Thui-sak Tâi-oân-ha̍k kiàn-kok -鄭正煜

圖來源台灣羅馬字協會

Thui-sak Tâi-oân-ha̍k kiàn-kok

舊年有chē-chē lán ê 前輩相連sòa 來過往，鄭兒玉，鄭正煜，張炎憲，蕭泰然…幾位，是講in lóng iáu-bōe看見台灣正義轉型leh開始，tō去--ah，心內掛念--ê，iā是台灣，chi̍t ê 土地，社會kap國家。做1 ê台灣人，我tī 2冬前開始走chhōe母語ê súi，真真正正去用lán ê 話來做書面ê記錄，讀台灣ê歷史，用雙kha 行tī大街細巷，peh koân山，koh 參與幾kái ê 社會運動，chiah 了解台灣人ê 自我認同 hiah-nī-á kē，che lóng 是教育起致--ê，四百冬殖民ê毒害，現此時，chiah ta̍uh-ta̍uh-á óa 靠網路工具chiah 有thang 解，ē-tàng解kàu siáⁿ-mi̍h程度，無人講ê準。筆者過去sioⁿ過悲觀，悲觀ut-chut無siáⁿ-siâu路用，kan-ta ē-sái gia̍h筆繼續出聲來反抗，chit條路--lih，sui-bóng路途有時感覺chiâⁿ孤單，總--是，有人會來hō͘ lán tah心 ê 鼓舞。Só͘-tì，lán ē 繼續行--落-去，chhan-chhiūⁿ過去hiah ê 先輩kāng款，ǹg-bāng有1日台灣chhiâⁿ-chò 1 ê 正常ê國家。

過去教育洗腦，戒嚴，加上長期錯亂ê認知，民族救星，國家ê定義，國旗kap黨旗put-tap-put-chhit，國歌kap黨歌o͘-ló͘-bo̍k-chè，koh加 1 ê中華台北 ê 名，中華民國是siáⁿ，台灣koh是siáⁿ…等等？過去教育所教所學--ê，lóng是學中國hit邊相關ê歷史，地理，歷史koh是烏白lām-sám--ê，lán 在地ê歷史，文化kap地理全全tàn hiat-kak。Che tō 是jú來jú濟人欲chhui-sak 屬於台灣人ê 意識觀kap認同。Chhan-chhiūⁿ有人tī護照頂貼「台灣國」ê黏字紙，tī國際比賽khiú「台灣tō是台灣，m̄是中華台北」ê 布條á。筆者mā 幾á kái tī街á路，chhui-sak tàu tī機車尾ê 擋塗板，頂懸刻2字「台獨」。Che ka-taⁿ是用土直ê方法去kì-tî台灣人長久以來走失ê名字「台灣」。Che 聽--起-來m̄是真sù-siông ê tāi-chì，tī台灣soah變作是hông人 ki-ki-tuh-tuh ê「台獨份子」，請教世界上toh 1 國伊ka-tī bē贊成伊國家是獨立--ê？長期以來，政治hō͘ 中國國民黨 hōaⁿ tiâu leh，boài hō͘人chhap政治，lán人長期koh認為chhap政治是烏暗--ê，lah-sap--ê，só͘-tī，boài 管，boài chhap，選舉 ê 時，看--起-來真有民主，事實上，無影，tiāⁿ-tiāⁿ 是請鬼thiah藥單。當然民主進步ê路--nih，是需要時間--ê，lán人mā ē ta̍uh-ta̍uh-á覺醒，總--是，希望lán ê時間koh ē赴！

Lán 提前chi̍t-chām-á ê 課綱反運動來講，tō 是 1 ê 好ê 例。歷史真相tiāⁿ-tio̍h ài 本土，了解lán 土地ê 歷史，無--chiah，讀he 「外國史」是有siáⁿ路用？Koh 免講伊是beh siáu想建立少年人對中國ê「祖國」意識，hngh，chit招已經是無效--ah。可惜--ê是浪費了青春，不但變成母語ê chheⁿ-mê牛，對ka-tī歷史生份，hām面對國際ê趨勢lóng ē tòe bē tio̍h。Chit 點lán 滿心ǹg-bāng kap期待未來新掌權ê 政府1步1步thǹg掉過去hō͘ 中國意識洗腦ê 思想，恢愎台灣多元ê社會原形，建立自我意識。Che tō 是需要「台灣學」ê chhui-sak！

