台灣ài繼續對不起國民黨！

<<台灣ài繼續對不起國民黨！>>

昨日中國國民黨舉行第19次全國黨代表大會，有人hoah講舊年9合1選舉輸去是台灣人對不起in。我想he tō是in 所有人ê心內話。長期剝削台灣，食台灣夠夠，咱chia ”死奴才”ká-ná 清醒ah，he tō是in開始驚惶過去ê lah-sap代欲piàng空ah。照伊講án-ne，kui-khì 全台灣人lóng kap in 跪 kap in 賠罪，台灣放hō͘ in koh烏白舞70冬！He有影是笑破人ê chhuì，無知影見笑，“家己捧屎抹面 (Ka-kī phóng sái buah bīn)“，koh無知臭，白白紙ngē欲ní hō͘ 烏！台灣人kám lóng hō͘ in 當作phàn-á？Pa̍t-á-phiò koh 欲繼續開，繼續騙？

洪秀柱講台灣人已經tòng袂tiâu受仝款ê折磨，he 是leh khau-sé馬英九，ia̍h-sī phí-siùⁿ過去國民黨ê執政？Koh-khah hàm，kám是現準時是民進黨leh執政？我頭khak看koh 花sà-sà？到底siâng是欲表代siâng？我有影看袂開mā想無，台灣人若會吞忍到chìn？是咱人頭khak有問題ia̍h-sī siōng過軟chiáⁿ？Hō͘

殖民政府洗腦變khong-am。

到明年koh是長lò-lò，馬英九koh有chiâⁿ濟時間烏白舞伊大統一ê計策，教育洗腦政策8月tō欲來起行，m̄管咱高中生án-chóaⁿ抗議伊tō是無聽。這mā符合伊過去ê所做所為，咱無意外。總--是，洪á秀柱，koh愈將國民黨心聲話攏tháu-tháu出來，這點hō͘ 咱欽佩。做咱2016年ê目標，tō 是將國民黨消滅！Ngē tú-ngē，莫講廢話，莫講hia有ê無ê se̍h 1大lìn。這應該mā是國民黨已經行無路，重點是咱台灣人覺醒袂？kam準備好ah，隨時來阻止伊koh進1步ê行動，無者，2016年欲收soah，mā bái thio lah。

Hit堆大官虎林益世，賴素如，柯朝欽，卓伯源，劉政鴻，李全教…烏西食錢無免關，彼張車lián黨證sa出來，萬事ok，爽歪歪。戰後，chia̍h好做kheng-khó͘，想講台灣是寶島，貿死ah，國庫thàng黨庫，四萬換1 kho͘，家園厝宅hông伊佔，叫你食飯tō攪鹽mài chhan mài哭激tiām-tiām。Kā你騙講反攻中國，逐家好兄弟lóng是kâng族，siáⁿ知in放sái直接tī街á路leh脫褲。Chit-má leh，西瓜óa大pêng，欠錢無欲還，hō͘ in亂舞政治好chia̍h穿！欲到選舉ê時，tō講好聽話，siáⁿ-mih兄弟姐妹；烏西lia̍h包，出賣台灣ê時soah袂tàng kā伊罷免，派警察á gia̍h棍á kā你hám，告你違法！法院袂輸in leh開--ê。世代e正義公平kám有改進？Ia̍h-sī，愈來愈軟塗深掘？Tī網路公開ê資訊，咱應該ē-sái有khah清楚ê判斷才是！

馬英九已經hông人看soe-bóe，車lián黨ê cha-po͘看pān-sè無好，1粒頭kiu起來ná龜á，hō͘洪秀柱出任選總統，這是可能是in ko͘-put-jî-chiong--ê。總--是，咱ài認hō͘清楚國民黨ê做法主張iáu-goân無變，tō是欲kā台灣變做中國ê 1部份。這是害死囝孫ê將來，tī國際hông人看輕，頭gia̍h bōe起來，hō ͘phùi-chhùi-nōa !

長期國民黨對母語ê教育tō是看無目地，存心欲kā咱ê喙舌割hō͘斷。佇全代會大聲唱台語歌，講客語，原住民語，he是欲騙siáng ê感情？Kan-taⁿ tī選舉ê時才來làu 2、3句，poa̍h感情，騙選票，這招永遠lóng袂siān！台灣人kám long bōe覺醒？洪秀柱tī 2009年講欲替台灣人民省錢，soah將咱台語認證預算thâi-tiāu，這kám有道理！Taⁿ，台灣話hō͘伊hoah來tō來，hoah去tō去。教育變成是in國民黨ê工具，將咱ê思考，歷史，文化…等等lóng洗掉，tàn-hiat-ka̍k，這是殖民者ê行為，chìn，已經欲過了七十冬ah。咱iáu-goân nā布袋戲ang-á，hō͘ in使弄！台灣人kám long bōe覺醒？準講伊今á日，講欲替台語出聲，he絕對是pa̍t-á-phiò，pián-sian-á！濟濟是in過去ê騙chia̍h騙穿ê kî-khá àu-pō͘，馬英九tō是hō͘ 咱看現現ê例！ Koh hō͘ 國民黨繼續舞，咱台灣人tō準備跳烏水溝ia̍h-sī太平洋!

目前國民黨內底已經ka-kī人 leh青狂ah，驚伊長期ê霸權hông討轉去，這tō是天公伯á hō͘ 台灣人ê機會，咱ài好好á把握這kái轉型正義。不止á選總統欲hō͘ 伊三字塗塗塗，立委mā是ài hō͘ in phak tī塗kha！

最後，準講台灣人對不起中國國民黨，好，咱tō繼續對不起in，hō͘ 台灣人ê kui-pak火做1 kái燒khah 大leh。送伊過橋！Hông咱台灣無國民黨ê未來，he 才是台灣囝孫ê未來。