

咱看北極熊iau--死ê相片，無聲ê咒讖人類，瘦枝落葉無神ê雙目，袂輸leh叫咱人類ê魂魄，tiām靜ê北極有漚臭ê屍體味，開始thòaⁿ向世界每1 ê角勢，漲--起-來海面欲淹咱人 ê siáu貪。我chhan-chhiūⁿ看見未來人食人ê世界，風mā pûn-tōaⁿ振動，樹á 死giān-giān ê哀chhan。親人朋友相攬作伙等待救贖，怨嘆ka-tī ê 無知。上帝可能是疼痛世人？總--是，咱人ài先悔改。今á日，行點á膠路頂，我chhan-chhiūⁿ hit 隻大樓玻璃窗外khǎng-páng欲死ê北極熊，強強欲hō͘燒氣hip--死。

2016/6/23