Siáⁿ-mi̍h台灣學？Lán théng-hó ùi 幾ê方面來看，che lóng 是過去中國國民黨tiau意故來阻亂，延chhiân台灣chiâⁿ-chò 1 ê 國家ê計謀。筆者以個人所知影--ê kap 心內ǹg-bāng--ê，lia̍h做幾點hō͘  ta̍k-ke 參考saⁿ-kap研究。筆者m̄是學者，政治學ê專家，kan-ta是小小ê平民，用ka-tī ê 母語將心聲寫--落-來niâ，每1 ê 議題lóng值lán來討論，總--是，字數限制ê in-toan，m̄-tio̍h kap 無好ê所在chiah 請ta̍k-ke tiám-tuh，ló͘-la̍t。

1． 母語教育

母語是世代ê傳承，延續頂1代kap 後1代ê 情感。Siat-sú序大人kap kiáⁿ孫無話thang 講，是beh án-chóaⁿ建立情感？經過hiah chē殖民者thún-ta̍h，母語留--落-來-ê，mā無chē，ē-tàng熟手書寫--ê koh-khah 少。無書寫，tō文字留--落-來，án-ni beh án-chóaⁿ會發展？講欲óa靠家庭教育來教，he是1種無負責任ê講法。過去宋楚瑜做頭，tō 是將lán人話當作臭賤ê語言，só͘-tì，無人ài 學，無人ài 講，現chūn三不五時，koh hông 做恥笑ê對象。In 尾á，tian-tó用lán人話來chiâⁿ-chò 1種選舉 ê工具，poa̍h感情，m̄-bat認真去禰補過去ê錯誤。Chit 款現象m̄-nā tī中國國民黨ê候選人niâ，其它政黨lóng kâng款。Lán tō ē-sái知影母語tīin 心肝頭ê 地位。加上經濟環境所逼，極加對母語使用ê意願jú來jú低，che 造成母語koh過幾冬-á tō ē來消失，成做博物館ē展示品，ta̍uh-ta̍uh-á失去ka-tī ê聲sàu。M̄信，去khiā tī學校門kha口，做1 ê統計分析，算看māi有gōa chē gín-á 講in ê母語。

相關ê語言平等法來立法，有母法基礎，設立相關ê電視台，委員會發落語言ê認證chhui-sak…等等。Che chiah是第1步，chhan-chhiūⁿ過去台語bē輸是孤兒kāng款，萬事tō是ka-tī chông 錢，出冊推銷，tiām-tiām ūi台語phah-piàⁿ。總--是，民間做--ê 有限，政府tō ài the̍h出責任來做頭。現此時，國際上，語言平等ê觀念是chiok sù-siông--ê，1 ê 國家有2-3種官方語言（瑞士有4種）mā 是有--ê，che chiah是保存母語siōng 好ê方法。M̄是賴清德講--ê，ka-tī ê 母語 tō iáu-bōe顧好，tian-tó去chhui-sak英文做第二官方語言，che是資本主義者ê思考，壓制弱勢者，次殖民文化。蔡英文最近接leh講，欲 kā客語做國家語言，lán 等leh看，總--是，政治資源siōng少 ê台語，無人欲chhap。

目前母語ê教育應該ùi國小kàu 大學lóng ài 有相等ê母語課程chiah tio̍h。M̄是國小國中1禮拜chiah ka-taⁿ chit 節課niâ，koh ē-sái hō͘ 老師自由來調動。而且其它課程應該ài 用母語來教學，án-ne chit ê 母語chiah有法度tòe ē tio̍h時代。現準母語kan-taⁿ停tī地方性kap ē-chân事務工作 ê 對話khah chē，koh有用tī leh 罵人oan-ke時chiah ē出現，che lóng hông下意識認為母語kan-taⁿ ē-tàng án-ne niâ。久--ah，自然當做伊是粗俗--ê，尾--a，kui ê 社會價值觀cháu-cheng--去，看ka-tī母語無，加速語言死亡。當然，che 是1種病態ê 社會觀，mā是政治權力後壁leh chhòng-khang。Che真簡單ē-sái ùi台語歌ê歷史來看，put-jî-kò，台語歌本身mā有chhui-sak台語運動ê kha-jiah！筆者m̄是教育專家，總--是，台語現代化教育nā是koh 陷tī過去背唐詩，漢字考證（m̄是人人是語言專家） he絕對是死路1條。

