風颱起狂亂心情

<<風颱起狂亂心情>>

用字爭議是台文界siong hing e問題。我本人ma有意見，未來chiah寫佇家己e 冊，有寡前輩的確會了解。重點是台語kap華文(中文)ai有法度分別。用詞kap語法 he是無仝e，我目前無法度ka中國毒素完全洗hoo清氣，我kan-tan貼欲2冬e台文酸痛布，無是食2冬e台文青丸仔。現此時，台文e知識long是細漢時父母傳--落-來e。Koh再講，生活ai 顧，1工開欲3點鐘寫讀，準講我免趁錢飼家nih！

自從2013年11月佇網路寫台文，差不多有欲10至15偌e前輩攏會來共我講用字e問題，無hau-siau。這點我算是有風度顧謙，莫失人意。相信這是台文界e風俗，ah是悲哀，這點cheng-chhai 掀1本台文冊to 會了解，有ham無，有！我無驚倒，算是面皮khah厚e款。長期無捌受過台文e教育，kan-na青盲牛學寫字。不而過，若是短短e時間3，4e來，有影是擋袂稠，予人chheh心。總--是，in無知影我寫台文e目地，koh不sam時有leh進步(家己po)kap繼續讀冊，逐工寫無停。咱毋是欲做作家，是leh寫遺書，做1 e 父母話e記錄者nia-nia。用字標準化當然是重要，我個人猶原leh改進，koh leh讀幼稚園lah。尾a，我是個人khah ai 漢羅濫糝寫，甚至是全羅。現此時oan-na寫，oan-na改。Po 佇網路是欲予人看，算是宣傳，兼家己看爽，心適心適，是講我無hit-lo講救世e心態hia偉大。

我毋是欲講莫來ka阮指導牽教，可能是風颱天欲來，袂當上山，目睭金金人傷重，soah起狂。人是掃tioh風颱尾，我是起風颱頭。放假，無代誌莫出門，向望逐家出出入入平安順序nia。Amen!

2015/8/21