100 Khi-lo̍oh ê修行

今年初佇南投望鄉kap美女hip-siōng

<<100 Khi-lo̍oh ê修行>>

是講，叫你作伙來，無ài，現準聽我leh練古！好，tiām-tiām聽我講！

彼工有影tsiânn酷刑，無代無誌欲kap人比siánn馬拉松？Koh選人講siōng ngē ê鎮西堡超級馬拉松！佇厝裡好歇睏，看電影，翹跤lián-tshuì-tshiu，phānn-tshit-á談情說愛，毋是khah舒適，毋是khah贏？Siâng leh khong-am，報名來受tsit款苦楚，家己uānn-nā kiāu，uānn-nā 1步1步踢，頭前ê補給站無知影koh偌遠leh，到底是koh tshun偌濟時間欲關門？

現此時koh tshun 30 Khi-lo̍oh，欲退是無願，欲進是koh會使thuh偌遠？補給站已經有pa-sū (bus) leh tsio人tàu 1車好通駛轉去換衫歇睏，tsit寡選手ê面容tshinn-sún-sún孝男面，講欲放棄，阮心情確實有影響--tio̍h。足緊kā目光khǹg tī其它選手，拍死無退hit種，mā是phēnn-phēnn-tshuán，荏身虛lè -lè，koh幾á-ê鳥仔跤mā拚到tann，無理由我袂使--tsi̍t！比賽100 Khi-lo̍oh，又koh走山路，腦海開始浮動昨日暗來kàu tsiah準備比賽kap 1年訓練ê圖樣koh過程，路邊ê風景偌suí mā是頭lê-lê，行1步算1步，bô-lám-bô-ne無欲插旁-á ê人huah-hiu。Kan-tann, gán見有人提大炮相機leh hip ê時，tsiah會假影leh走，展1-ê-á笑容。Gia̍h頭是欲tshiau-tshuē里程數ê牌-á kap數想補給站ê山豬á肉，茶，飲料，水果kap有原住民家己激ê小米酒。補給、食物聽起來算是除了自我虐待以外，1種kap別人無仝款ê享受！毋知，kám會走siōng慢，hōo人食了袂？Án-ne，有影tō khah悲慘，想著tse有影是艱苦，有夠三八，目屎suah liàn落來。這kám會是1種『適者生存』ê比賽，iah chiah是『飢餓遊戲』hit齣電影ê劇情？可能我血糖過低，開始幻想。King-kah，手股是重-huâinn-huâinn，酸kah欲死，大腿，小腿肚已經開始tiuh-leh-tiuh-leh欲kiù-kin，跤目、跤後-tenn tshan-tshiūnn皮帶斷去仝款失去了控制，koh tshan-tshiūnn時鐘ê huat-tiâu līng去無tsūn欲死tōng-hàinn，跤底若火燒，跤頭hu愈免講會使知覺骨頭不時teh khi-kuāinn-khi-kuāinn，ki-ki-kho̍k-kho̍k，無tsiam油ê款。全身軀操到tsīn-pōng，無協調ê動作無法度掩蓋虛弱ê肉體。有影hiau-hīng，怪siâng，家己tshuē--ê lah。

已經過了10點鐘ah，7分速內(每1公里khai--ê時間)算時間照理講是無問題。是講第1 pái比tse，無經驗，心內總會giâu-gî家己ê能力。普通人比100 Khi-lo̍oh時，每個月tō ài練超過300 Khi-lo̍oh ê量才有法度應付。我是每個月kan-tann走200 Khi-lo̍oh niâ-tiānn，免講mā會心虛。而且，目前比賽後期身體已經超出限制。佳哉，昨日有提早歇，無kap人huí-luī，lōng-liû-lián，無，會jú khah 慘。

睏是1件大代誌，無精神是欲按怎比leh。有ê人是直接睏車-lih，若是車khah大台--ê，是無sánn問題。不而過，我ê車是細kah台-á niâ，前座koh koh-iūnn，袂使來tshiâu平，是欲按怎睏？所致，前日下哺tō提進早前來tshuē所在tah thián-tòo，這mā khah舒適。精差ài收1-ē-á工niâ。