另外教育推廣標準化是1 件真重要ê tāi-chì，寫che tiāⁿ-tio̍h會hông phùi chhùi-nōa，chhiàng聲假gâu假博士博，che是筆者 ùi台文運動來看見siōng重要ê議題之一，che mā是政府機關故意設ê陷阱，mā hō͘ lán ka-tī sio-tak，bih後壁看好戲。用字爭論三不五時tō 有，加上教育政策有leh無leh，造成台文界牛墟內tak母牛，放尿bē kiáu沙，hō͘人減少學習ê興趣，除了是tī意識khah koân ê寫手chiah 有法度繼續來sak。總--是，tiāⁿ-tiāⁿ無hit lō效果。工具性ê書寫推sak是ài 標準化，che tiāⁿ-tio̍h ài 政府來推sak。目前leh，筆者頭前講--ê，m̄-thang koh 陷tī漢字ê魔咒，se̍h來se̍h去，che 對母語無幫助，文字kan-ta是為語言來存在，互相腹腸放khah闊--leh。目前漢羅lām-sám寫是1 ê siōng好ê 方式，保存聲調語言kài 好 ê工具。真可惜目前教育部是以漢字為重，koh 有phí-siùⁿ LÔ-MÁ-JĪ，hām 有寡台語作家mā kāng款。政府放tiām-tiām，hō͘ lán人相thâi 相oan，加速母語ê死亡。筆者m̄是教育者，nā硬欲加1 ê名，kan-ta是母語e記綠者niâ。以過去學習語言ê 經驗來看，實在想無母語ê教育sī-án-ná 差hiah chē。Lán koh-chài思考kap理解背後去主體化ê 動機kap權力。

2．   台灣歷史( 二二八，二戰事件…等等)

台灣人無了解歷史，tī朋友kho͘-á內，問問leh，chē-chē人無知影二二八事件，白色恐怖，戒嚴，美麗島事件，甚至koh khah早日本時代ê歷史。讀--ê lóng 是中國史，中國文-學。Che m̄是正常 1 ê國家現象，bē輸是寄生á。Mài講台獨 iah是華獨，ta̍k-ê人應該lóng是「天然獨」，主張自身是獨立--ê。Koh-khah免講去中華民國政權tī台灣m̄是合法政權，kan-taⁿ暫時替同盟國接收niâ。尾--á，伊內戰phah輸，美國kap 英國á soah 無講無taⁿ允準台灣hông蔣政權，好thang thio in tī亞洲 ê 好khang。Hit 時蔣--ê sóa來台灣ê時，中華民國早tō 滅亡--ah！現準lán koh ka chit ê 名lia̍h tiâu-tiâu，m̄願做ka-tī ê 主人。

過去「反攻大陸」ê 口號kap 現準「兩家一家親」ê口號比較起來tō 知，國民黨政權kan-ta是為ka-tī ê政治利益來phah-piàⁿ，kàu-taⁿ 欲70外年，koh ka台灣當作是殖民地，欲割欲送ê 伴手禮niâ。利用過去接收日本人kap台灣人ê財產成做in ê 黨產，尾--a，國產thong黨產，變成in 黨ê個人事業。In為欲避免主權意識來提koân，tō ài控制認同意識，só͘-tì，kàu-taⁿ，koh 有歷史課綱亂改，洗腦教育ê lah-sap代！過去二二八事件殺人兇手變作蔣「公」，袂當講伊名字，寫ê 時 koh ài làng 1 格，起造中正廟來紀念，che是1 ê 世界大笑詼，hit時gōa chē精英hông in tâi死，台灣死萬gōa人，不明不白，ta̍k-kang過驚惶ê 生活。本底ǹg-bāng日本走後，ē-tàng過ka-tī ê生活，soah tī 國民政府來冬外了後，來1 ê 大屠殺。濟濟ê 歷史，kàu陳水扁上任後，張炎憲做歷史館館長編二二八口述史chiah ta̍uh-ta̍uh-á hō͘ 人來了解，受害者mā 現身講法，tú破國民黨政權背後tâi 人放火ê 事實。Lán ê 教育kàu-taⁿ koh 無教，koh hoah 講ài 放下仇恨，he lóng是國民黨ê計謀！

