tsit年學台語e心得

學台語欲進步，其實電腦科技佮面冊幫贊我足濟。

過去因為電腦輸入法e發明，文獻電子化保存攏有足大e功勞。

嘛佳哉我本身ko會hiáng講，嘛願意開時間讀，今年來臭屁仔講有進步。

台語我家己分有三大種類，第一：學者佮教育老師。第二：評論者，佮文學較有關係。第三：就是文學創作者。

我佇府城南部e關係，會當tsiap-tshiok足濟e創作者佮台文推sak者。嘛會使定定佮伊交陪請教。佇台語文學學習過程實在是足大e幫贊。這未來欲共台文行愈遠愈闊，會當佮目前社會袂有斷節去，有一工會當大聲講台文文學是足媠—a。

佇面冊來講，是另外e效果。面冊台語社壇，有足濟國小國中leh教學生e老師。佮in請教是拍基礎，因為過去嘛無正式學過台語！學者提供e資料，是追求過去失落e歷史。這是另外一e面向。對我來講，可能有淡薄仔無聊。不二過，有時會發覺講台語e智慧，雄雄煞感情愈來愈深！

是啦，我嘛知知過去台語文運動台文人有各人e意見。 毋過，上重要e是逐家仝心推sak母語，包容彼此，終其尾，逐家一定予台語徛起來。

目前台語投稿出口大約只有六個期刊( 各地方政府作家出書無含在內 )，其中只有一e是官方主導。其它都是由民間來發行。

1. <<臺江臺語文學季刊>> (季刊 / 官方發行) (重新招標中)

2. <<海翁文學雜誌>> (月刊)

3. <<台文戰線>> (季刊)

4. <<台灣教會公報>> (週刊)

5. <<台文通訊BONG報>> (月刊)

6. <<台灣文藝>> (半年刊) (無捌投過，驚歹勢)

今年投稿e感想，各雜誌攏有伊e主張訴求，這嘛是我慢慢仔發覺佮了解。算起來動筆寫母語閣投稿，是我今年上趣味e代誌。2014 /12/22