透早四點tō外起床，日頭iáu-buē光，頭額hia ài掛 1 pha電火thang照路。這mā是預防踏著khut-á，無sè-jī跤目suah làu--著，ah koh有若是尾á走siunn晚，山路會陸續開放，有拍電火對方來車ê運將tsiah知影路邊有人ài注意ooh。因為tsiânn早tō ài起床，昨日暗七早八早tō去睏ah，講實--ê，khi-moo-tsì熱-phut-phut，是án-tsuánn睏會去？佇thián-tòo內，反來反去，聽外口ê選手leh喊huah，有ê是thâu-tú-á tsiah到，有ê是leh相kap招lim燒酒，原來逐家比賽久了後，lóng熟似ah，lim酒tām-po̍h-á má-se-má-se欲睏mā khah好--睏。害阮心內ngiau-ngiau，siàu想欲加入in ê聚會。總--是，人是siánn-mi̍h kha，我是siánn-mi̍h kha？心掠hōo定，頭kài比100 Khi-lo̍oh，我看ah是莫舞he有ê無ê，若是影響比賽tō毋好ah。衫褲，外套，鞋á ，bue̍h-á，帽á，oo-jîn目鏡tshuân hōo好勢，起床時，tsiah袂雄雄狂狂tshuē無。然後tshuē事先準備ê愛睏藥吞1粒，亂鐘á設定早時四點起來，好通食早點，準備“上--路“，迎接14點鐘ê考驗！

是講，食藥á好睏是好睏，總是心情有感著tsi̍t sut-sut-á欲完成比賽ê壓力，suah還陷眠。

讀國小ê時tō是校隊，講bóng講，主要是欲閃避讀冊ê nuâ-thâu。總是講欲去運動埕加強訓練ê時，當然袂使輸人無輸陣。論真講欲kā人比賽提將軍領金牌，koh差1大khuì leh。咱是愛sńg，無看重有著頂ah無，無佮意彼種壓力koh會產生無形ê得失感，咱看重ê是完成1件代誌ê過程，這是siōng重要--ê。這點我mā是最後才看破，koh有ê是家己mā無法度koh kā人青春ê肉體來比。Ài承認現實面，才會通改變想法，tshuē出進步、適合咱ê路線。Tse是tsit幾年來一直kā家己講--ê。

出社會欲十偌冬，腹肚1 khian肚是愈來愈大khian，足驚佗1工洗身軀ànn頭看hām家己ê寶貝tō tshuē無，he tō tsiânn悲局ah。決心tuè人流行欲去馬拉松，當然事事項項ài有計畫，上網路tshiau-tshuē面冊朋友分享ê訓練計畫，確實有濟濟專家。講轉來看hiah tsē無實際執行mā無kah tsuá。選定府城體育場運動埕來做下班ê訓練，hia mā是學生時代參加校隊無讀冊lōng-liû-lián ê所在，有tsiânn深ê記持。Koh 1點是，市內交通khah亂，是欲安怎走，kap車陣車拚，無sè-jī命tō無去。另外是現準環保意識khah懸，科學報導講空氣品質PM2.5若是傷懸，戶外活動袂輸leh吸毒，趁身體健康有數，生命mā tō愛顧。體育公園樹-á khah濟，交通車輛管制lóng kài理想。

Tann，mā tshun 暗頭仔下班tsiah有法度thang練，趁錢飼家顧三頓。咱有才調揣工課外ê時間來活動算是了不起。毋願hōo生活ê現實來束縛，佇心悶ê經濟，烏魯木齊ê政治攪吵，無適當ê運動調1下，無的確以我ê性地，早慢tō斷腦筋。選馬拉松成做我ê興趣培養是欲穩定無定著ê個性。期待趁tio̍h健康kiam修練耐性，決心欲完成1冬後ê超級馬拉松，毋驚hōo人笑，當作pûn-ke-kui，到前年一月份前我hām 1場全馬42 Khi-lo̍oh攏 iáu-buē走了過。總--是, 設定目標是第1步。