二戰ê 時，hit 時台灣是日本統治，甚至hō͘ 日本人徵召去外島替in 相戰，chē-chē人尾--a，死tī hia，有ê人tńg來soah hông 當作叛軍，che 是真bô-ta-ôa ê tāi-chì。Lia̍h許昭榮先生tō 是siōng好ê例，伊為欲為二戰時ê日本兵á平反建碑，soah無1 ê 好回應，尾--á，放火自殺來引起政府態度ê轉變。總--是，lán ê 歷史lóng 無教，濟濟人lóng無知。

Hiān-chūn二二八事件sui-bóng jú來jú chē人知影，put-jî-kò，lóng m̄ 是真完整--ê。Koh講政府 tī chi̍t-kóa所在chhāi 「二二八和平紀碑」，che 又koh是國民黨皂烏漆白ê手段，am-khàm過去ê罪gia̍t，阻礙正義ê轉型。「和平」兩字是用來欺騙台灣人。自頭kàu尾，lóng是殖民壓制，ah無戰爭sio-thâi ah，是人民起身反抗殖民政府，殖民政府屠殺人民。Ùi 歷史ê角度切--落-去看，台灣人m̄ jīn-bat ka-tī，對土地過去發生ê tāi-chì無清楚，só͘-tī，mā bē有釘根ê想法。Che lóng是台灣iu-goân政治，經濟kap社會體制直直leh 崩敗ê in-toan。

Koh 有lán鄭南榕先生為tio̍h 言論ê自由，ka-tī放火燒ka-tī證明國民kan-ta 有法度lia̍h-tio̍h 伊ê 屍體，落尾，lán chiah有今á日ê 言論自由。Che chē-chē台灣人lóng m̄知，che m̄是koh活tī hō͘ 中國sok-pa̍k ê 思維，欲án-chóaⁿ ē成長，做1 ê 真真正正ê國家！Só͘-tī，台灣學內底，台灣ê歷史mā tio̍h ài 來chhui-sak，hō͘  lán 重新jīn-bat chi̍t 片土地，來ka寶惜。

3．原住民正名 (目前有十四族，西拉雅族，馬卡道族…正名)

目前台灣原住民承認ê族群有14族，a-m̄-koh，koh有濟濟iáu teh舞正名運動，可比講平埔西拉雅族。Chē lóng是證明台灣原地kap中國是無kâng--ê。Lán 有ka-tī ê 歷史kap 文化。證明台灣是1 ê 多元ê 社會，lán 承認過去歷史ê罪gia̍t，互相phah-piàⁿ，互相扶持chiah tio̍h。M̄是 tian-tó去kap 中國牽chò-hóe，顧in ê 事業，the̍h--ê是外國護照，suh 台灣chi̍t片土地ê 血，chia̍h台灣人ê 肉。馬英九先生tō 是1 ê 例，689萬人竟然hō͘ 伊 koh 做1 pái ê 總統，欲怨siáng? 台灣人害死台灣人，chún講投票tō是民主，投了tō 無要無緊，bē-su是投票leh chhit-thô。Che tō是牛墟內tak母牛，放尿bē kiáu沙，原民會無認同平埔族，是驚人來分割in e 福利？1 ê 族群對無仝族群ê 認同尊重，che chiah是台灣社會所需要--ê，拆破台灣人(對台灣有認同，國族主義)和諧。Koh 有巴宰、馬卡道…等等ê 平埔族。In ê 文化，語言漸漸消失，甚至是lóng死ah，che m̄是lán ê 損失？除了正名，每1 族ê 文化教育，語言 lóng ài來好好了解，有了解chiah ē有尊重，m̄是番á來番á去niâ，過去，殖民政府tō 是用chi̍t 招來控制台灣人。

蔡英文講未來願意以總統ê身份來hiòng原住民會失禮，che lán chin認同。總--是ǹg-bāng蔡英文ē-sái the̍h出khah實際ê政策，m̄是像行政院通過<<原住民語保護法>>草案，che 是國民黨選舉ê 招數niâ，無影無跡，pián 人--ê。