想袂到佇運動埕ê人，大部份人lóng是欲uá 45至60 tsit khám-tsām ê歲數，少年-á可能lóng是參加暗時安平hia ê『星光馬』，聽講1禮拜seh安平走1 ê全馬，我可能會走kah趴佇塗跤，叫救護車來載。也koh會記第1pái tuè人kha-tshng後走，tsi̍t開始嫌人siunn慢，第3 liàn tō欲kâng超車，hia ê大兄大姐kā咱讚聲加油，講少年人tsiânn猛，速度緊。1時hiâu kha-tshng，hiau-pai。毋值人leh po，愈tshui愈緊，不而過，身體是袂騙人--ê。無偌久，速度tō lak落來ah，hông倒超車，in koh kā我加油。咱suah面感覺燒熱，歹勢歹勢。毋知in心內huân-sè leh偷笑，àu少年，無經驗koh buē顧謙。咱人面皮mā袂kài po̍h，佳哉有1粒堅決ê心，相接suà去運動埕幾á kang，mā 漸漸kap in tsiah前輩tuè-tiâu-tiâu，雖bóng是tsiok食力，喘khah欲死。後來uānn-nā走，uānn-nā聽in開講講笑詼koh有分享寡經驗。知影內底tshuā頭彼ê姐-á，是全國24小時ê冠軍koh有kap人出國比賽，阿娘-uê-io，我tsi̍t開始有影是目tsiu hōo lâ-á-bah khôo tio̍h。我tsi̍t雙魯肉跤是欲按怎kap人ê金kong腿來比--tsi̍t。

任何代誌lóng是ài 1步1跤印，iáu-bē學行toh欲學飛，落尾一定會tsai落去，若是受傷he tō有影giâ-kê。Eh，koh有ê是報名費put-li̍h-á貴--koh，交通費，食ê，住ê 等等lih-lih-ko̍k-ko̍k加加leh，1場比落來siōng無mā ài開3仟khoo以上。舊年安排3場全馬算是欲走超馬進前ê考驗。全馬通常限時7鐘點，我算過就算全程用行--ê mā無問題。超馬100Khi-lo̍oh限時14鐘點，欲像全馬án-ne舞，欲成功是阿婆á生kiánn，tshiânn拚leh！Siōng無6點鐘內ài走40khi-lo̍oh，khah妥當。尤其是超馬tsē-tsē lóng是走山路，peh kiā 落kiā tsē，ài留寡空間，袂使算siunn死。是講南橫，集集kap綠島3場lóng 6點鐘內完成，平時ê訓練有發揮作用，心內tsiânn歡喜。

Tsit場100Khi-lo̍oh比賽前，有koh-khah頂真每1 ê mê-mê-kak-kak。路線看了koh看，是偌kiā，偌長，補給站是tī tó-uī，當然koh有清楚每1段有siánn-mi̍h風景，Tse是一定ài--ê。我家己mā有tsah BCAA tsit款補品2鐘點補充1 kài，BCAA 會使直接補充ān jī suān(胺基酸)，毋免koh ài等nn̄g白質食物ê消化，減少筋肉nn̄g白ê損害。所致，筋肉khah袂疲癆，khah有擋頭。不而過，這種作法是ài看個人體質kap吸收能力，總講1句，ài食著時siōng要緊lah。Koh有經驗ê前輩聽講欲走24點鐘，鐵人比賽ê，ia̍h是走環島ê，lóng mā有--tshuân，有食無食tō看情形。雖bóng伊實在是食品niâ-tiānn，逐家lóng笑笑是合法ê“禁藥”。Tio̍h lah，koh有hit niá有khong-put-leh-sà (compress)功能ê運動褲才是神奇，聽講án-na操tō袂kiù筋！Tsi̍t開始無經驗，佇頭2場比賽全馬ê時，走kàu tsi̍t半tō kiù筋，佳哉時間有liōng，ta̍uh-ta̍uh-á thuh koh會赴，但是欲比100Khi-lo̍oh絕對是袂使hōo tsit款代誌koh再發生。除了人紹介khong-put-leh sá褲ê厲害，我mā koh去網路tshiau-tshuē適合ê品pâi，阿娘-uê，1 niá是貴-sam-sam。總--是，欲完成tō先想好，該投資mā是ài kā投資。再來是毋通hōo家己受傷，袂--hô lah。Mā有人講，你khong-am--koh，莫giâ-kê去參加tō袂受傷。我應伊講規氣mài 食飯tō buē放--ah。魚huān魚，蝦huān蝦，kám ē 比--tsi̍t? Tio̍h--booh！

雄雄tsi̍t時頭殼tshuà 1 tiô，目tsiu展hōo kim，看hōo明。

愈來愈濟人uì我ê身邊走過，本底tō leh giâu-gî家己ê速度變化，這聲無欲承認tō袂使，落kiā koh是我siōng han-bān--ê，跤頭-hu已經tsi-tsám袂tiâu。用身體ê慣性來tshuā siàu想欲停睏ê雙kha，減輕體力消磨kap 跤ê酸痛。Koh繼續維持tsit款速度可能佇關門時間進前無才調轉來！1 ê 懸懸-lò-lò，欲uá 40統歲ê查埔人uì我身邊走過，目光suah tsi̍t時hōo伊khiú去。心內爆出1句話，我到底leh創siánn？伊身上結1 ê人做兵時ê『值星帶』頂懸寫”癌末跑友請鼓勵“。我ê雙kha袂輸tsi̍t時受著刺激，身魂hōo伊kau tiâu leh，tuè伊後壁。我大聲huah“加油”，伊ua̍t-thâu用tsiok堅定ê目神看我koh 用中氣十足ê聲嗽kā我回“加油”。看家己欲死-tōng-hàinn，無lám無ne彼pān，suah感覺真見笑。Hit款hiah-ni̍h-á充滿硬骨硬氣ê生命，使人感動kah欲流目屎，ah，毋是一二句tō ē-sái說明交代清楚--ê。選擇tsit款方式來體驗人生最後ê旅程，每1 ê suh氣，是毋是有koh-khah濟ê反省kap覺悟，彼雙kha是koh ē-sái行偌遠？Tshuā伊看無看過ê故鄉kíng-tì，mài hōo人生留siunn濟遺憾。想起1齣電影”Bucket list “，翻做台語tō是“tsi̍t路sńg kàu死”，內底講ê是佇欲死進前將最後人生欲做ê代誌，lóng列做1 ê事工單1條1條欲來完成。這位跑友huān-sè mā有1張寫好ê事工單á，1項1項等leh完成。想tio̍h tse，無tiunn無tî已經來到80 Khi-lo̍oh，時間過了11點鐘。不而過，我已經看無伊ê車尾燈á，有影是好厲害ê紅狗蟻！咱想想leh，目前ê事工tō是ài完成tsit kài ê比賽，千千萬萬mài放棄。

我leh走ê時khah罕得kap人來leh開講phò-tāu。無想欲浪費時間kap精神，tsi̍t時suah siàu想欲有1 ê友志來陪伴。你絕對想袂到，比賽ê人穿插五花十色，有穿白雪公主，雷神só-jī，鋼鐵人ê衫，1點ah tō袂輸人leh開pha-thì (party)。Hit ê hái-kat-á頭穿sē-bi-lóh結ne-khu-tai siōng hàm-kóo，是衫褲內有裝冷氣--ê款！Lóng無tio̍h-sua？山區四點外，日頭已經ta̍uh-ta̍uh-á落山，溫度mā開始降低，雖bóng有穿外套，換過ê衫褲koh tâm-khì--ah，風uì正面tsîn過來，kha冷手冷，身體sih-sih-tsùn有tām-po̍h á失溫ê現象。遠遠看見山跤欲10 Khi-lo̍oh外，有1 ê補給站，suah無sánn想欲衝ê意志。相連suà，後壁ê跑友輕聲細說講1句 ”加油，後1站有泡麵”，tō衝落去。我ê胃已經開始iau飽吵，聽見án-ne實在是擋袂tiâu！決心欲佇最後ê補給站好好-á hioh睏，食1碗熱燙燙ê泡麵，續suà kā kha lia̍h-lîng 1-ē。若是硬king落--去，昏死佇路邊，時到tō歹看ah。