4．   消滅迷信宗教毒害

講che m̄是beh防礙宗教自由，是beh cha̍h-chí迷信koh有惡毒宗教操控人民ê思想。Lán m̄是beh完全ka 傳統tàn-hiat-kak，是ài hō͘ lán了解環保議題，燒金銀紙庫錢，chò-chiò 燒龍船，放生，chhia-iāⁿ ê喪葬 m̄是真好ê傳統，lán tō khiā tī久長經營ê理念，去chhōe 1 ê 平正ha̍h-su ê點。Lán thang知宗教tī台灣民間是chiâⁿ重要ê力量，put-jî-kò，chē-chē宗教團體soah ka-tī 無做好事，用phah廣告ê方式替ka-tī宣傳，pak-siah sàn-hiong人，佔人土地，kap khioh 字紙回收ê人搶物資。利用宗教信用來主導台灣政治，nā kàu選舉替政客貪商背書，hia 平常時soah無對hia政治láu-á，烏心生意人有所批評。Chit 款宗教叫人ka 伊跪，tio̍h ài 叫伊gâu人，大法師！台灣ê宗教 bē hō͘人寄託，tian-tó一大堆風水，奇門八卦，算命ê奇術法，無教lán實際，心靈ê約束kap 解脫。路--lih，陣頭chhia-iāⁿ，阻礙交通，指揮kah機車亂chông，烏衫少年家pháiⁿ-chhèng-chhèng講是神明ê指示。Ta̍k冬，有gōa chē人為tio̍h beh 搶頭香，搶轎，看蜂炮來受傷？放炮á放規暝，hō͘人無法度睏，無閒chhi̍h-chhi̍h，koh 造成空氣污染，che chi̍t kái性ê 消費根本是討債。Che kap 台灣學有siáⁿ關係？Lán台灣學內tiāⁿ-tio̍h有過去宗教性歷史議題，宗教是無論烏白道siōng ài khiú óa ê對象。尾--a，造成營私ê團體，lán soah 無法度制裁，驚惶in虛故假作ê 神！失去理性判斷，變成形式上ê拜神活動，gia̍h香tòe 拜。政治人物m̄-kaⁿ得失宗教界ê頭人，伊犯法，soah無聲無說，是非不分，tō 是án-ne，宗教開始變質，變成好額人操弄ê工具。Só͘-pái，lán起做台灣學ê時，宗教迷信因素tō ài 考慮。台灣ùi北kàu南，lóng有中正路，中華路kap中山路，是án-ná thâi人兇手ē-sái koh ài kā 伊起廟hōng-thāi？造神ê行為kap迷信已經阻礙台灣行向正常國家ê道路。傳統是ài 思考--ê，bái--ê ài the̍h掉，承認che chiah ē進步。Koh 再講hia ê 神kám需要錢，需要hiah chē活動來展現in ê神威？Iā是個人威權kap利益 ê戰場？

5．結尾：

Sui-bóng頭前講hia chē，koh有真濟講袂了，he 是對未來ê心悶kap 煩惱。鄭南榕講：「soah--落-來，tō是lín ê tāi-chì--ah。」我真驚惶，mā真無骨氣kan-ta ē-sái gia̍h 筆「khàu-chhan」niā-tiāⁿ。蔡英文女士對轉型正義，有the̍h起幾點：第一：欲ka原住民hōe失禮，過去歷史ê殖民事件…等等。第二：重建原住民ê文化，語言教育。Chit 2 點lán lóng chiâⁿ贊成，總是，m̄是án-ne tō ē-sái完成轉型正義。國民黨黨產問題，二二八歷史，che lóng 無講是欲叫siáⁿ轉型正義成功，koh有西拉雅族，馬卡道族正名leh？平埔族mā是原住民--ah。語言政策kan-ta看見原住民kap 客語，而且koh是皮niâ，soah 無看見佔上大數ê台語，這是1件真怪奇ê tāi-chì。Lán tio̍h重新統計chiah ē了解目前hām ē-hiáu用台語對話ê人，尤其是少年人是jú來jú少--ah，新政府tiō ài 注重，m̄是kan-ta hoah pa̍t-lá-khián niâ。筆者ǹg-bāng蔡英文上任了後，tiāⁿ-tio̍h ài ùi 台灣學 ê 內容，chhan-chhiūⁿ 伊答應鄭正煜先生 ê話，建立基礎工程kap立法，無，台灣ê主體性是會jú來jú po̍h，時kàu台灣已經m̄是台灣--ah。

2015/11/25起稿

2015/12/19完