時間已經過了12鐘點，tshun最後10 Khi-lo̍oh。長時間ê流汗，鹹份流失會造成肌肉傷害，khah嚴重e運動員ê生命無得確tō oo-iú -去。我拄才起步，kám ē-sái hōo tsi̍t款tāi-tsì發生！倒-kha kha-thâu-hu有寡tsíng，這是停落來食1碗泡麵，配山豬á肉，lim小米酒ê nuâ-thâu。比賽單位對tsiah ê 運動kiám-tshái有了解，有ha̍h咱ê意kap喙舌。佇補給站內看有ê跑友kap我仝款tshan-tshiūnn iau tsiok久，看見mi̍h-kiānn tō uì喙tsinn，lóng毋驚hōo kénn-tioh，tsa̍k-tio̍h。逐家食著燒，胃有khah燒熱，在來時間mā有liōng，講話mā khah會笑詼。Lóng講透早到tsìng，juā艱苦tú juā艱苦，笑笑koh開始怨嘆家己tsit款做gia̍t ê行為！結果leh，逐家lóng問後1場比賽是當時，報名袂？到底tse是siánn-mi̍h款ê心理？可能家己mā毋知。為著成就？證明家己ê體能、意志？求1-ê名？為hit塊重-khuâinn-khuâinn ê獎-pâi？Tse我mā無答案。Hōo我驚1 tiô，我竟然mā kap in仝款leh想後1場比賽！Kám講過程中身體所受ê艱苦lóng buē記了了？ Ia̍h-sī泡麵siunn過好食？Kám有hiah hàm，無捌食過--ni̍h！

起行--looh，最後5 Khi-lo̍oh，無行buē到lah。心肝á suah開始想我已經完成95 Khi-lo̍oh ah，tse是我萬萬想袂kàu--ê。Lán lia̍h 正面ê思考，算是對家己有肯定，認同過去1年來ê kut-la̍t練習。自出社會來，kài少機會有法度得tio̍h成就感，lán是替人食頭路ê，無siánn家世背景，mā buē曉kā人phôo，目識bái buē曉看人面色。有當時ah，講實話顛倒hōo家己歹看，tshuē無所在thang tháu-khuì。Tsi̍t年來，為tio̍h欲解tháu心悶，走tshuē自信，成就hām自我存在感，tsiah會踏佇tsi̍t條路頂。100 Khi-lo̍oh，1場比賽來講可能tsiânn長，但是人生leh？想kàu tsiah，suah感覺身體ê酸抽痛已經無算siánn-mi̍h！總--是，比賽有終點，人生mā有終點，不而過，咱人是欲追求siánn leh？來比賽ê，毋 tann少年人niâ，hia五六十歲ê大兄大姐是koh欲追求siánn？絕對毋是『健康』兩字hiah-ni̍h-á簡單才對。

看見終點站佇間眼前，心內mā堪袂ti̍t激動，目眶suah紅起來，路頂ê指揮人員sio-tsènn huah加油，『欲kàu ah，欲kàu ah』。Ànn頭看家己彼雙跤，1步1步若行若走，uì透早日頭iáu-buē出來，到phah-phú-á-kng，中畫，下哺，日頭落山，我追求ê成就ti̍t欲到ah。堅持確實毋是1件簡單ê代誌，到尾站，kám有人會kā我phah-pho̍k-á? Tse kám會是1種虛華ê要求？走馬拉松kám會想了siunn濟？衝過終點線，大聲huah出聲，我知影只有家己了解，生命ê精彩是1點1滴粒積出來--ê。Tsia ê道理lóng thong人知，是講，tō ài家己行，才會了解。咱了解濟濟人kan-tann看最後ê結果，無看過程是圓是扁，這kám有趣味？Siōng 過簡單得來ê mi̍h-kiānn，毋知影寶惜，這是thong人ê症頭。我想tsit場比賽，有kā咱人醫治，1粒1粒ê汗生成做1粒1粒ê鹽是咱激逼出來ê毒素。將衫褲kap ām-kún ê鹽粒khau-khau-leh講欲做紀念，這ê成就有影是比彼塊獎pâi khah重，毋知有人對tuè我按呢做無？Ài-io，你若感覺我siōng hàm，你來走看māi，tō知lah。報名費我先出，走無了你ài賠我，無，講hia濟，你永遠袂了解lah。